၂၀၁၆-၂၀၁၇ ဘဏ္ဍာနှစ်တွင် မြန်မာနိုင်ငံတော်ဗဟိုဘဏ်က မြန်မာ့စီးပွားရေးဘဏ်များနှင့် ပုဂ္ဂလိကဘဏ်များမှတစ်ဆင့် ပြည်သူလူထုထံ ကျပ် ၄၈၁၂ ဘီလျံကျော် ဖြန့်ဝေခဲ့ပြီး ယင်းဘဏ်များက ပြန်လည်ပေးသွင်းလာမှု ကျပ် ၃၅၄၆ ဘီလျံကျော်ရှိကာ အဆိုပါငွေများမှ ပြန်လည်ထုတ်ဝေနိုင်သည့် ငွေစက္ကူ ၃၆၅၇ ဘီလျံကျော်ရှိပြီး ဖျက်ဆီးခဲ့သော ငွေပမာဏမှာ ကျပ် ၃၁၃ ဘီ လျံကျော်ရှိခဲ့သည်ဟု မြန်မာနိုင်ငံတော် ဗဟိုဘဏ်၏ ၂၀၁၆ - ၂၀၁၇ ဘဏ္ဍာရေးနှစ်ချုပ် အစီရင်ခံစာတွင် ဖော်ပြထားသည်။
မြန်မာနိုင်ငံတော်ဗဟိုဘဏ် ဥပဒေအရ ဗဟိုဘဏ်သည် ငွေစက္ကူများဖြစ်သော ပြည်တွင်းသုံးငွေများကို တစ်ဦးတည်းထုတ်ဝေသူအဖြစ် ဆောင်ရွက်ရသဖြင့် ငွေကြေးလုပ်ငန်းစီမံခန့်ခွဲမှုဌာနအနေဖြင့် ငွေစက္ကူများကို ဖြည့်တင်းခြင်း၊ ထုတ်ဝေခြင်းများကို စနစ်တကျစီမံခန့်ခွဲနေပြီး ဗဟိုဘဏ်က ထုတ်ဝေထားသော ငွေစက္ကူ ၁၅ မျိုးကို ပြည်သူလူထုအတွင်း လွယ်ကူစွာအသုံးပြုနိုင်ရန် ဗဟိုဘဏ်၏ ကိုယ်စားလှယ်များဖြစ်သော နိုင်ငံပိုင် မြန်မာ့စီးပွားရေးဘဏ်များနှင့် ပုဂ္ဂလိကဘဏ်များမှတစ်ဆင့် ဖြန့်ဝေလျက်ရှိရာ ၂၀၁၆ -၂၀၁၇ ဘဏ္ဍာနှစ်တွင် ကျပ် ၄၈၁၂ ဒသမ ၅၂၉ ဘီလျံ ဖြန့်ဝေနိုင်ခဲ့သည်ဟု အစီရင်ခံစာတွင် ဖော်ပြထားသည်။
ထို့အတူ ဗဟိုဘဏ်၏ ကိုယ်စားလှယ်များဖြစ်သော နိုင်ငံပိုင်မြန်မာ့စီးပွားရေးဘဏ်များနှင့် ပုဂ္ဂလိကဘဏ်များသို့ ဘဏ္ဍာငွေထုတ်ပေးခြင်း၊ ပြန်လည်လက်ခံခြင်းများ ဆောင်ရွက်ပေးလျက်ရှိရာမှ ၂၀၁၆ -၂၀၁၇ ဘဏ္ဍာနှစ်တွင် ဘဏ်များက ကျပ် ၃၅၄၆ ဒသမ ၉၅၉ ဘီလျံ ပေးသွင်းလာခဲ့ပြီး ဘဏ်များက ပေးသွင်းလာသည့်ငွေများကို အသေးစိတ် ပြန်လည်ရေတွက်စစ်ဆေး၍ ပြန်လည်ထုတ်ဝေနိုင်သည့် ငွေစက္ကူများ Fit Notes နှင့် ပြန်လည်သုံးစွဲရန် မသင့်တော်သော ငွေစက္ကူများ Unfit Notes အဖြစ် စိစစ်ရွေးချယ်ရာ ၂၀၁၆ -၂၀၁၇ ဘဏ္ဍာနှစ်တွင် ပြန်လည်ထုတ်ဝေနိုင်သည့်ငွေစက္ကူ ကျပ် ၃၆၅၇ ဒသမ ၁၀၁ ဘီလျံရှိပြီး ပြန်လည်သုံးစွဲရန် မသင့်တော်သော ငွေများအဖြစ် ကျပ် ၃၃၆ ဒသမ ၀၄၀ ဘီလျံခန့် ရွေးချယ်ရရှိခဲ့သည်ဟု ဗဟိုဘဏ်၏ ၂၀၁၆- ၂၀၁၇ ဘဏ္ဍာရေးနှစ်ချုပ် အစီရင်ခံစာတွင် ဖော်ပြထားသည်။
ဗဟိုဘဏ်က ထုတ်ဝေနိုင်သော ငွေများအနက် တစ်ကျပ်တန်မှ ၅၀၀ ကျပ်တန်အထိ ငွေစက္ကူများသည် ကိုင်တွယ်သုံးစွဲမှု များပြားသဖြင့် ဟောင်းနွမ်းစုတ်ပြဲလွယ်သည့်အတွက် ယင်းငွေစက္ကူများအား ပြည်သူလူထုမှ အသုံးပြု၍ ဟောင်းနွမ်းသွားသည့် ငွေစက္ကူများကို ပြန်လည်သုံးစွဲနိုင်သည့်ငွေများဖြင့် ဗဟိုဘဏ်မှလဲလှယ်ကာ အဆိုပါဟောင်းနွမ်းငွေစက္ကူများကို အပြီးသတ်ဖျက်ဆီးရေးဌာနစိတ်တွင် ဖျက်ဆီးမှုပြုလုပ်ပြီး ၂၀၁၆ -၂၀၁၇ ဘဏ္ဍာနှစ်တွင် ကျပ် ၃၁၃ ဒသမ ၇၀၆ ဘီလျံကို ဖျက်ဆီးခဲ့သည်ဟု ဗဟိုဘဏ်၏ ၂၀၁၆ - ၂၀၁၇ ဘဏ္ဍာရေး နှစ်ချုပ်အစီရင်ခံစာတွင် ဖော်ပြထားသည်။
-
လာအိုမြောက်ပိုင်း၌ ရေကြီးမှုကြောင့် စာသင်ကျောင်းအချို့ပိတ်ထားရ
-
တရားမဝင်ကမ္ဘောဒီးယားရွှေ့ပြောင်းလုပ်သားများ ဘန်ကောက်၌ထိန်းသိမ်းခံရ
-
တယ်လီကွန်းလိ-မ်လည်မှုတရားခံ တရုတ် ၁၃၁ ဦးကို တရုတ်သို့လွှဲပြောင်းပေး
-
ကလောမြို့ သောက်သုံးရေလုံလောက်စွာပေးဝေနိုင်ရေး ရေအေးကန်ဆည် ကြံ့ခိုင်မှုရှိရန်နှင့် ရေစစ်ကန် ကောင်းမွန်စွာ လည်ပတ်နိုင်ရေး လုပ်ဆောင်
-
နေပြည်တော် – တပ်ကုန်း – ပင်လောင်း ဖိုင်ဘာကေဘယ်လ်ဆက်ကြောင်း ပုံမှန်ပြန်ဖြစ်စေရေး ဒုတိယဝန်ကြီး ဆွေးနွေး