တရားမဝင်ရွှေ့ပြောင်းအခြေချများ အမေရိကန်နိုင်ငံထဲသို့ ဆက်လက်ဝင်ရောက်နေသရွေ့ မက္ကဆီကိုနိုင်ငံမှ သွင်းကုန်များအားလုံးအပေါ် အခွန်ငါးရာခိုင်နှုန်း တိုးမြှင့်စည်းကြပ်မည်ဟု အမေရိကန်သမ္မတဒေါ်နယ်ထရန့်က မေ ၃၀ ရက်တွင် ပြောကြားခဲ့သည်။ “တရားမဝင် ရွှေ့ပြောင်းအခြေချတွေ မက္ကဆီကိုကို ဖြတ်ပြီး ကျွန်တော်တို့နိုင်ငံထဲ ဝင်နေတာ မရပ်မချင်း ကျွန်တော်တို့နိုင်ငံထဲကို သွင်းလာတဲ့ မက္ကဆီကို ကုန်စည်အားလုံးအပေါ် ဇွန် ၁၀ ရက်ကနေစပြီး အခွန်ငါးရာခိုင်နှုန်း စတင်စည်းကြပ်မှာဖြစ်ပါတယ်” ဟု ထရန့်က Twitter တွင် ရေးသားခဲ့သည်။
“တရားမဝင် ရွှေ့ပြောင်းအခြေချ ပြဿနာကို မဖြေရှင်းနိုင်သေးသရွေ့ အခွန်တွေဟာ တဖြည်းဖြည်း မြင့်တက်လာမှာ ဖြစ်ပါတယ်။ အဲဒီပြဿနာကို ဖြေရှင်းပြီးရင်တော့ အခွန်တွေကို ဖယ်ရှားပေးမှာပါ” ဟု ထရန့်က ရေးသားခဲ့သည်။
အိမ်ဖြူတော်မှ ထုတ်ပြန်ချက်တစ်ရပ်တွင် မက္ကဆီကိုကုန်များအပေါ် စည်းကြပ်ထားသည့် အခွန် ငါးရာခိုင်နှုန်းသည် ဇူလိုင် ၁ ရက်တွင် ၁၀ ရာခိုင်နှုန်းသို့ မြင့်တက်လာမည်ဖြစ်ကြောင်း၊ ယင်းနောက် အခွန်များသည် လစဉ် ငါးရာခိုင်နှုန်းစီ တိုးလာမည်ဖြစ်ပြီး နောက်ဆုံး အောက်တိုဘာ ၁ ရက်တွင် ၂၅ ရာခိုင်နှုန်းသို့ ရောက်ရှိသွားမည်ဖြစ်ကြောင်း ဖော်ပြခဲ့သည်။ “ကျွန်တော်တို့ နယ်နိမိတ်ထဲကို နိုင်ငံခြားသားတွေ တရားမဝင် စီးဆင်းဝင်ရောက်နေတာကို မက္ကဆီကိုဘက်က ထိထိရောက်ရောက် မတားနိုင်သရွေ့ အခွန်စည်းကြပ်မှု ၂၅ ရာခိုင်နှုန်းဟာ ပုံသေရှိသွားမှာ ဖြစ်ပါတယ်” ဟု ထုတ်ပြန်ချက်တွင် ဖော်ပြထားသည်။
မက္ကဆီကို၊ ကနေဒါတို့နှင့် အမေရိကန်ကြားတွင် ရရှိထားသော မြောက်အမေရိက ကုန်သွယ်ရေး သဘောတူညီချက် စတင်အသက်ဝင်သည့်နေ့မှာပင် ယခုကြေညာချက် ထွက်ပေါ်လာခြင်းဖြစ်သဖြင့် ထိုသဘောတူညီချက်အပေါ်တွင်လည်း သက်ရောက်မှု ဖြစ်လာနိုင်ခြေရှိနေသည်။
မက္ကဆီကို၏ တုံ့ပြန်မှု
မက္ကဆီကိုနိုင်ငံ၏ ပို့ကုန်များအနက် ရာခိုင်နှုန်း ၈၀ သည် အမေရိကန်သို့ပို့နေခြင်း ဖြစ်သဖြင့် ယခုအခွန်တိုးမြှင့်စည်းကြပ်မှုသည် မက္ကဆီကိုအတွက် ဆိုးရွားပြင်းထန်သည့် အကျိုးဆက်များ ဖြစ်ပေါ်လာစေနိုင် ဖွယ်ရှိသည်။
မက္ကဆီကိုသမ္မတ အန်ဒရာမန်နျူ ရယ်လိုပက်ဇ်အိုဘရာဒေါကမူ အမေရိကန်ဘက်မှ ကြေညာချက်ထုတ်ခဲ့ပြီးနောက်ပိုင်း ပြေရာပြေကြောင်းသဘောဖြင့် ရေးသားထားသည့် စာတစ်စောင်ကို ထရန့်ထံသို့ ပို့ခဲ့သည်။ “ထိပ်တိုက်တွေ့တာ မလိုလားပါဘူး။ ရွှေ့ပြောင်းအခြေချ ပြဿနာအတွက် အခြားရွေးချယ်စရာနည်းလမ်းတွေရှာဖို့ ကျွန်တော်တို့ ပိုပြီး နက်နက်ရှိုင်းရှိုင်း ဆွေးနွေးလိုတဲ့အကြောင်း ပြောလိုပါတယ်” ဟု အိုဘရာဒေါက ရေးသားခဲ့သည်။
အစောပိုင်းကမူ မက္ကဆီကိုမှ မြောက်အမေရိကဆိုင်ရာ ထိပ်တန်းသံတမန်က အမေရိကန်၏ လုပ်ရပ်အား အလွန်ဆိုးရွားသည်ဟု ခေါ်ဆိုခဲ့ပြီး အခွန်တိုးမြှင့်စည်းကြပ်မှုများ အသက်ဝင်လာပါက ပြင်းပြင်းထန်ထန် တုံ့ပြန်သွားမည်ဟု ပြောခဲ့သည်။
တက္ကဆက်ပြည်နယ်၊ အယ်ပါဆိုဒေသမှ နယ်စပ်အေးဂျင့်များသည် လူ ၁၀၃၆ ဦး ပါဝင်သည့် လူအုပ်ကြီးကို ထိန်းသိမ်းခဲ့ရကြောင်း၊ ယင်းသည် ထိန်းသိမ်းခဲ့ရသမျှတွင် လူအများဆုံးပါဝင်သည့် ရွှေ့ပြောင်းအခြေချ လူအုပ်ကြီးဖြစ်ကြောင်း ထုတ်ပြန်ပြီး နောက်တစ်ရက်မှာပင် အခွန်ကိစ္စ ထွက်ပေါ်လာခြင်း ဖြစ်သည်။
-
ဇွဲကပင်တောင်တက်လမ်းခုလတ်တွင် ပျောက်ဆုံးခဲ့သည့် လူငယ်တစ်ဦးအား တောင်ခြေတွင် အသက်ရှင်လျက်ပြန်လည်တွေ့ရှိ
-
သောင်ရင်းမြစ်ကို ဖြတ်ကာ မြန်မာဘက်မှ ထိုင်းဘက်သို့ ဝင်ရောက်လာသည့် နိုင်ငံခြားသား ၃၉ ဦးကို ထိုင်းတာဝန်ရှိသူများက နေရပ်ပြန်ပို့မည်ဟုဆို
-
နေပြည်တော် သပြေကုန်းအဝိုင်းအနီး ဆန္ဒပြသူများအား ပစ်ခတ်ဖြိုခွဲမှုတွင် ဒဏ်ရာရရှိသူများအနက် အမျိုးသမီးတစ်ဦးမှာ စိုးရိမ်ရသည့်အခြေအနေရှိ
-
နိုင်ငံ့ဝန်ထမ်းများ တာဝန်ထမ်းဆောင်မှုအပေါ် နည်းလမ်းအမျိုးမျိုးဖြင့် ခြိမ်းခြောက်လာမှုများကို ဖော်ထုတ် အရေးယူရမည် ဖြစ်ကြောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် ပြောကြား
-
မန္တလေးမြို့တွင် ဆန္ဒထုတ်ဖော်နေသူများအား ရဲတပ်ဖွဲ့က စတင်ဖမ်းဆီးရာ ယမန်နေ့ ညနေပိုင်းအထိ ဖမ်းဆီးခံရသူ ၇၀ ဝန်းကျင်ရှိခဲ့
