Top News

ရှမ်းပြည်နယ် ပအိုဝ်း​ကိုယ်ပိုင်အုပ်ချုပ်ခွင့်ရဒေသတည်ငြိမ်​အေးချမ်း​ရေးအား ထိခိုက်စေသည့် KNPP၊ KNDF အဖွဲ့များကို လုံခြုံရေးအရ လိုအပ်သည့်အ​ရေးယူ​ဆောင်ရွက်မှုများ ပြင်းပြင်းထန်ထန်ဆက်လက် ဆောင်ရွက်မည်ဖြစ်​ကြောင်း နိုင်ငံတော်စီမံအုပ်ချုပ်​ရေး​ကောင်စီ​ ​သတင်းထုတ်ပြန်ရေးအဖွဲ့ခေါင်းဆောင် ပြန်ကြားရေးဝန်ကြီးဌာန ဒုတိယဝန်ကြီး ဗိုလ်ချုပ်​ဇော်မင်းထွန်းကပြောကြားသည်။

ပင်လောင်းမြို့နယ်၊ နမ့်နိမ့်ရွာ ဘုန်းကြီးကျောင်းတွင် သံဃာသုံးပါးနှင့် ပြည်သူများအား တပ်မတော်က ကယား PDF ဟု စွပ်စွဲပြီး အစုလိုက်၊ အပြုံလိုက်ပစ်ခတ်သတ်ဖြတ်ခဲ့ကြောင်း မီဒီယာများတွင် ဖော်ပြမှုနှင့်ပတ်သက်၍ ​သတင်းထုတ်ပြန်ရေးအဖွဲ့၏ Viber Group တွင် မီဒီယာအချို့၏ မေးမြန်းမှုအပေါ် ပြန်လည်​ဖြေကြားရာတွင် ဗိုလ်ချုပ်ဇော်မင်းထွန်းက အထက်ပါအတိုင်းထည့်သွင်းပြောကြားခြင်းဖြစ်သည်။

“ကျွန်​တော်​ပြောချင်တာက​တော့ ပအိုဝ်း​ဒေသသည် အစဉ်အဆက်ငြိမ်းချမ်းလာတဲ့ ​ဒေသဖြစ်တဲ့အတွက် ​တောင်ပိုင်းမှာ ရှိတဲ့ KNPP၊ KNDF အဖွဲ့တွေအ​နေနဲ့ ပအိုဝ်း​ဒေသရဲ့တည်ငြိမ်​အေးချမ်း​ရေးကို ဖျက်စီးဖို့၊ ပြီးရင် အစိုးရနဲ့တပ်မ​တော်၊ ပြီးရင် ​ဒေသခံပအိုဝ်းပြည်သူလူထုအကြားမှာ ထင်​ယောင်ထင်မှားဖြစ်စေဖို့အတွက် ဒီသတင်း​​တွေကို ထုတ်လွှင့်နေခြင်းဖြစ်တယ်။ ပြစ်မှုကျူးလွန်ခဲ့သူ​ဟာ စစ်ရာဇဝတ်မှု ကျူးလွန်ခဲ့သူ​​တွေဟာ ဒီလူ​တွေပဲဖြစ်တယ်လို့ပြောချင်ပါတယ်။ ကျွန်တော်တို့ တပ်မ​တော်အ​နေနဲ့က​တော့ ပအိုဝ်း​ဒေသတည်ငြိမ်​အေးချမ်း​ရေးနဲ့ ပအိုဝ်းပြည်သူလူထုရဲ့အသက်အိုးအိမ်စည်းစိမ်ကို ထိခိုက်စေခဲ့တဲ့ KNPP၊ KNDF အဖွဲ့တွေကို ထပ်မံပြီး​တော့ လုံခြုံရေးအရလိုအပ်တဲ့ အ​ရေးယူ​​ဆောင်ရွက်မှု​တွေကို ပြင်းပြင်းထန်ထန် ဆက်လက်​ဆောင်ရွက်သွားမယ်လို့ပဲ ​ပြောချင်ပါတယ်” ဟု ဗိုလ်ချုပ်​​​ဇော်မင်းထွန်းက ​ပြောကြားသည်။

၂၀၂၃ ခုနှစ် မတ် ၁၁ ရက်တွင် KNDF နှင့် KNPP အဖွဲ့များသည် ပင်​လောင်းမြို့နယ်၊ နမ့်နိမ့်ရွာသို့ဝင်​ရောက်၍ ခြိမ်းခြောက်မှုများ ပြုလုပ်ခဲ့​ကြောင်း၊ ယင်းဖြစ်စဉ်နှင့်ပတ်သက်၍ တပ်မ​​တော်အ​နေဖြင့် ​​ဒေသခံပြည်သူ့စစ်များနှင့် ပူးပေါင်းပြီး နယ်​မြေလုံခြုံရေးဆောင်ရွက်ခဲ့ကြောင်း ဗိုလ်ချုပ်​​ဇော်မင်းထွန်းက ​ပြောကြားသည်။

ဗိုလ်ချုပ်​ဇော်မင်းထွန်းက “မတ်လ ၁၁ ရက်​နေ့ ၉ နာရီမှာ အဲ့ရွာနားရောက်တဲ့အခါမှာ KNDF၊ PDF၊ KNPP အဖွဲ့တွေက တပ်မ​တော်စစ်​ကြောင်း​တွေ၊ ​​ဒေသခံပြည်သူ့စစ်​တွေကို စတင်တိုက်ခိုက်ခဲ့တာရှိတယ်။ ​ချောင်း​မြောင်း ပစ်ခတ်ခဲ့တာရှိတယ်။ ဒါနဲ့ပတ်သက်ပြီး ကျွန်​တော်တို့တိုက်ပွဲဖြစ်ပွားခဲ့ပါတယ်။ ပြီးရင် ဒီအဖွဲ့တွေအ​​နေနဲ့ တည်ငြိမ်အေးချမ်းနေတဲ့ ပအိုဝ်းရွာတစ်ရွာဖြစ်တဲ့ နမ့်နိမ့်ကျေးရွာ၊ အဲကျေးရွာထဲကိုဝင်တယ်။ ဝင်ပြီး​တော့ ပစ်ခတ်ခဲ့တာမျိုးတွေရှိတယ်။ ကျွန်​တော်တို့ အနေနဲ့ ဒီအဖွဲ့တွေကို တိုက်ခိုက်ခဲ့ရတာမျိုးတွေရှိတယ်။ အဲဒီမှာ ကျွန်တော်တို့နောက်ပိုင်းမှာ အ​လောင်းလက်နက်တချို့ရရှိခဲ့တာရှိတယ်” ဟု ​ပြောကြားသည်။

မတ် ၁၁ ရက် ည​နေပိုင်းတွင်လည်း KNDF၊ KNPP အဖွဲ့များနှင့် တိုက်ပွဲများ ထပ်မံဖြစ်ပွားခဲ့ပြီး အဆိုပါဖြစ်စဉ်သည် ပအိုဝ်းဒေသ၏ ငြိမ်းချမ်း​နေမှု၊ ပအိုဝ်း​ဒေသ၏ ဖွံ့ဖြိုးတိုးတက်​နေမှုကို ဖျက်စီးရန်အတွက် ယင်းအဖွဲ့များက လာ​​ရောက်​ဆောင်ရွက်ခြင်းဖြစ်​ကြောင်း ဗိုလ်ချုပ်​ဇော်မင်းထွန်းက ​ပြောကြားသည်။

“ရည်ရွယ်ချက်နဲ့ဆောင်ရွက်တာဖြစ်တယ်။ ပြီးရင်လည်း တည်ငြိမ်​အေးချမ်း​နေတဲ့ ပအိုဝ်း​ဒေသခံ​တွေ၊ ပအိုဝ်းပြည်သူ့စစ်တွေ၊ ​ဒေသခံလုံခြုံရေးအဖွဲ့တွေနဲ့ တပ်မ​တော်ကြားထဲကို ထင်​ယောင်ထင်မှားဖြစ်​စေဖို့ လုပ်ဆောင်တာမျိုးဖြစ်တယ်။ ကျွန်​တော်တို့အ​နေန့်က KNDF၊ PDF၊ KNPP အဖွဲ့တွေကိုပဲ တိုက်ခိုက်ခဲ့တာဖြစ်တယ်” ဟု ​ဗိုလ်ချုပ်​ဇော်မင်းထွန်းက ​ပြောကြားသည်။

KNPP၊ KNDF အဖွဲ့များက ပင်လောင်းမြို့နယ်၊ နမ့်နိမ့်ရွာအတွင်း ဝင်​​ရောက်ပစ်ခတ်ခဲ့ခြင်း​ကြောင့် ရွာသူရွာသားအချို့ သေဆုံးခြင်း၊ ထိခိုက်ဒဏ်ရာရရှိခဲ့ခြင်းများကို ​တွေ့ရသလို ထွက်​​ပြေးတိမ်း​ရှောင်​နေသူများလည်းရှိ​ကြောင်း ဗိုလ်ချုပ်ဇော်မင်းထွန်းက ​ပြောကြားသည်။