Top News

အသင်း ၆၀ မှ ၈၀ အထိပါဝင်မည့် ဥရောပစူပါလိဂ်အစီအစဉ်သစ်မှာ ပြည်တွင်းလိဂ်ပြိုင်ပွဲများအတွက် ခြိမ်းခြောက်မှုဖြစ်ပြီး ထိပ်သီးအသင်းများ၏ အကျိုးစီးပွားအတွက်သာ ဖန်တီးထားခြင်းဖြစ်ကြောင်း လာလီဂါပြိုင်ပွဲက ကြေညာချက်ထုတ်ပြန်ခဲ့သည်။

A22 ဟုအမည်ရသည့် အားကစားစီမံခန့်ခွဲမှုကုမ္ပဏီက ဥရောပစူပါလိဂ်အစီအစဉ်သစ်ကို ကြာသပတေးနေ့ ညပိုင်းတွင် ထုတ်ပြန်ခဲ့ပြီး အသင်း ၆၀ မှ ၈၀ အထိပါဝင်သည့် လိဂ်ပြိုင်ပွဲလေးခု ကျင်းပမည်ဖြစ်ကြောင်း၊ ဥရောပစူပါလိဂ်တွင် အမြဲတမ်းပါဝင်ခွင့်ရ မည့်အသင်းမရှိဘဲ တစ်သင်းလျှင် အနည်းဆုံး ၁၄ ပွဲစီ ကစားရမည်ဖြစ်ကြောင်း ဖော်ပြထားသည်။ 

ဥရောပထိပ်သီးကလပ် ၁၂ သင်းပါဝင်သည့် စူပါလိဂ်အစီအစဉ်ကို ၂၀၂၁ ခုနှစ် ဧပြီတွင် စတင်ကြေညာစဉ် လိဂ်ပြိုင်ပွဲများ၊ ပရိသတ်များ၊ ကစားသမားများနှင့် နိုင်ငံရေးလောကမှ ထင်ရှားကျော်ကြားသူများ၏ ကန့်ကွက်မှုကြောင့် ရက်ပိုင်းအကြာမှာပင် အသင်း အများစု ပြန်လည်နုတ်ထွက်ခဲ့ကြပြီး ရီးယဲလ်မက်ဒရစ်၊ ဘာစီလိုနာနှင့် ဂျူဗင်တပ်စ်စသည့် သုံးသင်းသာ ဆက်လက်ကြိုးပမ်းနေခြင်းဖြစ်သည်။

ဥရောပစူပါလိဂ်အစီအစဉ်သစ်နှင့်ပတ်သက်၍ လာလီဂါပြိုင်ပွဲက "ယနေ့ စူပါလိဂ်စီစဉ်သူတွေက အခြေခံမူတွေ တင်ပြခဲ့ကြပြီး ဒါဟာ ပြည်တွင်းဘောလုံးပြိုင်ပွဲတွေအတွက် တိုက်ရိုက်ခြိမ်းခြောက်မှုဖြစ်တယ်လို့ မှတ်ယူပါတယ်။ ဒါ့အပြင် အဆိုပြုထားတဲ့ အုပ်ချုပ်မှုပုံစံက ဒီမိုကရေစီနည်းကျမဟုတ်ဘဲ အလယ်အလတ်နဲ့ အသင်းငယ်တွေကို ချန်ထားပြီး ချမ်းသာတဲ့အသင်းအချို့ကိုပဲ အခွင့်အာဏာနဲ့ ဆုံးဖြတ်ချက်တွေ ပေးထားပါတယ်။ စူပါလိဂ်စီစဉ်သူတွေက သူတို့အဆိုပြုထားတဲ့ ပြိုင်ပွဲဟာ ပွင့်လင်းမှုရှိတယ်ဆိုပေမဲ့ တကယ်တော့ သူတို့က ဥရောပဘောလုံးလောကကို ထိပ်သီးအသင်းကြီးတွေရဲ့ အကျိုးစီးပွားနဲ့ စီးပွားရေးအရ လုံခြုံမှုရှိရေးအတွက် ပြန်လည်ရေးဆွဲနေတာပါပဲ။ ဒီအစီအစဉ်က ၂၀၁၉ ခုနှစ်ကတည်းက တင်ပြထားပြီး လေ့လာသုံးသပ်မှုတွေ လုပ်ပြီးတော့ ငြင်းဆန်ထားပြီးသားပါ။ အဓိကအချက်ကတော့ စူပါလိဂ်ဟာ ပြည်တွင်းလိဂ်ပြိုင်ပွဲတွေအတွက် ဘေးအန္တရာယ်တစ်ခုပါပဲ။ KPMG (စာရင်းအင်းကုမ္ပဏီ) ရဲ့ အစီရင်ခံစာမှာ ဖော်ပြမှုအရ ဒါဟာ ဥရောပတစ်လွှားက အလယ်အလတ်နဲ့ အသင်းငယ်တွေကို နစ်မြုပ်သွားစေမှာဖြစ်ပြီး ဥရောပဘောလုံးလောကကို သေဆုံးစေမှာပါ" ဟု ကြေညာချက် ထုတ်ပြန်ခဲ့သည်။

A22 ၏ အမှုဆောင်ချုပ်ဖြစ်သူ ဘန်းရိန်းချက်ကမူ ဥရောပဘောလုံး၏ အခြေခံအုတ်မြစ်များမှာ ပြိုလဲသွားနိုင်သည့်အန္တရာယ်ရှိနေသဖြင့် အပြောင်းအလဲပြုလုပ်ရမည့် အချိန်ရောက်ပြီဖြစ်ကြောင်း သုံးသပ်ပြောကြားခဲ့သည်။