နယူးယောက်၏နာမည်ကျော် အဓိကဆွဲဆောင်မှုနေရာ တိုင်း(မ်)ရင်ပြင်အား တိုက်ခိုက်ရန် စီစဉ်မှုအတွက် ဘင်္ဂလားဒေ့ရှ်မှ ရွှေ့ပြောင်းအခြေချတစ်ဦးကို ဇွန် ၇ ရက်တွင် တရားစွဲခဲ့သည်။ နယူးယောက်စီးတီးကောလိပ်မှ ကျောင်းသားဖြစ်သော အာရှီကူအာလန် (၂၂ နှစ်) သည် သေနတ်နှင့်ဗုံးများ စုဆောင်းနေခဲ့ပြီး တိုင်း(မ်)ရင်ပြင်ကို အကြမ်းဖက်တိုက်ခိုက်ရန် ကြံစည်နေသည်ဟု ဖက်ဒရယ်ရှေ့နေများက ပြောကြားခဲ့သည်။
အာလန်သည် ရုပ်ဖျက်ထားသော စုံစမ်း စစ်ဆေးသူများထံမှ လက်နက်နှင့်ခဲယမ်းများ ဝယ်ယူရန် ကြိုးပမ်းခဲ့ပြီးနောက် တိုက်ခိုက်ရန်အတွက် အကောင်းဆုံးနေရာအဖြစ် မန်ဟက်တန်ခရိုင်ကို စောင့်ကြည့်နေခဲ့ကြောင်း တရားစွဲဆိုမှုများက ဖော်ပြခဲ့သည်။
အမှတ်စဉ်နံပါတ်များ ဖျောက်ဖျက်ထားသော ဆီမီးအော်တိုပစ္စတိုတစ်စုံဝယ်ယူရန် စီစဉ်နေစဉ် ဇွန် ၆ ရက်တွင် အာလန်အား ဖမ်းဆီးခဲ့ခြင်းဖြစ်သည်။ အာလန်သည် တိုက်ခိုက်မှုမဆောင်ရွက်မီ အမြင်ချို့ယွင်းမှုအတွက် မျက်စိခွဲစိတ်မှု ခံယူပြီး မျက်မှန်မတပ်ရရန် စီစဉ်ခဲ့ကြောင်းလည်း အစိုးရရှေ့နေများက ပြောကြားခဲ့သည်။ အမေရိကန်တွင် အမြဲတမ်းနေထိုင်ခွင့် ရရှိထားသော ဘင်္ဂလားဒေ့ရှ်ကျောင်းသားဖြစ်သူ အာလန် သည် ၂၀၁၈ သြဂုတ်လတွင် ရုပ်ဖျက်ထားသော အေးဂျင့်ကို ပထမဆုံး တွေ့ဆုံခဲ့ပြီးနောက် နယူးယောက်ကို ပစ်မှတ် ထားသည့် တိုက်ခိုက်မှုများအား စီစဉ်ခဲ့သည်ဟု စွဲချက်များက ဖော်ပြခဲ့သည်။
အာလန်သည် ၉/၁၁ တိုက်ခိုက်မှုကို သဘောတူကြောင်း လျှို့ဝှက်အေးဂျင့်ကို ပြောပြမိခဲ့ပြီး ယင်းတိုက်ခိုက်မှုသည် အလုံးစုံအောင်မြင်မှုဟု ပြောကြားခဲ့ကြောင်း စွဲချက်များက ဆိုသည်။
နယူးယောက် သို့မဟုတ် ၀ါရှင်တန်တွင် တိုက်ခိုက်မှုများဆောင်ရွက်ရန် အသေခံဗုံးခွဲ ဝတ်စုံအသုံးပြုရေးကိုလည်း အာလန်က အေးဂျင့်ကို ဆွေးနွေးခဲ့သည်။ သို့သော်လည်း နောက်ပိုင်းတွင် ရိုင်ဖယ် သို့မဟုတ် ပစ္စတို သေနတ်နှင့် လက်ပစ်ဗုံးများရှာကြရန် အာလန်က ဆုံးဖြတ်ခဲ့သည်။ ထို့နောက် ဇန်နဝါရီလတွင် လျှို့ဝှက်အေးဂျင့်သည် အာလန် နှင့်အတူ တိုင်း(မ်)ရင်ပြင်သို့ နှစ်ကြိမ်သွားခဲ့ကြောင်း၊ ထိုနေရာတွင် အာလန်သည် တိုက်ခိုက်ရန်အတွက် ဖြစ်နိုင်ခြေရှိသောနေရာများကို ဖုန်းနှင့်မှတ်တမ်းတင်ခဲ့ကြောင်း သိရသည်။ အာလန်သည် နောက်ပိုင်းတွင် လျှို့ ဝှက်အေးဂျင့်အား ရိုင်ဖယ်နှင့် အခြားလက်နက်များ ဝယ်ယူရေးအတွက် အကူအညီတောင်းခဲ့ပြီး ဂေးအမျိုးသားများကို ပစ်သတ်လိုကြောင်း ပြောကြားခဲ့သည်ဟု ဆိုသည်။
နယူးယောက်၏ ပြဇာတ်ရုံများရှိသည့် မန်ဟက်တန်ပလာဇာသည် ယခင်ကလည်း တိုက်ခိုက်မှုများအတွက် ပစ်မှတ်ဖြစ်ခဲ့သည်။ ၂၀၁၇ ခုနှစ်တွင် ရစ်ချက်ရိုဂျာဆိုသူအမျိုးသားသည် လူအုပ်ထဲကားနှင့်ဝင်တိုးခဲ့ပြီး အမျိုးသမီးတစ်ဦးကို သေဆုံးစေခဲ့သည်။ ရိုဂျာသည် အမေရိကန်စစ်ပြန်တစ်ဦးဖြစ်ပြီး ဂျီဟတ်လှုပ်ရှားမှုများနှင့် ဆက်နွှယ်မှု မရှိသူဟု ယူဆခံထားရသည်။
-
မန်စီးတီးတွင် အနာဂတ်လှုပ်ခတ်နေသည့် နည်းပြ ဂွါဒီယိုလာကို ကမ်းလှမ်းရန် PSG အသင်း စီစဉ်
-
လာလီဂါချန်ပီယံဆုမှာ မိမိတို့လက်ထဲရောက်နေပြီဟု ဘာစီလိုနာနောက်ခံလူ ယော်ဒီအယ်လ်ဘာ ပြောကြား
-
အသင်း ၆၀ မှ ၈၀ အထိပါဝင်မည့် ဥရောပစူပါလိဂ်အစီအစဉ်သစ်မှာ ပြည်တွင်းလိဂ်များအတွက်ခြိမ်းခြောက်မှုဖြစ်ပြီး ထိပ်သီးအသင်းများ၏ အကျိုးစီးပွားအတွက်သာဖြစ်ကြောင်း လာလီဂါထုတ်ပြန်
-
နွေရာသီတွင် အစ်ဆွစ်ချ်အသင်း ကစားသမားတစ်ဦးခေါ်ယူနိုင်ရန် ရှယ်ယာရှင်နှင့် စပွန်ဆာတစ်ဦးဖြစ်သူ နာမည်ကြီး အင်္ဂလိပ်ပေါ့ပ် အဆိုတော် အက်ဒ်ရှီးရန် ကူညီပေးခဲ့
-
ရန်ကုန်တိုင်းဒေသကြီးတွင် COVID-19 ကာကွယ်ရေး စည်းကမ်းများ လိုက်နာမှုရှိစေရေး တိုင်းအစိုးရအဖွဲ့က တင်းကျပ်စွာ ဆောင်ရွက်ပေးရန် ပြည်ထောင်စုဝန်ကြီး ပြောကြား
