Top News

မန်စီးတီးနည်းပြ ဂွါဒီယိုလာက အသင်းနှင့် ၂၀၂၇ ခုနှစ်အထိ (၂) နှစ်သက်တမ်းတိုးစာချုပ် ချုပ်ဆိုခဲ့ခြင်းမှာ ပြိုင်ပွဲစုံ (၄) ပွဲဆက်တိုက် ရှုံးနိမ့်ခဲ့ခြင်းကြောင့် ဖြစ်နိုင်သည်ဟု ပြောကြားခဲ့သည်။ 

အသက် (၅၃)နှစ်အရွယ်ရှိ နာမည်ကျော် စပိန်လူမျိုးနည်းပြ ဂွါဒီယိုလာသည် မန်စီးတီးအသင်းကို ၂၀၁၆ ခုနှစ်တွင် စတင်ကိုင်တွယ်ခဲ့ပြီး ပရီးမီးယားလိဂ် (၆) ကြိမ်၊ ချန်ပီယံလိဂ်ဖလား (၁) ကြိမ်အပါအဝင် ဆုဖလား (၆) လုံးအထိ ရယူပေးထားသည်။ 

မန်စီးတီးအသင်းနှင့် ချုပ်ဆိုထားသည့် ဂွါဒီယိုလာ၏ ယခင်စာချုပ်မှာ ယခုရာသီကုန်တွင် ကုန်ဆုံးမည်ဖြစ်ပြီး စာချုပ်သက်တမ်းကုန်ဆုံးချိန်တွင် အသင်းမှထွက်ခွာနိုင်ကြောင်း သုံးသပ်မှုများ ရှိခဲ့သည်။ 

သို့သော် မန်စီးတီးအသင်းသည် ယခုရာသီတွင် ဒဏ်ရာပြဿနာများနှင့် ကြုံတွေ့နေရပြီး ပြိုင်ပွဲစုံ (၄) ပွဲဆက်တိုက် ရှုံးနိမ့်ပြီးနောက် ဂွါဒီယိုလာသည် မန်စီးတီးအသင်းနှင့် (၂) နှစ်သက်တမ်းတိုးစာချုပ် ချုပ်ဆိုခဲ့ခြင်းဖြစ်သည်။ 

ဂွါဒီယိုလာက "အခုအချိန်မှာ အသင်းကနေ ကျွန်တော် ထွက်ခွာလို့ မရဘူးလို့ ထင်ပါတယ်။ (၄) ပွဲဆက် ရှုံးနိမ့်ခဲ့တာကြောင့် ကျွန်တော် မန်စီးတီးအသင်းနဲ့ စာချုပ်သက်တမ်းတိုးတာလည်း ဖြစ်နိုင်ပါတယ်။ ပြိုင်ပွဲစုံ (၄) ပွဲဆက် ရှုံးနိမ့်ပြီးနောက်မှာ ကျွန်တော်တို့အနေနဲ့ ပြန်တုံ့ပြန်ဖို့ ထိုက်တန်ပြီး အခြေအနေကို ပြောင်းပြန်လှန်ဖို့ ကြိုးစားရမှာပါ။ ကျွန်တော်တို့ အောင်မြင်မှုတွေ ဆက်ရနေဖို့ ထိုက်တန်တယ်လို့ ထင်ပါတယ်။ ဒီစကားကို ကျွန်တော် ဘဝမြင့်ပြီး ပြောနေတာ မဟုတ်ပါဘူး။ ဒါက အမှန်တရားမို့လို့ပါ"ဟု အသင်းဝက်ဘ်ဆိုက်သို့ ပြောကြားခဲ့သည်။ 

မန်စီးတီးအသင်းသည် လိဂ်ဖလားတွင် စပါးအသင်းကို ရှုံးနိမ့်ပြီးနောက် ပရီးမီးယားလိဂ်တွင် ဘရိုက်တန်၊ ချန်ပီယံလိဂ်တွင် စပို့တင်းလစ္စဘွန်း၊ ပရီးမီးယားလိဂ်တွင် ဘုန်းမောက်အသင်းတို့ကို ဆက်တိုက်ရှုံးနိမ့်ခဲ့ခြင်းဖြစ်သည်။ 

ယင်းကဲ့သို့ ပြိုင်ပွဲစုံ (၄) ပွဲဆက်တိုက် ရှုံးနိမ့်ခဲ့ခြင်းမှာ မန်စီးတီးအတွက် ၂၀၁၆ ခုနှစ်နောက်ပိုင်း ပထမဆုံးအကြိမ် ဖြစ်ခဲ့ပြီး အသင်းနည်းပြ ဂွါဒီယိုလာအတွက် သူ၏နည်းပြဘဝတစ်လျှောက် ပထမဆုံးအကြိမ်ဖြစ်ကြောင်း သိရသည်။ 

ဂွါဒီယိုလာက ၎င်းအနေဖြင့် မန်စီးတီးအသင်းကို အခက်အခဲများ ကျော်ဖြတ်နိုင်ရန်အတွက် ကူညီရန် ဆုံးဖြတ်ထားကြောင်းနှင့် အရင်ကကဲ့သို့ ခြေစွမ်းတည်ငြိမ်သည့်အသင်းဖြစ်အောင် ကြိုးစားသွားမည်ဖြစ်ကြောင်းလည်း ပြောကြားခဲ့သည်။ 

ထို့ပြင် ဂွါဒီယိုလာက မန်စီးတီးအသင်းကို ကုုိင်တွယ်ရခြင်းမှာ အဓိပ္ပာယ်များစွာ ရှိကြောင်းနှင့် မန်စီးတီးအသင်းတွင် သူ လိုချင်တဲ့ အရာအားလုံးကို ရနိုင်ကြောင်းလည်း ပြောကြားခဲ့သည်။