မြန်မာ့လွတ်လပ်ရေးဗိသုကာ ဗိုလ်ချုပ်အောင်ဆန်း၏ မွေးရပ်ဇာတိ မကွေးတိုင်းဒေသကြီးနတ်မောက်မြို့တွင် မြန်မာ-တရုတ်ပူး ပေါင်းဆက်ဆံရေးဗဟိုအသင်းက ဆောက်လုပ်လှူဒါန်းသည့်ဆေးရုံနှင့် ဗိုလ်ချုပ်အောင် ဆန်းပုံတူ ကျောက်ဆစ်ရုပ်တုကို နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ ပြည်ထောင်စုဝန်ကြီးများ၊ မကွေးတိုင်းဒေသကြီးအစိုးရအဖွဲ့ဝန်ကြီးချုပ်နှင့်မြန်မာနိုင်ငံဆိုင်ရာ တရုတ်နိုင်ငံသံအမတ်ကြီးတို့က မေ ၁၀ ရက်နံနက်ကဖွင့်လှစ်ခဲ့ကြောင်း သိရသည်။
အဆိုပါဆေးရုံနှင့် ဗိုလ်ချုပ်အောင်ဆန်း ရုပ်တုဖွင့်ပွဲသိုု့ နတ်မောက်၊ မြို့သစ်၊ မကွေးမြို့နယ်များအတွင်းရှိ ကျေးရွာများမှ ဒေသခံပြည်သူများစွာ လာရောက်ခဲ့ကြကြောင်း၊ ဆေးရုံနှင့်ဗိုလ်ချုပ်ရုပ်တုပေးအပ်ပွဲကိုလည်း တစ်ဆက်တည်းကျင်းပခဲ့ကြပြီး နိုင်ငံတော်၏အတိုင်ပင်ခံပုဂ္ဂိုလ်၊ တရုတ်နိုင်ငံသံအမတ်ကြီးနှင့် မကွေးတိုင်းဒေသကြီးအစိုးရအဖွဲ့ ဝန်ကြီးချုပ်တို့က အမှတ်တရစကားများ ပြောကြားခဲ့ကြကြောင်း သိရသည်။
အဆိုပါဆေးရုံသည် မြန်မာ-တရုတ် ပူးပေါင်းဆက်ဆံရေးအသင်းဗဟိုက ဆောက်လုပ်လှူဒါန်းသည့် ဒုုတိယမြောက်ဆေးရုံုံဖြစ်ပြီး ခုတင် ၅၀ ဆံ့ဆေးရုံဖြစ်ကြောင်း၊ ဆေးရုံရှေ့မျက်နှာစာတွင် မြန်မာနိုင်ငံ၏ လွတ်လပ်ရေးဗိသုကာ အမျိုးသားခေါင်းဆောင်ကြီး ဗိုလ်ချုပ်အောင်ဆန်း၏ပုံတူကျောက်ဆစ်ရုပ်တုကိုလည်း လှူဒါန်းခဲ့ပြီး ဆေးရုံနှင့်ရုပ်တုပေးအပ်ပွဲအခမ်းအနားကို တစ်ဆက်တည်း ကျင်းပခဲ့ကြောင်း သိရသည်။
“ကျန်းမာရေးကဏ္ဍဘက်မှာလည်း အစိုးရအဖွဲ့အနေနဲ့ တတ်နိုင်သမျှ ဆောင်ရွက်နေပါတယ်။ ဒါပေမဲ့ အစိုးရဘက်က ဘယ်လောက်ပဲ ကူညီနေနေ ကိုယ့်ကျန်းမာရေးအတွက် ကိုယ်ပိုင်စည်းနဲ့ကမ်းနဲ့နေမှ ကျန်းမာနိုင်မှာပါ။ ကျွန်မ ပြောလေ့ရှိပါတယ်။ ဆရာဝန်တွေ၊ ဆရာမတွေ၊ ဆေးဝါးကုသမှုတွေ ပေးနေသူတွေက အရန်သဘောမှာပဲရှိပါတယ်။ ကျွန်မတို့ရဲ့ မြို့သူမြို့သားများ၊ ပြည်သူပြည်သားများက ကိုယ့်ကျန်းမာရေးအတွက် ကိုယ်ပဲလုပ်ပေးနိုင်မယ်။ ကျွန်မတို့ ဆေးရုံတွေ ဆရာဝန်တွေ သူနာပြုဆရာမတွေက အထောက်အကူအဖြစ်နဲ့ပဲလုပ်ပေးနိုင်မယ်။ ဒါကြောင့်မို့လို့ ကိုယ့်ကျန်းမာရေးအတွက် ကိုယ်ဂရုစိုက်ပါ။ ကိုယ့်တစ်ဦးတစ်ယောက်အတွက်တင် မဟုတ်ဘူး။ အနာဂတ်အတွက်ပါ ဂရုစိုက်ပါ” ဟု နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က အဆိုပါအခမ်းအနားတွင် အမှာစကားပြောကြားစဉ် ထည့်သွင်းပြောကြားခဲ့သည်။
နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ဗိုလ်ချုပ်အောင်ဆန်း ပထမဆုံး ပညာဆည်းပူးခဲ့သည့် နတ်မောက်မြို့ ဒီပင်္ကရာကျောင်းတိုက်တွင် ငြိမ်းချမ်းရေးတံခွန်တိုင်နှင့် ခေါင်းလောင်းတော်တို့ကိုလည်း ရေစက်ချအလှူတော်မင်္ဂလာကျင်းပခဲ့ကြောင်း၊ နတ်မောက်မြို့ရှိ ဗိုလ်ချုပ်အောင်ဆန်းနေအိမ်ပြတိုက်သို့လည်း သွားရောက်လေ့လာခဲ့ကြောင်း၊ နတ်မောက်မြို့ ပြည်သူ့ဆေးရုံရှေ့တွင် တင်ပြစာလက်ခံဌာန ဖွင့်လှစ်ပေးခဲ့ပြီး တင်ပြစာပေါင်း ၃၀ ကျော် ရောက်ရှိခဲ့ကြောင်း သိရသည်။
ယင်းနောက် မေ ၁၀ ရက်မွန်းလွဲပိုင်းတွင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ကမ္ဘာ့အမွေအနှစ် စာရင်းဝင် ဗိဿနိုးမြို့ဟောင်းသို့ သွားရောက်လေ့လာခဲ့ကြောင်း သတင်းရရှိသည်။
နိုင်ငံတော်၏အတိုင်ပင်ခံပုဂ္ဂိုလ်သည် နတ်မောက်မြို့မှတစ်ဆင့် ဗိဿနိုးမြို့သို့သွားရောက်ခဲ့ပြီး ဗိဿနိုးမြို့ဟောင်းပြတိုက်အတွင်းရှိ ယဉ်ကျေးမှုအမွေအနှစ်များကို ကြည့်ရှုလေ့လာကာ မွန်းလွဲ ၃ နာရီခန့်တွင် ပြန်လည်ထွက်ခွာသွားကြောင်း သိရသည်။
ဗိဿနိုးမြို့ဟောင်းသည် မြန်မာနိုင်ငံရှိ ကမ္ဘာ့အမွေအနှစ်စာရင်းဝင်ပျူမြို့ဟောင်းသုံးမြို့အနက် အစောဆုံးမြို့ဟောင်းဖြစ်ပြီး လွန်ခဲ့သောနှစ်ပေါင်း ၁၀၀၀ ခန့်က တည်ရှိခဲ့သော မြို့တစ်မြို့ဖြစ်ကြောင်း သိရသည်။
ဗိုလ်ချုပ်အောင်ဆန်းရုပ်တု (ပုံသေး) ကို နိုင်ငံတော်၏အတိုင်ပင်ခံပုဂ္ဂိုလ်နှင့် တရုတ်သံအမတ်ကြီးတို့ ဖွင့်လှစ်စဉ်
-
နိုင်ငံပိုင်ငွေကြေး ခိုင်မာစေရန်အတွက် ပြည်တွင်း၌ ကျပ်ငွေသုံးစွဲရန် ညွှန်ကြားချက်အား လိုက်နာဆောင်ရွက်ခြင်းမရှိပါက မည်သို့အရေးယူမည်ကို ပြည်သူလူထုထံအသိပေး၍ ပညာပေးကာလတစ်ခု သတ်မှတ်ပြီး အကောင်အထည်ဖော်မည်ဟု ဗဟိုဘဏ်ဒုတိယဥက္ကဋ္ဌ ပြောကြား
-
ကလေးမြို့နည်းပညာတက္ကသိုလ် ကျောင်းသား ၁၀ ဦးက တန်ဖိုးနည်းပါးပြီး ဆိုလာစနစ်ဖြင့်မောင်းနှင်နိုင်သည့် လေးယောက်စီးကား တီထွင်
-
FDA သတ်မှတ်ချက်နှင့်မညီ လိုင်စင်မဲ့ထုတ်လုပ်နေသည့် သောက်ရေသန့်လုပ်ငန်းကိုးခုအား ထုတ်လုပ်မှုရပ်ဆိုင်း
-
အလုပ် ရမည်ဟုဆိုကာ ပွဲစားက မြန်မာလုပ်သား ၁၀၀ ခန့်ကို လိမ်လည်သဖြင့် ထိုင်းနိုင်ငံတွင် မြန်မာအလုပ်သမားများ ဆန္ဒပြ
-
၁၉၉၄ ခုနှစ်မှ ၂၀၂၂ ခုနှစ် ဧပြီလကုန်အထိ မြန်မာနိုင်ငံသားရင်းနှီးမြှုပ်နှံမှုလုပ်ငန်း ၁၈၆၇ ခုမှ ကျပ် ၂၂၇၈၄ ဘီလျံကျော် ရင်းနှီးမြှုပ်နှံရန်ခွင့်ပြုထားပြီး ကုန်ထုတ်လုပ်မှုလုပ်ငန်းကဏ္ဍမှ အများဆုံးဖြစ်
