သြစတြေးလျအမျိုးသားတက္ကသိုလ် (ANU) ၏ ကွန်ပျူတာစနစ်များအား ၂၀၁၈ ခုနှစ်နှောင်းပိုင်းတွင် တရားမဝင်ခိုးဝင်ခံရ ပြီးနောက် ၁၉ နှစ်စာ အချက်အလက်များ ခိုးယူခံရသည်ကို လွန်ခဲ့သည့်သီတင်းပတ် နှစ်ပတ်ကမှ စစ်ဆေးသိရှိခဲ့ကြောင်း ယင်းတက္ကသိုလ်က ဇွန် ၄ ရက်တွင် ကြေညာချက်ထုတ်ပြန်ခဲ့သည်။ ကျောင်းသားများ၏ အချက်အလက်များ၊ ဝန်ထမ်းများ၏ အချက်အလက်များ ပါဝင်သည့် အသေးစိတ်မှတ်တမ်းများအား ခိုးယူခံခဲ့ရခြင်းဖြစ်ပြီး လူ ၂၀၀၀၀၀ ခန့်၏ အချက်အလက်များ ပါသွားခဲ့ကြောင်း ANU ၏ ဒုတိယအဓိပတိ ဘရိုင်ယန်ရှမစ်က ပြောကြားခဲ့သည်။
တက္ကသိုလ်မှတ်တမ်းတွင် ထိန်းသိမ်းထားသော အမည်၊ နေရပ်လိပ်စာ၊ မွေးသက္ကရာဇ်၊ ဖုန်းနံပါတ်၊ အီးမေးလ်လိပ်စာ၊ အရေးပေါ်အဆက်အသွယ်အချက်အလက် အသေးစိတ်၊ အခွန်မှတ်ပုံတင်နံပါတ်များ၊ လစာဆိုင်ရာ သတင်းအချက်အလက်များ၊ ဘဏ်စာရင်းအသေးစိတ်များ၊ နိုင်ငံကူးလက်မှတ်မှတ်တမ်းများနှင့် ကျောင်းသားများ၏ ထူးချွန်မှုမှတ်တမ်းများ ခိုးဝင်ကြည့်ရှုခံခဲ့ရကြောင်း ၎င်းက ပြောကြားခဲ့သည်။ ခရက်ဒစ်ကတ် အချက်အလက်များ၊ ခရီးသွားမှတ်တမ်းများ၊ ကျန်းမာရေးမှတ်တမ်းများ၊ ရဲမှုခင်းဆိုင်ရာ စစ်ဆေးမှုများ၊ အလုပ်သမားများ၏ လျော်ကြေးဆိုင်ရာ သတင်းအချက်အလက်များ၊ ယာဉ်မှတ်ပုံတင်နံပါတ်များ၊ အခြားစွမ်းဆောင်ရည်မှတ်တမ်းများကို ခိုးဝင်နိုင်ခဲ့ခြင်း မရှိကြောင်းရှမစ်က ပြောကြားခဲ့သည်။
ယင်းခိုးဝင်မှုကို လွန်ခဲ့သည့် သီတင်းပတ်နှစ်ပတ်တွင် ANU က သိရှိခဲ့ပြီးနောက် နောက်တစ်ကြိမ် ဆိုက်ဘာတိုက်ခိုက်မှုများအား ကာကွယ်ရန် ဆောင်ရွက်ပြီးမှသာ အများပြည်သူသို့ ထုတ်ပြောခြင်းဖြစ်ကြောင်း ပါမောက္ခရှမစ်က ပြောကြားခဲ့သည်။ ယင်းဆိုက်ဘာတိုက်ခိုက်မှုသည် အဆင့်မြင့်သူတစ်ဦး၏ လက်ချက်ဖြစ်နိုင်ဖွယ်ရှိကြောင်း၊ ကွန်ရက်များ လုံခြုံရေးအတွက် ANU နှင့် ပူးပေါင်းဆောင်ရွက်နေကြောင်း၊ ယင်းချိုး ဖောက်မှုကိုလည်း အပြည့်အဝစုံစမ်းစစ်ဆေးသွားမည်ဖြစ်ကြောင်း သြစတြေးလျ ထောက်လှမ်းရေးအဖွဲ့ (ASD )က ပြောကြားခဲ့သည်။
ယခုနှစ်တိုက်ခိုက်မှုနှင့် အခြားဆိုက်ဘာလုံခြုံရေးကျိုးပေါက်မှုများကြားမှ ဆက်နွှယ်ချက်ကို ကောက်ချက်ချရန် စောလွန်းသေးကြောင်း ASD က ပြောကြားခဲ့သည်။သို့သော်လည်း ANU ကို တိုက်ခိုက်မှုသည် တရုတ်၏ လက်ချက်ဖြစ်နိုင်ကြောင်း သြစတြေးလျမဟာဗျူဟာ လေ့လာရေးဌာနမှ အကြီးတန်းလေ့လာသုံးသပ်သူ တွန်အူရန်က ပြောကြားခဲ့သည်။
ANU သည် ယမန်နှစ်ကလည်း အလားတူ ဆိုက်ဘာတိုက်ခိုက်မှုကို ကြုံခဲ့ရသည်။ ထိုစဉ်ကလည်း တရုတ်အခြေစိုက်ဟက်ကာများ၏ တိုက်ခိုက်မှုဖြစ်နိုင်ကြောင်း သြစတြေးလျမီဒီယာအချို့က ဖော်ပြခဲ့ကြသည်။ သို့သော်လည်း မည်သည့်ဆိုက်ဘာတိုက်ခိုက်မှုတွင်မှ ပါဝင်ခြင်းမရှိကြောင်း တရုတ်က အခိုင်အမာ ငြင်းဆိုထားသည်။
ANU ၏ သုတေသနများနှင့် ကျောင်းသားများ၊ ဝန်ထမ်းများ၏ သတင်းအချက်အလက်များသည် ဟက်ကာတိုက်ခိုက်မှုကို ဆွဲဆောင်နေကြောင်း ANU ၏ မဟာဗျူဟာနှင့် ကာကွယ်ရေးလေ့လာမှုစင်တာမှ ထောက်လှမ်းရေးလေ့လာမှုဆိုင်ရာ ပါမောက္ခ ဂျွန်ဘလက်လင်းက ပြောကြားခဲ့သည်။ ထိုကဲ့သို့ ကျယ်ပြန့်သည့် ဟက်ကာတိုက်ခိုက်မှုများကို ဆောင်ရွက်နိုင်သော နိုင်ငံအများအပြားရှိပြီး နိုင်ငံမဟုတ်သည့် အခြားသူများကလည်း ဆောင်ရွက်နိုင်ကြောင်း ဒေါက်တာ ဘလက်လင်းက ပြောကြားခဲ့သည်။
Ref ; AFP
-
Third Party မရှိမီ တည်ဆောက်ဆဲလုပ်ငန်းများ၏ အရည်အသွေးအား ဆိုင်ရာဝန်ကြီးများက တာဝန်ယူစစ်ဆေးမှုကို ဘီးလင်းမြို့နယ်တွင် စောင့်ကြည့်သွားမည်ဟုဆို
-
Eleven Media Group နှင့် စေတနာရှင်များပူးပေါင်း၍ သောက်သုံးရေရှားပါးနေသော ညောင်ဦးမြို့နယ် ပနီတွင်းကျေးရွာနှင့် ကံကျဲတဲတိုက်တို့မှ အိမ်ခြေ ၂၀၀ ကျော်အတွက် သောက်သုံးရေလှူဒါန်း
-
လျှပ်စစ်မီးပြတ်မှုများကြောင့် ရေတွန်းစက်များ ဟန်ချက်ညီစွာမမောင်းနှင်နိုင်သဖြင့် အချို့နေရာများ ရေဖိအားနည်းခြင်း၊ ရေပြတ်တောက်ခြင်းများဖြစ်ပေါ်လျက်ရှိကြောင်း ရန်ကုန်မြို့တော်ဝန် အသိပေးတောင်းပန်
-
ချောက်မြို့နယ်တွင် နှစ်ပေါင်း ၄၉ နှစ်အတွင်း အမြင့်ဆုံးအပူချိန် ၄၇ ဒသမ ၁ ဒီဂရီစင်တီဂရိတ်အထိ စံချိ်န်တင်ပူပြင်း
-
မြန်မာနိုင်ငံကြက်ခြေနီအသင်းမှ ရပ်ရွာလူထု ဘေးဒဏ်ကြံ့ကြံ့ခံနိုင်စွမ်း မြင့်မားရေးအစီအစဉ်ကို ၂၀၁၉ မှ ၂၀၂၅ ခုနှစ်အထိ ချမှတ်ဆောင်ရွက်နေဟုဆို
