ကမ္ဘာ့ကျန်းမာရေးအဖွဲ့(WHO) က ဥရောပတွင် မျောက်ကျောက်ရောဂါကူးစက်ပျံ့နှံ့မှုကို ကာကွယ်ရန်အတွက်အရေးပေါ်တုံ့ ပြန်ဆောင်ရွက်မှုများ ပြုလုပ်ရန် ဇူလိုင် ၁ရက် က တောင်းဆိုခဲ့ပြီး ဥရောပတွင်လွန်ခဲ့သည့် သီတင်းနှစ်ပတ်ကျော်က မျောက်ကျောက်ရောဂါ ဖြစ်ပွားသူသုံးဆမြင့်တက်လာခဲ့သည် ဟု ပြောကြားခဲ့သည်။
“ဒီနေ့(ဇူလိုင် ၁ ရက်)မှာတော့ကျွန်တော့်အနေနဲ့ ဥရောပတစ်ဝန်းမှာ ကူးစက်ပျံ့နှံ့နေတဲ့ မျောက်ကျောက်ရောဂါကို ကာကွယ်တားဆီးဖို့ ကြိုးပမ်းအားထုတ်မှုတွေကို ဆောင်ရွက်ကြဖို့အတွက် အစိုးရနဲ့ ပြည်သူ့အဖွဲ့အစည်းတွေကို အစွမ်းကုန်တောင်းဆိုချင်ပါတယ်”ဟု WHO ၏ ဥရောပဒေသဆိုင်ရာညွှန်ကြားရေးမှူး ဟန်းစ်ဟန်ရီကလော့က ပြောကြားခဲ့သည်။
“ကျွန်တော်တို့အနေနဲ့ ဒီရောဂါဆက်လက်ပျံ့နှံ့နေတာကို တားဆီးဖို့အတွက်ဆိုရင် အရေးတကြီးနဲ့ ပူးပေါင်းတုံ့ပြန်ဆောင်ရွက်မှုတွေဟာမရှိမဖြစ် အရေးပါပါတယ်”ဟု ၎င်းက ဆိုသည်။
မေလအစောပိုင်းကတည်းက မျောက်ကျောက်ရောဂါ ကူးစက်ဖြစ်ပွားလေ့ရှိသည့် အနောက်နှင့်ဗဟိုအာဖရိကနိုင်ငံအပြင်ဘက်တွင် ထိုရောဂါကူးစက်ပျံ့နှံ့လာခဲ့သည်။
ကမ္ဘာတစ်ဝန်းတွင် ယင်းရောဂါဓာတ်ခွဲအတည်ပြုလူနာပေါင်း ၉၉ ရာခိုင်နှုန်းသို့မဟုတ် လူနာ ၄,၅၀၀ သည် ဥရောပမှဖြစ်သည်ဟု ကလော့က ပြောကြားခဲ့သည်။
နိုင်ငံပေါင်း ၃၁ နိုင်ငံနဲ့ ဒေသများသည် လက်ရှိတွင် မျောက်ကျောက်ရောဂါကူးစက်ဖြစ်ပွားနေသည်ဟု ဆိုသည်။
ဥရောပသည် ယင်းရောဂါကူးစက်ပျံ့နှံ့ မှု၏ ဗဟိုချက်အဖြစ် ဆက်လက်တည်ရှိနေပြီး ကူးစက်မှုနှုန်း ဆက်လက်မြင့်တက်နိုင်ခြေရှိနေသည်ဟု ကလော့က ဆိုသည်။
WHO က ယင်းရောဂါအားနိုင်ငံတကာ ပြည်သူ့ကျန်းမာရေးအရေးပေါ်စိုးရိမ်မှုအဖြစ် မသတ်မှတ်ထားသေးသော်လည်းထိုရောဂါ၏အခြေအနေကို စိစစ်သုံးသပ်နေဆဲ ဖြစ်သည်ဟု ၎င်းကပြောကြားခဲ့သည်။
မျောက်ကျောက်ရောဂါကူးစက်မှုဖြစ်စဉ်အများစုသည် အမျိုးသားအချင်းချင်းလိင်ဆက်ဆံသည့် ငယ်ရွယ်သောအမျိုးသားများတွင် ဖြစ်ပွားကြောင်း လေ့လာတွေ့ရှိသည်ဟု WHO က ဆိုသည်။
WHO က ထိုရောဂါသည် လိင်ပိုင်းဆိုင်ရာ ကူးစက်ရောဂါဖြစ်နိုင်ခြေနှင့်ပတ်သက်၍ စုံစမ်းစစ်ဆေးနေသော်လည်း တစ်ဦးနှင့် တစ်ဦးအနီးကပ်ထိတွေ့မှုမှတစ်ဆင့်ကူးစက်ပျံ့နှံ့ခြင်းဖြစ်ကြောင်း ထုတ်ပြန်ထားသည်။
ယင်းရောဂါသည် ရေကျောက်နှင့်ဆင်တူသော်လည်း ရောဂါပြင်းထန်မှုနည်းပါးကာ ကိုယ်ခံအားနည်းသူများတွင် ဖြစ်နိုင်ခြေများသည်။ ယင်းရောဂါသည်တစ်ဦးနှင့်တစ်ဦးအနီးကပ်ထိတွေ့မှုမှ အဓိကကူးစက်ပျံ့နှံ့သည်။
မျောက်ကျောက်ရောဂါကူးစက်ခံရလျှင် စတင်ဖျားနာပြီး အနာဖေးများထွက်ပေါ်လာမှုနှင့်အတူ အဖုအပိမ့်များအဖြစ်သို့အလျင်အမြန် ပြောင်းလဲသွားသည်။ ယင်းရောဂါကူးစက်မှုအများစုသည် မပြင်းထန်သော်လည်းနှစ်ပတ်မှသုံးပတ်အထိ ကြာမြင့်နိုင်သည်။
လက်ရှိအချိန်အထိ ဗြိတိန်တွင်ယင်းရောဂါကူးစက်မှုအမြင့်ဆုံးဖြစ်ပြီး ကူးစက်ခံရသူပေါင်း ၁,၀၇၆ ဦးရှိကာ ဂျာမနီ(၈၃၈ဦး)၊ စပိန်(၇၃၆ဦး)၊ပေါ်တူဂီ(၃၆၅ဦး)နှင့်ပြင်သစ် (၃၅ဝဦး)ရှိသည်ဟု ဥရောပရောဂါကာကွယ်ရေးနှင့် ထိန်းချုပ်ရေးမှ ထုတ်ပြန်သည့်အချက်အလက်များတွင်ဖော်ပြထားသည်။
-
အင်းလေးကန် အရှေ့ဖက်ကမ်းရှိ Inle Princess Resort ဟိုတယ် မီးလောင်မှုဖြစ်ပွား
-
ဆရာ၊ ဆရာမများနှင့် ကျောင်းသား၊ ကျောင်းသူများ ပါဝင်သော တက္ကသိုလ်လေ့ကျင့်ရေးတပ်များ၏ မိုးရာသီစခန်းချ လေ့ကျင့်ရေး သင်တန်းဆင်းပွဲများကျင်းပ
-
တန်ဆောင်မုန်းလပြည့်ည ရန်ကုန်မြို့ ပြည်သူ့ရင်ပြင် စျေးရောင်းပွဲတော်နှင့် ဂီတပွဲတော်မြင်ကွင်းများ
-
ပြိုင်ဆိုင်မှုပြင်းထန်ဦးမယ့် ESM ခြေလှမ်းများ
-
ရေးမြို့၊ အောင်မင်္ဂလာရပ်ကွက်လုံးကျွတ် တန်ဆောင်တိုင်ဆွမ်းကြီးလောင်းပွဲနှင့် နိဗ္ဗာန်ဈေးအလှူပွဲ မြို့ခံပြည်သူများ၊ ဒေသခံပြည်သူများဖြင့် စည်ကား
