ရန်ကုန် လက်လီဈေးကွက်တွင် အာလူးတပိဿာ ကျပ် ၁၀ ,၀၀၀ နီးပါးအထိ မြင့်တက်လာကြောင်း အိမ်ရှင်မများထံမှ စုံစမ်းသိရှိရသည်။
ရန်ကုန် ဘုရင့်နောင်ကုန်စည်ဒိုင် ဈေးကွက်တွင် တရုတ်အာလူး တပိဿာ ၈,၀၀၀ ကျပ်၊ ရှမ်းပြည်နယ် အောင်ပန်းဒေသထွက် အာလူး တပိဿာအမြင့်ဆုံးဈေး ၆,၅၀၀ ကျပ်အထိ ဈေးရှိနေပြီး ရန်ကုန်၏ အဆင့်မြင့်ဆုံး ကုန်စိမ်းဈေးဖြစ်သည့် တညင်းကုန်းဈေး၌ပင် အာလူးဆိုဒ်အကြီး တစ်ပိဿာ လျင် (၁၀၀၀၀) ကျပ် ဈေးရှိကြောင်း သိရသည်။
ရေကြီးမှုမတိုင်ခင် စက်တင်ဘာလ ပထမပတ်တွင် တရုတ်အာလူး တစ်ပိဿာ (၅,၀၀၀) ကျပ်၊ အောင်ပန်းအာလူး တစ်ပိဿာအမြင့်ဆုံး (၃,၅၀၀) ကျပ်သာရှိခဲ့ခြင်းဖြစ်သည်။
” အာလူးဝင်တဲ့ဒေသတွေကရေကြီးတော့ မလာနိုင်ကြဘူး။ ပြီးတော့ စိုက်ခင်းတွေလည်း အကုန်ပျက်ကုန်တယ်ကြားတယ်။ ဈေးတတ်တာကလည်း ရေကြီးတာကြောင့်ပါတယ်။ အဓိကလမ်းပန်းဆက်သွယ်ရေးအခက်အခဲကြောင့်ဖြစ်တာ” ဟု ကုန်စုံဆိုင်ဖွင့်လှစ်ရောင်းချသူတစ်ဦးက ပေါ်ပြူလာနယူးစ်သို့ ပြောသည်။
မြန်မာနိုင်ငံတွင် စားနပ်ရိက္ခာသီးနှံ အာလူးကို တောင်ပေါ်၊ မြေပြန့်၌ တနှစ်ပတ်လုံး စိုက်ပျိုးနိုင်ပြီး ရှမ်းပြည်နယ်တွင် ၆၀ ရာခိုင်နှုန်းထိ အများဆုံး စိုက်ပျိုးကာ အောင်ပန်း၊ ပင်လောင်း၊ နောင်တရား၊ တီကျစ်၊ ပင်းတယ၊ ဟဲဟိုး စသည့်ဒေသများတွင် အဓိက စိုက်ပျိုးကြကြောင်း သိရသည်။
ယင်းဒေသများမှ ထွက်ရှိသည့် အာလူးများကို ရန်ကုန်အပါအဝင် ဒေသအနှံ့အပြားသို့ တင်ပို့ရောင်းချနေသော်လည်း ယခုအခါ ကားလမ်းများ ရေကျော်၍ လမ်း၊ တံတား ပျက်စီးမှုများလည်း ရှိခဲ့ခြင်းကြောင့် ကုန်စည်စီးဆင်းမှုပါ ယာယီရပ်တန့်သွားခဲ့ကာ ဈေးမြင့်တက်ခဲ့ခြင်းဖြစ်ကြောင်း သိရသည်။
-
အမြန်လမ်းတွင် ရေဘေးသင့်ဒေသသို့ သွားရောက်လှူဒါန်းသည့် အလှူကား(၁)စီး တိမ်းမှောက်မှု ထပ်မံဖြစ်ပွား
-
ပုဂံရှေးဟောင်းယဉ်ကျေးမှုနယ်မြေအတွင်း မိုးသည်းထန်စွာရွာသွန်းမှုကြောင့် သစ်ပင်လဲကျမှုများ ဆက်တိုက်ဖြစ်ပေါ်
-
ထိုင်းနိုင်ငံတွင် တန်းစီဝယ်ယူခဲ့ရသည့် iPhone 16S ကို ပထမဆုံးဝယ်ယူနိုင်ခဲ့သူမှာ မြန်မာအမျိုးသမီးတစ်ဦးဖြစ်
-
ဒညင်းကုန်းဂေါက်ကွင်းအနီးတွင် လမ်းဘေး၌ရပ်ထားသည့် လိုက်ထရပ်ယာဉ်အား ဘိလပ်မြေယာဉ်မှ တိုက်မိသဖြင့် ခြောက်ဦးဒဏ်ရာရရှိ
-
ပြည်နယ်အားကောင်းရေးမှ ပြည်ထောင်စုအားကောင်းရေးကို အခြေခံမူများနှင့်အညီ တည်ဆောက်မည်ဟု KNU ၊ KNPP ၊ CNF အပါအဝင် အဖွဲ့ကိုးဖွဲ့ထုတ်ပြန်
