မလေးရှားတွင် စွန့်ပစ်ပြာပုံပြိုကျကာ မီးလောင်ခံရသည့် မြန်မာလုပ်သားနှစ်ဦး သေဆုံးခဲ့ကြောင်း မလေးရှားအခြေစိုက် ဒါနကုသလအသင်းက ထုတ်ပြန်သည်။
ဖြစ်စဉ်မှာ ဇွန် ၂၆ ရက်တွင် ဖြစ်ပွားခဲ့ခြင်းဖြစ်ပြီး မြန်မာနိုင်ငံသား လေးဦး၊ ဘင်္ဂလားဒေ့ရှ်နိုင်ငံသား တစ်ဦးတို့မှာ လုပ်ငန်းခွင်အတွင်းရှိ စွန့်ပစ်ပြာပုံအား စုပုံနေစဉ် ပြာပုံမှာ ရုတ်တရက်ပြိုကျခဲ့ကြောင်း၊ ယင်းပြာပုံမှ ထွက်ရှိလာသော မီးလောင်မှုကြောင့် ဘင်္ဂလားဒေ့ရှ် နိုင်ငံသားနှင့် မြန်မာနိုင်ငံသားတစ်ဦးမှာ အခင်းဖြစ်နေရာတွင် သေဆုံးခဲ့ကြောင်း သိရသည်။
မီးလောင်ခံရသည့် ကျန်ရှိ မြန်မာလုပ်သားသုံးဦးမှာ ဆေးရုံတက်ရောက်ကုသနေစဉ် တစ်ဦးမှာ ထပ်မံသေဆုံးသွားခဲ့ကြောင်း၊ သေဆုံးခဲ့သူမှာ ဧရာဝတီတိုင်းဒေသကြီး ညောင်တုန်းမြို့နယ် ပါလှဲ့ကျေးရွာအုပ်စု၊ကွမ်းခြံကုန်းရွာဇာတိဖြစ်သော ကိုဖြိုးဝေထွဋ် (၃၀)နှစ် ဖြစ်ကြောင်း အဆိုပါအသင်း၏ ထုတ်ပြန်ချက်အရ သိရသည်။
ဇူလိုင် ၂၄ ရက် တနင်္ဂနွေနေ့တွင် ကွယ်လွန်သူ ကိုဖြိုးဝေထွဋ်၏ရုပ်ခန္ဒာအား စူဘာရမ်ဂျာယာ ဆေးရုံအအေးတိုက်မှ ထုတ်ယူသယ်ဆောင်၍ ဘာရပ်ပစ်သုသာန်သို့ သွားရောက်သင်္ဂြိုဟ်မည်ဖြစ်ကြောင်း သိရသည်။
ပြီးခဲ့သည့် ဇူလိုင် ၁၅ ရက်ကလည်း ပဲခူးတိုင်းဒေသကြီး ဖြူးမြို့နယ် ဇေယျဝတီရပ်ကွက် မြို့မ(၂) လမ်း ကျောင်းစု ဇာတိဖြစ်သော ကိုလွင်မိုးအောင် (၂၂နှစ်)သည် မလေးရှားနိုင်ငံ ကဒါ့ပြည်နယ် စူကိုင်းပသနီမြို့တွင် နေထိုင်အလုပ်လုပ်ကိုင်ရင်း ကြိုးဆွဲချ ကွယ်လွန်ခဲ့ကြောင်း သိရသည်။
