မြန်မာအမျိုးသားလေကြောင်းလိုင်း ခရီးစဉ်များတွင် ပျံသန်းရန် ပြင်သစ်နိုင်ငံ ATR ကုမ္ပဏီမှ ငှားရမ်းသည့် ATR 72-600 လေယာဉ်သစ်သည် ရန်ကုန်အပြည်ပြည်ဆိုင်ရာ လေဆိပ်သို့ ရောက်ရှိခဲ့ကြောင်း သတင်းရရှိသည်။
မြန်မာအမျိုးသားလေကြောင်းလိုင်း၏ ATR 72-600 XY –AML လေယာဉ်သစ်သည် နိုဝင်ဘာ ၃ ရက်က ပြင်သစ်နိုင်ငံ၊ Touluse မြို့မှ ရန်ကုန်မြို့သို့ စတင်ထွက်ခွာလာခဲ့ခြင်းဖြစ်ပြီး ရန်ကုန်မြို့သို့ နိုဝင်ဘာ ၆ ရက်က ရောက်ရှိခဲ့ခြင်းဖြစ်ကာ ယင်း လေယာဉ်သစ်အား ကြိုဆိုပွဲအခမ်းအနားအား နိုဝင်ဘာ ၆ ရက်က မြန်မာအမျိုးသားလေကြောင်းလိုင်း Hangar တွင် ကျင်းပခဲ့သည်။
အဆိုပါ ATR 72-600 XY – AML လေယာဉ်မှာ မြန်မာအမျိုးသားလေကြောင်း လိုင်း၏ ခုနစ်စီးမြောက် ATR 72-600 Series လေယာဉ်သစ်ဖြစ်ပြီး မကြာခင်အချိန်အတွင်း မြန်မာအမျိုးသားလေကြောင်းလိုင်း လက်ရှိပျံသန်းလျက်ရှိသော ပြည်တွင်း နှင့် ပြည်ပခရီးစဉ်များတွင် ပျံသန်းသွားမည် ဖြစ်ကြောင်း သိရသည်။
နိုင်ငံပိုင်မြန်မာအမျိုးသားလေကြောင်းလိုင်း၌ ATR 72-600 Series အမျိုးအစား ခြောက်စင်းရှိပြီး ယခု ရောက် ရှိသည့် ATR 72-600 Series လေယာဉ်သည် နောက်ဆုံးပေါ်အမျိုးအစား လေယာဉ်သစ်ဖြစ်ကြောင်း သိရသည်။
“ကျွန်တော်တို့ လေကြောင်းလိုင်းအနေနဲ့ ဒီလေယာဉ်ကိုငှားရမ်းဖို့ လွန်ခဲ့တဲ့ နှစ်နှစ်လောက်ကတည်းက စီစဉ်ခဲ့တာပါ။ ဝယ်ငှားစနစ်နဲ့ဝယ်ခဲ့တဲ့ လေယာဉ်တွေက ပြင်ဆင်စရိတ်ကြီးတယ်။ လေကြောင်းလိုင်းရဲ့ ခရီးသည်ရရှိမှုအနေအထားနဲ့ တွက်ချက်ပြီး အခုလို ငှားရမ်းဖို့စီစဉ်ခဲ့တာပါ။ ခုရောက်ရှိတဲ့ လေယာဉ်သစ်က စက်ရုံကနေ ကိုယ်လိုချင်တဲ့အနေအထားတွေကို ကြိုတင်ပြောပြပြီး ပြင်ဆင်ခဲ့တာပါ” ဟု မြန်မာအမျိုးသား လေကြောင်းလိုင်း၏ စီအီးအိုဖြစ်သူ ဦးသန်းထွန်းက ပြောပြခဲ့သည်။
ယခုရောက်ရှိလာသည့် ATR 72-600 XY – AML လေယာဉ်သစ်သည် နိုဝင်ဘာ ၃ ရက်က ပြင်သစ်နိုင်ငံ၊ Toulouse မြို့မှ ရန်ကုန်မြို့သို့ စတင် ထွက်ခွာလာခဲ့ခြင်းဖြစ် ပြီး ဂရိနိုင်ငံ၊ ယူအေအီးနိုင်ငံနှင့် အိန္ဒိယနိုင်ငံ တို့တွင် စုစုပေါင်းသုံးညအိပ်ရပ်နားခဲ့ပြီး ရန်ကုန်မြို့သို့ ပျံသန်းလာခဲ့ခြင်း ဖြစ်ကြောင်း သိရသည်။
“ကျွန်တော်တို့ ပြင်သစ်နိုင်ငံ၊ Toulouse မြို့ကနေ ဂရိနိုင်ငံ၊ အိုမန်နိုင်ငံနဲ့ အိန္ဒိယနိုင်ငံတို့မှ ညအိပ်ရပ်နားခဲ့ပြီးမှ ရန်ကုန်ကို ပျံသန်းလာခဲ့တာဖြစ်ပါတယ်။ စုစုပေါင်းသုံး ညအိပ်လေးရက်နဲ့ လေမိုင် ခြောက်ထောင် ကျော်ပျံသန်းလာခဲ့တာဖြစ်ပါတယ်” ဟု ATR 72-600 XY – AML လေယာဉ်အား ပြင်သစ်နိုင်ငံ Toulouse မြို့မှ ရန်ကုန်မြို့သို့ သယ်ယူမောင်းနှင်လာသည့် မြန်မာ အမျိုးသားလေကြောင်းလိုင်းမှ လေယာဉ်မှူး ဦးအောင်ကျော်ဇောက ပြောပြခဲ့သည်။
-
လာအိုမြောက်ပိုင်း၌ ရေကြီးမှုကြောင့် စာသင်ကျောင်းအချို့ပိတ်ထားရ
-
တရားမဝင်ကမ္ဘောဒီးယားရွှေ့ပြောင်းလုပ်သားများ ဘန်ကောက်၌ထိန်းသိမ်းခံရ
-
တယ်လီကွန်းလိ-မ်လည်မှုတရားခံ တရုတ် ၁၃၁ ဦးကို တရုတ်သို့လွှဲပြောင်းပေး
-
ကလောမြို့ သောက်သုံးရေလုံလောက်စွာပေးဝေနိုင်ရေး ရေအေးကန်ဆည် ကြံ့ခိုင်မှုရှိရန်နှင့် ရေစစ်ကန် ကောင်းမွန်စွာ လည်ပတ်နိုင်ရေး လုပ်ဆောင်
-
နေပြည်တော် – တပ်ကုန်း – ပင်လောင်း ဖိုင်ဘာကေဘယ်လ်ဆက်ကြောင်း ပုံမှန်ပြန်ဖြစ်စေရေး ဒုတိယဝန်ကြီး ဆွေးနွေး
