အိန္ဒိယနိုင်ငံ၊ အနောက်ဘင်္ဂလားပြည်နယ်ကုန်းတွင်းပိုင်းဒေသများတွင် ဖြစ်ပေါ်နေသော အားကောင်းသော မုန်တိုင်းငယ်သည် နောက် (၄၈)နာရီအတွင်း အားလျော့သွားနိုင်သောကြောင့် တိုင်းနှင့် ပြည်နယ် (၆)ခုတွင်သာ မိုးထစ်ချုန်းရွာနိုင်တော့မည်ဟု မိုးလေဝသနှင့် ဇလဗေဒညွှန်ကြားမှု ဦးစီးဌာနမှ စက်တင်ဘာ (၁၅) ရက် နံနက်ပိုင်းတွင် ထုတ်ပြန်အသိပေးထားသည်။
ယနေ့ စက်တင်ဘာ(၁၅)ရက် နံနက် (၅)နာရီခွဲအချိန် တိုင်းထွာချက်များအရ အိန္ဒိယနိုင်ငံ၊ အနောက် ဘင်္ဂလား ပြည်နယ်ကုန်းတွင်းပိုင်း ဒေသများတွင် ဖြစ်ပေါ်နေသည့် အားကောင်းသော မုန်တိုင်းငယ်(Deep Depression)သည် သိသိသာရွေ့လျားခြင်းမရှိဘဲ ဆက်လက် တည်ရှိနေကာ အနောက်ဘက်သို့ ဖြည်းညှင်းစွာ ရွေ့လျားနိုင်ပြီး၊ နောက် (၄၈) နာရီအတွင်း အိန္ဒိယနိုင်ငံ၊ ကုန်းတွင်းပိုင်းဒေသများကို ဆက်လက်ဖြတ်ကျော်နိုင်ကာ၊ မုန်တိုင်းငယ်(Depression)အဖြစ်သို့ အားလျော့သွားနိုင်သည်ဟု မိုး/ဇလမှ ခန့်မှန်းသည်။
အဆိုပါ အားကောင်းသောမုန်တိုင်းငယ်၏ အရှိန်ကြောင့် ယနေ့ စက်တင်ဘာ(၁၅)ရက် နံနက်မှ နောက်(၂၄) နာရီအတွင်း ချင်းပြည်နယ်နှင့် ရခိုင်ပြည်နယ်တို့တွင် နေရာအနှံ့အပြား မိုးထစ်ချုန်း ရွာပြီး၊ နေရာကွက်၍ မိုးကြီးနိုင်ကြောင်းနှင့် နေပြည်တော်၊ စစ်ကိုင်းတိုင်းဒေသကြီး၊ မန္တလေးတိုင်းဒေသကြီးနှင့် မကွေးတိုင်းဒေသကြီးတို့တွင် နေရာကျဲကျဲမှ နေရာစိပ်စိပ် မိုးထစ်ချုန်းရွာပြီး၊ မိုးသည်းထန်ခြင်းများ ဖြစ်ပေါ်နိုင်ကြောင်း ထုတ်ပြန်သည်။
မြစ်ဝကျွန်းပေါ်၊ ရခိုင်ကမ်းရိုးတန်း တလျှောက်နှင့် ကမ်းလွန်ပင်လယ်ပြင်တို့တွင် တစ်ခါတစ်ရံ မိုးသက်လေပြင်းများ ကျရောက်ပြီး လှိုင်းကြီးနိုင်ကာ မိုးသက်လေပြင်းကျစဉ် ရေ ပြင်/မြေပြင်လေသည် တစ်နာရီလျှင် ၃၅ မိုင်မှ မိုင် ၄၀အထိ တိုက်ခတ်နိုင်ကြောင်း သိရသည်။
ထို့ကြောင့် အားကောင်းသော မုန်တိုင်းငယ် အရှိန်ကြောင့် မိုးသည်းထန်စွာရွာသွန်းခြင်းနှင့်အတူ လေပြင်းတိုက်ခတ်ခြင်း၊ ရုတ်တရက်ရေကြီးခြင်းနှင့် မြေပြိုခြင်းစသည့် သဘာဝဘေးအန္တရာယ်များ ဖြစ်ပေါ်နိုင်သဖြင့် ကုန်းမြင့်ဒေအနီးတွင် နေထိုင်ကြသူများ မြေပြိုမှုအန္တရာယ်နှင့် မြစ်ငယ်၊ ချောင်းငယ်များ အနီးတွင် နေထိုင်ကြသူများ ရေကြီး၊ ရေလျှံမှုများကို ကြိုတင်သတိပြုနိုင်ရန် မိုး/ဇလမှ သတိပေးထားသည်။
ထို့ပြင် ပြည်တွင်းလေကြောင်းပျံသန်းရေး၊ မြစ်ဝကျွန်းပေါ်၊ ရခိုင်ကမ်းရိုးတန်းတစ်လျှောက်နှင့် ကမ်းလွန် ပင်လယ်ပြင်တို့ရှိ ကမ်းနီး၊ ကမ်းဝေးငါးဖမ်းရေယာဉ်များ၊ သင်္ဘောများအနေဖြင့်လည်း ကြိုတင်သတိပြုနိုင်ပါရန် အသိပေးထားသည်။
-
WHO က mpox အတွက် ပထမဆုံး ရောဂါစစ်ဆေးသည့်ကိရိယာကို အတည်ပြု
-
TNLA အဖွဲ့က အတင်းအဓမ္မ ဖမ်းဆီးခေါ်ဆောင်ခြင်းခံရသော နန်းမိုဟွမ်နှင့် ပတ်သက်၍ မည်သည့်သတင်းမျှ မကြားသေးကြောင်း မိသားစုဝင်တစ်ဦး ပြောကြား
-
အင်ဒိုနီးရှားနိုင်ငံက မြန်မာနိုင်ငံတွင် ဖြစ်ပွားနေသည့် ပဋိပက္ခနှင့်ပတ်သက်ပြီး အာဆီယံ၊ ဥရောပသမဂ္ဂ၊ ကုလသမဂ္ဂတို့၏ ကိုယ်စားလှယ်များနှင့် နစကအား အတိုက်အခံပြုလုပ်နေသည့်အုပ်စုများ တွေ့ဆုံပွဲကို လက်ခံကျင်းပ
-
စမ်းချောင်းတွင် ဆောက်လုပ်ရေး လုပ်ငန်းခွင်၌ အုတ်တံတိုင်းဖြိုချရာမှ လုပ်သားတစ်ဦး အုတ်တံတိုင်းပိမိခဲ့သည့်အတွက် ဆေးရုံသို့ ပို့ဆောင်ရ
-
ရေကြီးနစ်မြုပ်မှုကြောင့် မိုးစပါးသီးနှံ ထိခိုက်မှုရှိခဲ့သည့် စိုက်ခင်းများအတွက် တစ်ဧက ကျပ်တစ်သိန်းနှုန်းဖြင့် အတိုးမဲ့ ချေးပေးရန်လျာထား