ပုဂံညောင်ဦးဒေသတွင် နှစ်ပေါင်း ၆၀ အတွင်း မိုးရေစံချိန်သစ်တင်ခဲ့ပြီး ပုဂံရှေးဟောင်းစေတီအချို့၏ တံတိုင်းအချို့ ပြိုကျခဲ့ကြောင်း သိရသည်။
စက်တင်ဘာ ၁၂ ရက် ညောင်ဦးမြို့၊ မိုးလေဝသနှင့် ဇလဗေဒ ဌာန၏ တိုင်းတာချက်အရ မိုးရေချိန်မှာ ၈ ဒသမ ၅၁ လက်မရွာသွန်းခဲ့ခြင်းဖြစ်ပြီး စခန်းစတည်သည့် ၁၉၆၄ ခုနှစ်မှ နှစ်ပေါင်း ၆၀ အတွင်း အများဆုံးဖြစ်ကြောင်း မှတ်တမ်းများအရသိရသည်။
ညောင်ဦးမြို့၊ မိုးလေဝသနှင့် ဇလဗေဒရုံး ဦးစီးမှူး ဒေါ်ခင်လှနုက '' မိုးရေချိန်က မကြုံဖူး။ မမျှော်လင့်ဖူးတဲ့မိုးရေချိန်ပါ။ မိုခါတုန်းက မိုးရေချိန်အများဆုံးရက် ၆ လက်မကျော်ပဲရှိတယ်။တောင်တရုတ်က ရာဂိနှင့် မုတ်သုံလေအားကောင်းတာ တွေ့တယ်။ လေပွေလှိုင်းဖြစ်တယ်။ မိုးအလွန်ကြီးတာတွေ ဖြစ်တာပေါ့''ဟု ဆိုသည်။
မိုးကြီးမှုကြောင့် ၁၃ ရာစုလက်ရာ ဘုရားအမှတ် ၁၀၄၂ ဆင်က ဘုရား၊ ၁၂ ရာစု လက်ရာ ငှက်ပစ်တောင်ပေါ်ရှိ ဘုရားအမှတ် ၁၆၇ စေတီကြီးဘုရား၊ ဘုရားတံတိုင်း အစိတ်အပိုင်းအနည်းငယ်ပဲ့ကျခြင်း၊ ဘုရားအချို့ရေစိမ့်ခြင်းများ ရှိခဲ့သည်။
ရှေးဟောင်းဘုရား ထိန်းသိမ်းပြုပြင်ရေး နည်းပညာကျွမ်းကျင်သူ ဦးဇေမျိုးလင်းက ပြိုကျရသည့်အကြောင်းအရင်းမှာ ရေဝထားသည့် လက္ခဏာများ တွေ့ရကြောင်း၊ လေထုထဲတွင် ရေခိုးရေငွေ့ပါဝင်မှုများကြောင်း၊ လုံလောက်သည့် နေရောင်ချည်နှင့် အပူဓာတ်မရကြောင်း၊ ရေခိုးရေငွေကို နေပူသည့်အချိန်တွင် အငွေ့ပျံသွားအောင်မထုတ်နိုင်ကြောင်း၊ မြေသားအင်္ဂတေ၏ တွယ်ကပ်၊ တွယ်ကုပ်နိုင်စွမ်းအား မရှိတော့ခြင်း အစရှိသည်တို့ကြောင့် ပြိုကျခြင်းဖြစ်ကြောင်း ၎င်း၏ လူမှုကွန်ရက်စာမျက်နှာတွင် သုံးသပ်ထားသည်။
ပုဂံဘုရားနံရံဆေးရေး ပန်းချီထိန်းသိမ်းရေးတွင် ပါဝင်နေသူ တစ်ဦးက လက်ရှိတွင် ထိခိုက်နေသည့် နံရံဆေးရေးဘုရားများ မတွေ့သေးကြောင်း၊ရှေးဟောင်း ဘုရားငါးဆူတွင် ရေစိမ့်ဝင်မှုများ တွေ့ခဲ့ရကြောင်း ဆိုသည်။
ပုဂံဒေသတွင် ၂၀၂၃ ခုနှစ် မိုခါမုန်တိုင်းတွင် မိုးကြီးမှု၊ရေလွှမ်းဒဏ်ခံရမှုကြောင့် ပြုပြင်ခဲ့သည့် ရှေးဟောင်းရေကန်အားလုံးမှာလည်း ရေပြည့်သွားကြောင်း၊ သစ်ပင်ကြီးများ ပြိုလဲမှုကို ရှင်းလင်းခဲ့ကြောင်း၊ ထိခိုက်မှုကြီးကြီးမားမား မရှိခဲ့ကြောင်း ညောင်ဦးမီးသတ်ဌာနက ဆိုသည်။
ညောင်ဦး မိုးဇလရုံး၏ မှတ်တမ်းများအရ ၁၉၉၄ ခုနှစ်မှ ၂၀၀၃ ခုနှစ်အထိ ဆယ်နှစ်တာကာလအတွင်း မိုးရေချိန် ၃ လက်မအထက် (မိုးသည်းထန်)ရွာသွန်းမှုမှ နှစ်ကြိမ်သာရှိခဲ့ပြီး ၂၀၀၄ ခုနှစ်မှ ၂၀၁၃ ခုနှစ် ဒုတိယဆယ်နှစ်ကာလတွင်၂၄ နာရီအတွင်း ၃ လက်မအထက်ရွာသွန်းမှု ခြောက်ကြိမ်အထိ တိုးလာခဲ့သည်။
-
ကာမလိမ်လည်မှုဖြင့် တရားစွဲဆိုခံရသည့် သရုပ်ဆောင် ဝေဠုကျော်အား တရားရုံးက ကျပ်သိန်း ၅၀ ခံဝန်ဖြင့် အာမခံပေးခဲ့ပြီး အမှန်အတိုင်း ဆက်လက်ရင်ဆိုင်သွားမည်ဟု ဝေဠုကျော် ပြောကြား
-
ရွှေတိဂုံ စေတီတော်မြတ်ကြီးကို လုံးတော်ပြည့် ရွှေပြားသင်္ကန်းအသစ် ကပ်လှူခြင်း ၇၅ ရာခိုင်နှုန်း ပြီးစီးနေပြီဖြစ်ပြီး ဖေဖော်ဝါရီလကုန်တွင် လုပ်ငန်းပြီးစီးရန် ခန့်မှန်း
-
ဆေးရွက်ကြီး သုံးစွဲမှုကြောင့် ဖြစ်ပွားသည့် ကင်ဆာ၊ နှလုံး၊ သွေးတိုးနှင့် အသက်ရှူလမ်းကြောင်းဆိုင်ရာ ရောဂါများကြောင့် နှစ်စဉ် လူခြောက်သောင်းကျော် သေဆုံးနေ
-
ကိုယ်ဝန်ဆောင် မိခင်နှင့် နှစ်နှစ်ကလေးအထိ နိုင်ငံတော်၏ ငွေကြေးထောက်ပံ့မှု အစီအစဉ် ချင်း၊ ရခိုင်နှင့် နာဂဒေသ၌ စတင်နေပြီး ကယား၊ ကရင်၊ ဧရာဝတီနှင့် ရှမ်းဒေသတို့၌ တိုးချဲ့ဆောင်ရွက်မည်
-
မြောက်ဒဂုံတွင် တက္ကစီတစ်စီး ဘီးပေါက်ကာ ကား(၃)စီး ဆင့်တိုက်မှုဖြစ်ပွားပြီး လူ(၃)ဦး ဒဏ်ရာရ