ဆေးရွက်ကြီး သုံးစွဲမှုကြောင့် ဖြစ်ရသော ရောဂါများဖြစ်သည့် ကင်ဆာ၊ နှလုံး၊ သွေးကြောဆိုင်ရာ ရောဂါများ၊ သွေးတိုးနှင့် အသက်ရှူလမ်းကြောင်းဆိုင်ရာ ရောဂါများကြောင့် မြန်မာနိုင်ငံတွင် နှစ်စဉ် လူခြောက်သောင်းကျော် သေဆုံးနေရကြောင်း ရန်ကုန်မြို့တော် စည်ပင်သာယာရေးကော်မတီ မြို့တော်ဝန် ဦးမောင်မောင်စိုးက ပြောကြားသည်။ “ဆေးရွက်နဲ့ ဆေးရွက်ကြီးထွက် ပစ္စည်းတွေ ပါဝင်တဲ့ ကွမ်းယာစားသုံးတဲ့အတွက်ကြောင့် ကမ္ဘာပေါ်မှာ နှစ်စဉ်ခုနစ်သန်းကျော် သေဆုံးနေကြရတယ်။ မြန်မာနိုင်ငံ အနေနဲ့ကတော့ စစ်တမ်းတွေအရ နှစ်စဉ် လူပေါင်းခြောက်သောင်းကျော်က ဆေးရွက်ကြီး သုံးစွဲမှုကြောင့် ဖြစ်ရတဲ့ ရောဂါတွေ ကင်ဆာ၊ နှလုံး၊ သွေးတိုး၊ အသက်ရှူလမ်းကြောင်းဆိုင်ရာ စတဲ့ရောဂါတွေကြောင့် သေဆုံးနေကြရတယ်” ဟု ၎င်းက ပြောကြားသည်။
ဆေးရွက်ကြီး သုံးစွဲမှုကြောင့် ကမ္ဘာပေါ်တွင် နှစ်စဉ်နှစ်တိုင်း လူသားပေါင်း ခုနစ်သန်းကျော် သေဆုံးနေပြီး ဆေးရွက်ကြီး သုံးစွဲခြင်း (ဆေးလိပ်နှင့် ဆေးရွက်ကြီး ပစ္စည်းများ သောက်သုံးခြင်းကြောင့်) လူသားပေါင်း ခြောက်သန်းကျော် တိုက်ရိုက်ဆက်နွှယ် သေဆုံးကြရပြီး ကျန်တစ်သန်းခန့်သည် တိုက်ရိုက်မဟုတ်သော ဆေးရွက်ကြီး သုံးစွဲခြင်းကြောင့် သေဆုံးကြရပြီး ဆေးလိပ်သောက်သုံးသူများ၏ လူဦးရေ ထက်ဝက်ကျော်မှာ စီးကရက် အမြဲသောက်ခြင်းကြောင့် သေဆုံးကြရခြင်းဖြစ်ကြောင်း သိရသည်။
၂၀၁၄ ခုနှစ်တွင် မြန်မာနိုင်ငံ၌ အရွယ်ရောက်ပြီးသူများ (အသက် ၁၅ နှစ်နှင့်အထက်) အမျိုးသား (၄၃ ဒသမ ၈ ရာခိုင်နှုန်း ) နှင့်အမျိုးသမီး (၈ ဒသမ ၄ ရာခိုင်နှုန်း) တို့သည် ဆေးရွက်ကြီး သုံးစွဲသူများဖြစ်ကြောင်းနှင့် အမျိုးသား (၆၂ ဒသမ ၂ ရာခိုင်နှုန်း) နှင့် အမျိုးသမီး (၂၄ ဒသမ ၁ ရာခိုင်နှုန်း) သည် ဆေးရွက်ကြီးပစ္စည်းများ သုံးစွဲခြင်း (ကွမ်းယာစားခြင်း) ပြုလုပ်ကြောင်း၊၂၀၁၆ ခုနှစ် စာရင်းများအရ၊ အသက်ငယ်ရွယ်သူ လူငယ်များ (အသက် ၁၃ နှစ်မှ ၁၅ နှစ်ကြားရှိသူများ) ယောကျ်ားလေး ၂၁ ရာခိုင်နှုန်းနှင့် မိန်းကလေး ၂ ရာခိုင်နှုန်းတို့သည် ဆေးလိပ်သောက်သုံးပြီး ယောကျ်ားလေး ၁၁ ရာခိုင်နှုန်းနှင့် မိန်းကလေး ၂ ရာခိုင်နှုန်းတို့သည် ကွမ်းယာစားကြောင်း သိရသည်။
ကမ္ဘာ့ကျန်းမာရေးအဖွဲ့ အရှေ့တောင်အာရှ ဒေသတွင် ဆေးလိပ်သောက်သုံးသူပေါင်း ၂၄၆ သန်းခန့်ရှိပြီး ဆေးရွက်ကြီးထွက် ပစ္စည်းများ သုံးစွဲခြင်း (ကွမ်းယာစားခြင်း) ပြုလုပ်သူပေါင်း သန်း ၂၉၀ ရှိကြောင်း သိရသည်။ ဆေးရွက်ကြီးသုံးစွဲမှု ပျံ့နှံ့နေခြင်းကို ရပ်ဆိုင်းရန် မလုပ်ဆောင်ပါက ၂၀၃၀ ပြည့်နှစ် အရောက်တွင် သေဆုံးသူဦးရေမှာ (၈ ဒသမ ၃) သန်းအထိ ရှိလာမည်ဖြစ်ပြီး သေဆုံးသူဦးရေ၏ ရာခိုင်နှုန်း ၈၀ ကျော်သည် ဝင်ငွေ နည်းပါး (သို့မဟုတ်) အသင့်အတင့်ရှိသော နိုင်ငံများတွင် ရှိနေကြောင်း သိရသည်။
လူအများ၏ ကျန်းမာရေးကို ကြီးမားစွာ ထိခိုက်စေသော ဆေးလိပ်ငွေ့ ကင်းစင်ရေးအတွက် အလေးထား ဆောင်ရွက်ရမည်ဖြစ်ကြောင်းနှင့် ရန်ကုန်တိုင်းဒေသကြီး ဆေးလိပ်ငွေ့ ကင်းစင်ရေးအတွက် စတင်အကောင်အထည်ဖော်ရေးအတွက် ၂၀၁၆ ခုနှစ်ကစပြီး ပညာပေးမှုများ၊ ဟောပြောပွဲများ၊ သင်တန်းများ စသည်ဖြင့် ကြိုတင်ပြင်ဆင်မှုများကို ဆောင်ရွက်ခဲ့ကြောင်း ၎င်းက ပြောကြားသည်။
-
ကာမလိမ်လည်မှုဖြင့် တရားစွဲဆိုခံရသည့် သရုပ်ဆောင် ဝေဠုကျော်အား တရားရုံးက ကျပ်သိန်း ၅၀ ခံဝန်ဖြင့် အာမခံပေးခဲ့ပြီး အမှန်အတိုင်း ဆက်လက်ရင်ဆိုင်သွားမည်ဟု ဝေဠုကျော် ပြောကြား
-
ရွှေတိဂုံ စေတီတော်မြတ်ကြီးကို လုံးတော်ပြည့် ရွှေပြားသင်္ကန်းအသစ် ကပ်လှူခြင်း ၇၅ ရာခိုင်နှုန်း ပြီးစီးနေပြီဖြစ်ပြီး ဖေဖော်ဝါရီလကုန်တွင် လုပ်ငန်းပြီးစီးရန် ခန့်မှန်း
-
ဆေးရွက်ကြီး သုံးစွဲမှုကြောင့် ဖြစ်ပွားသည့် ကင်ဆာ၊ နှလုံး၊ သွေးတိုးနှင့် အသက်ရှူလမ်းကြောင်းဆိုင်ရာ ရောဂါများကြောင့် နှစ်စဉ် လူခြောက်သောင်းကျော် သေဆုံးနေ
-
ကိုယ်ဝန်ဆောင် မိခင်နှင့် နှစ်နှစ်ကလေးအထိ နိုင်ငံတော်၏ ငွေကြေးထောက်ပံ့မှု အစီအစဉ် ချင်း၊ ရခိုင်နှင့် နာဂဒေသ၌ စတင်နေပြီး ကယား၊ ကရင်၊ ဧရာဝတီနှင့် ရှမ်းဒေသတို့၌ တိုးချဲ့ဆောင်ရွက်မည်
-
မြောက်ဒဂုံတွင် တက္ကစီတစ်စီး ဘီးပေါက်ကာ ကား(၃)စီး ဆင့်တိုက်မှုဖြစ်ပွားပြီး လူ(၃)ဦး ဒဏ်ရာရ
