ရွှေတိဂုံ စေတီတော်မြတ်ကြီးကို လုံးတော်ပြည့် ရွှေပြားသင်္ကန်းအသစ် ကပ်လှူခြင်း ၇၅ ရာခှိုင်နှုန်း ပြီးစီးပြီဖြစ်ကြောင်း ရွှေတိဂုံ စေတီတော် ဂေါပကအဖွဲ့မှ ဇန်နဝါရီ ၂၂ ရက်တွင် စုံစမ်းသိရသည်။ စေတီတော်မြတ်ကြီး၏ ကြာမှောက်၊ ကြာလှန် ဧရိယာရှိ ရွှေရောင်မှေးမှိန် ညိုမည်းလာခြင်းကြောင့် ရွှေပြားသင်္ကန်းအသစ် ဆက်ကပ်လှူဒါန်းမှု လုပ်ငန်းများကို ၂၀၁၈ ခုနှစ် နိုဝင်ဘာ ၁ ရက်တွင် စတင်ခဲ့ပြီး ၂၀၁၉ ခုနှစ် ဖေဖော်ဝါရီလကုန်တွင် လုပ်ငန်းပြီးစီးရန် ခန့်မှန်းထားကြောင်း သိရသည်။
ရွှေတိဂုံ စေတီတော် ဂေါပကအဖွဲ့ရုံး အဖွဲ့မှူး ဦးထွန်းအောင်ငွေက “ရွှေတိဂုံ စေတီတော်ကြီး ၇၅ ရာခိုင်နှုန်း ပြီးစီးပါပြီ။ ဖေဖော်ဝါရီ ၂၈ ပြီးစီးပါမယ်လို့ ခန့်မှန်းပါတယ်” ဟု ပြောကြားသည်။ ၂၀၁၈ -၁၉ ခုနှစ် ရွှေပြားသင်္ကန်း ဆက်ကပ်ခြင်းတွင် အလှူရှင်များ လှူဒါန်းထားသော ရွှေပြားသင်္ကန်းတော်များကို ရထားပျံဖြင့် စေတီတော် ကိုယ်လုံးတော်ပေါ်သို့ ကိုယ်တိုင်လှူဒါန်းနိုင်ရန်နှင့် တစ်ရက်လျှင် အလှူရှင် ၁၅၀ ဦးစီဖြင့် ကပ်လှူနိုင်ရန် စီစဉ်ဆောင်ရွက်ထားကြောင်း သိရသည်။
ရွှေတိဂုံ စေတီတော်၏ ကိုယ်လုံးတော် ကြံ့ခိုင်မှု စစ်ဆေးခြင်း၊ ရွှေပြားသင်္ကန်းအသစ် ကပ်လှူပူဇော်ခြင်းများ ဆောင်ရွက်ရန်အတွက် စေတီတော်ငြမ်းဆင်ခြင်းကို စက်တင်ဘာ ၁၇ ရက်တွင် စတင်ဆောင်ရွက်ခဲ့ကြောင်း သိရသည်။ ရန်ကုန်မြို့ရှိ ရွှေတိဂုံ စေတီတော်မြတ်ကြီး၏ ကိုယ်လုံးတော် ကြာမှောက်၊ ကြာလှန် ဧရိယာရှိ ရွှေစင်ပြား (Gold Coating) များ ၂၀၁၈ ခုနှစ်တွင် ရွှေရောင်မှေးမှိန် ညိုမည်းလာရာ ပြည်သူများအကြား ဝေဖန်မှု ရှိခဲ့သဖြင့် သာသနာရေးနှင့် ယဉ်ကျေးမှု ဝန်ကြီးဌာနက ရွှေသင်္ကန်းတော်အသစ် ကပ်လှူပူဇော်ရေးကို တစ်နှစ်စော၍ လုပ်ဆောင်ခဲ့ကြောင်း သိရသည်။ ရွှေတိဂုံ စေတီတော် ရွှေသင်္ကန်းကပ်လှူ ပူဇော်ခြင်းကို ပုံမှန်အားဖြင့် ငါးနှစ်တစ်ကြိမ် ပြုလုပ်ခြင်းဖြစ်ပြီး နောက်ဆုံးအကြိမ် ကပ်လှူခြင်းမှာ ၂၀၁၄-၂၀၁၅ ခုနှစ်တွင် ဖြစ်သည်။
ရွှေတိဂုံ စေတီတော်ကြီးတွင် ကပ်လှူထားသော ရွှေစင်ပြား(Gold Coating) များကို ၂၀၀၈ -၂၀၀၉ ခုနှစ် စတင်ကပ်လှူခဲ့ပြီး ညိုမည်းလာမှုများကြောင့် သာသနာရေးနှင့် ယဉ်ကျေးမှု ဝန်ကြီးဌာနက ပြည်သူများနှင့် အလှူရှင်များက ရွှေသင်္ကန်း ကပ်လှူခြင်းကို ရွှေစင်ရွှေပြား အစစ်ဖြင့်သာ ကပ်လှူလိုသဖြင့် ရွှေစင်ပြား (Gold Coating) များ ဆက်လက်ဆောင်ရွက်ခြင်း မပြုရန် ၊ ရွှေတိဂုံစေတီတော်၌ ငှက်ပျောဖူးတော် အောက်ပိုင်း၊ ကြာရင့်၊ ကြာလှန်၊ ရွဲ ၊ ကြာနု၊ ကြာမှောက်၊ ဖောင်းရစ် (ဖောင်းလုံး)၊ ပန်းဆွဲ၊ သပိတ်မှောက်၊ ရင်စည်း(ခါးစည်း) ၊ခေါင်းလောင်း၊ ခေါင်းလောင်းနား၊ ကျည်းဝန်း(ကျည်းခွေ)၊ ရှစ်မြှောင့်အထိ ရွှေပြားကြိတ်စက်ရုံမှ ထုတ်လုပ်သော ရွှေပြား (Gold Plate) များဖြင့် ရနိုင်သရွေ့ ကပ်လှူပူဇော်ရန် ၊ ရွှေပြား (Gold Plate) ရွှေသင်္ကန်းတော် မကပ်နိုင်သည့် ဧရိယာများအား ရွှေမျက်ပါး၊ ရွှေဆိုင်း၊ ရွှေသင်္ကန်းတော်သာ ကပ်လှူပူဇော်ရန် ၂၀၁၈ ခုနှစ် စက်တင်ဘာ ၁၃ ရက်တွင် သတင်းထုတ်ပြန်ခဲ့သည်။
-
ကာမလိမ်လည်မှုဖြင့် တရားစွဲဆိုခံရသည့် သရုပ်ဆောင် ဝေဠုကျော်အား တရားရုံးက ကျပ်သိန်း ၅၀ ခံဝန်ဖြင့် အာမခံပေးခဲ့ပြီး အမှန်အတိုင်း ဆက်လက်ရင်ဆိုင်သွားမည်ဟု ဝေဠုကျော် ပြောကြား
-
ရွှေတိဂုံ စေတီတော်မြတ်ကြီးကို လုံးတော်ပြည့် ရွှေပြားသင်္ကန်းအသစ် ကပ်လှူခြင်း ၇၅ ရာခိုင်နှုန်း ပြီးစီးနေပြီဖြစ်ပြီး ဖေဖော်ဝါရီလကုန်တွင် လုပ်ငန်းပြီးစီးရန် ခန့်မှန်း
-
ဆေးရွက်ကြီး သုံးစွဲမှုကြောင့် ဖြစ်ပွားသည့် ကင်ဆာ၊ နှလုံး၊ သွေးတိုးနှင့် အသက်ရှူလမ်းကြောင်းဆိုင်ရာ ရောဂါများကြောင့် နှစ်စဉ် လူခြောက်သောင်းကျော် သေဆုံးနေ
-
ကိုယ်ဝန်ဆောင် မိခင်နှင့် နှစ်နှစ်ကလေးအထိ နိုင်ငံတော်၏ ငွေကြေးထောက်ပံ့မှု အစီအစဉ် ချင်း၊ ရခိုင်နှင့် နာဂဒေသ၌ စတင်နေပြီး ကယား၊ ကရင်၊ ဧရာဝတီနှင့် ရှမ်းဒေသတို့၌ တိုးချဲ့ဆောင်ရွက်မည်
-
မြောက်ဒဂုံတွင် တက္ကစီတစ်စီး ဘီးပေါက်ကာ ကား(၃)စီး ဆင့်တိုက်မှုဖြစ်ပွားပြီး လူ(၃)ဦး ဒဏ်ရာရ
