Top News

ထိုင်ဝမ်အရေး၊ လူ့ အခွင့်အရေးပြဿနာများ၊ ကုန်သွယ်ရေးတို့နှင့် ပတ်သက်၍ တင်းမာမှုများ မြင့်တက်လာသော အနေအထားတွင် အမေရိကန်သမ္မတဂျိုးဘိုင်ဒင်သည် စိတ်ဝင်တစား စောင့်ဆိုင်းခဲ့ရသော တရုတ်သမ္မတ ရှီကျင်းပင်နှင့် အွန်လိုင်း ထိပ်သီးဆွေးနွေးပွဲကို နိုဝင်ဘာ ၁၅ ရက်တွင် ကျင်းပမည်ဟု မျှော်လင့်ကြောင်း အမေရိကန်မီဒီယာများက ဖော်ပြခဲ့သည်။

ထိုအစည်းအဝေးကို နိုဝင်ဘာ ၁၅ ရက်တွင် ကျင်းပရန် မဝံ့မရဲ စီစဉ်ထားသည်ဟု အမည်မဖော်လိုသော သတင်းအရင်းအမြစ်များကို ကိုးကားကာ CNN နှင့် Politico တို့က ဖော်ပြခဲ့ကြသည်။

ကမ္ဘာ့အကြီးဆုံးစီးပွားရေး အင်အားကြီးနှစ်နိုင်ငံသည် အထူးသဖြင့် ထိုင်ဝမ်နှင့် ပတ်သက်၍ မကြာသေးခင် သီတင်းပတ်များတွင် ဆက်ဆံရေးများ ယိုယွင်းလာခဲ့သည်။ မိမိဘာသာဒီမိုကရေစီစနစ်ဖြင့် အုပ်ချုပ်နေသော ထိုင်ဝမ်အား ပိုင်ဆိုင်ကြောင်း တရုတ်က ပြောကြားထားပြီး လွန်ခဲ့သောလတွင် တရုတ်သည် ထိုင်ဝမ်ကျွန်းအနီး လေကြောင်း ကျူးကျော်မှုများကို စံချိန်တင် လုပ်ဆောင်ခဲ့သည်။

တရုတ်၏ ရန်လိုမှုနှင့် ရင်ဆိုင်နေရသော်လည်း အမေရိကန်သည် ထိုင်ဝမ်ကို ထောက်ခံသည်ဟု ကြိမ်ဖန်များစွာ ပြောကြားထားသည်။ သို့ရာတွင် အမေရိကန်နှင့် တရုတ်သည် ဂလက်စ်ဂေါမြို့တွင် ပြုလုပ်သော ရာသီဥတု ထိပ်သီးညီလာခံ၌ အံ့အားသင့်ဖွယ် သဘောတူညီမှုတစ်ရပ်ကို ရရှိခဲ့ကြသည်။ ဇန်နဝါရီလတွင် ဘိုင်ဒင် သမ္မတဖြစ်လာခဲ့ပြီးချိန်ကတည်းက လူချင်းတွေ့ဆုံရခြင်းမရှိသေးသော သမ္မတနှစ်ဦးသည် မကြာခင် အွန်လိုင်း၌ တွေ့ဆုံကြမည်ဟု ယခုသီတင်းပတ်အတွင်းတွင် အမေရိကန်နိုင်ငံခြားရေးဝန်ကြီး အန်တိုနီဘလင်ကင်က ပြောကြားခဲ့သည်။

နိုဝင်ဘာ ၁၁ ရက်တွင် ပြုလုပ်ခဲ့သော သတင်းစာရှင်းလင်းပွဲ၌ အဆိုပါအစည်းအဝေးအကြောင်း မေးမြန်းခဲ့ရာတွင် တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရ အမျိုးသမီး ဝမ်ဝင်ပင်းက “နိုင်ငံတော် အကြီးအကဲနှစ်ဦးသည် နည်းလမ်းပေါင်းစုံမှ မကြာခဏ ထိတွေ့ဆက်ဆံမှုများကို ထိန်းသိမ်းထားရန် သဘောတူခဲ့ကြပြီးဖြစ်သည်” ဟု ပြောကြားခဲ့သည်။

ဘိုင်ဒင် အိမ်ဖြူတော်သို့ ပြောင်းရွှေ့လာခဲ့ပြီးနောက်ပိုင်း ဘိုင်ဒင်နှင့် ရှီသည် ဖုန်းဖြင့် နှစ်ကြိမ် စကားပြောခဲ့ကြပြီးဖြစ်သည်။

ဘိုင်ဒင်က ဘားရက်အိုဘားမား၏ ဒုတိယသမ္မတအဖြစ် ဆောင်ရွက်နေခဲ့ပြီး ရှီက ဟူကျင်တောင်း၏ ဒုတိယသမ္မတအဖြစ် ဆောင်ရွက်ခဲ့ချိန်က ၎င်းတို့ နှစ်ဦးသည် ကျယ်ပြန့်စွာ တွေ့ဆုံခဲ့ကြသည်။

ဘိုင်ဒင်သည် မကြာသေးခင်က ရောမမြို့တွင်ကျင်းပခဲ့သော G20 ထိပ်သီးအစည်းအဝေးတွင် ရှီနှင့် တွေ့ဆုံရန် မျှော်လင့်ထားခဲ့သော်လည်း တရုတ်ခေါင်းဆောင်သည် ကိုရိုနာဗိုင်းရပ်စ် ကူးစက်ရောဂါ စတင်ဖြစ်ပွားသည့် ကာလကတည်းက ခရီးသွားခြင်း မရှိပေ။ ထို့ကြောင့် နှစ်ကုန်ပိုင်းလောက်တွင် ဘိုင်ဒင်နှင့်အွန်လိုင်းမှ တွေ့ဆုံရန် သဘောတူခဲ့သည်။

လက်ရှိသမ္မတဘိုင်ဒင်သည် သမ္မတ ဟောင်းဒေါ်နယ်ထရန့်လက်ထက်၌ တရုတ်အပေါ် ပိုမိုသဘောထားတင်းမာသည့် နည်းလမ်းဖြင့် ချဉ်းကပ်ခဲ့သည့်အတိုင်း ယခုလည်း ဆက်လက်ချဉ်းကပ်လျက်ရှိသည်။ ထို့ကြောင့် ယခင်ထရန့်အစိုးရနှင့် ဘိုင်ဒင်အစိုးရတို့သည်  တိုးတက်နေသော တရုတ်ကို ၂၁ ရာစု၏ ထိပ်တန်းစိန်ခေါ်မှုအဖြစ် သုံးသပ်ထားကြသည်။