တရုတ်နှင့် ပိုင်ဆိုင်မှုအငြင်းပွားနေသည့် ကျွန်းစုုပြဿနာအပါအဝင် ဂျပန်အား ကာကွယ်ပေးမည့် အမေရိကန်၏ ကတိကဝတ်သည် ခိုင်မာမှုရှိနေကြောင်း အမေရိကန် နိုင်ငံခြားရေးဝန်ကြီး အန်တိုနီ ဘလင်ကင်က တယ်လီဖုန်းဖြင့်ဆက်သွယ်မှုတွင် ၎င်းအား အခိုင်အမာပြောကြားခဲ့သည်ဟု ဂျပန်၏ နိုင်ငံခြားရေးဝန်ကြီးသစ် ယိုရှီမာဆာ ဟာယာရှီက နိုဝင်ဘာ ၁၃ ရက်တွင် ပြောကြားခဲ့သည်။
အတိတ်ကာလက တရုတ်အား ဂျပန်က စစ်ရေးအရ ကျူးကျော်ဝင်ရောက်မှုနှင့် အရှေ့ တရုတ်ပင်လယ်အတွင်းရှိ ဂျပန်၏ အုပ်ချုပ်မှုအောက်တွင်ရှိနေသည့် ဆန်ကာကူကျွန်းစု (တရုတ်အခေါ် ဟျောင်ယွီ ကျွန်းစု) နှင့်ပတ်သက်ပြီး နယ်နိမိတ်အငြင်းပွားမှုတို့ကြောင့် နှစ်နိုင်ငံဆက်ဆံရေးမှာ ယိုယွင်းခဲ့သည်။
“ နိုင်ငံခြားရေးဝန်ကြီး ဘလင်ကင်ဟာ ဆန်ကာကူကျွန်းစုနဲ့ပတ်သက်ပြီး ဂျပန်နဲ့ အမေရိကန် လုံခြုံရေးစာချုပ်မှာ ပါဝင်တဲ့ ပိုဒ်ခွဲ ၅ ကိုကျင့်သုံးမှုအပါအဝင် ဂျပန်ကို ကာကွယ်မှုနဲ့ပတ်သက်ပြီး အမေရိကန်ရဲ့ ကတိကဝတ်ဟာ ခိုင်မာမှုရှိနေတယ်လိို့ ပြောခဲ့ပါတယ်” ဟု ဟာယာရှီက သတင်းထောက်များအား ပြောကြားခဲ့သည်။
ယင်းစာချုပ်တွင်ပါဝင်သည့် ပိုဒ်ခွဲ ၅ အရ ဂျပန်၏ အုပ်ချုပ်မှုအောက်တွင်ရှိနေသည့် နယ်နိမိတ်များကို တိုက်ခိုက်မှုသည် ငြိမ်းချမ်းရေးနဲ့ လုံခြုံရေးအတွက် အန္တရာယ်ဖြစ်စေနိုင်ပြီး ယင်းအန္တရာယ်ကို ရင်ဆိုင်ရန် အရေးယူလုပ်ဆောင်သွားမည်ဟု နှစ်နိုင်ငံလုံးက သဘောတူခဲ့သည်။ ထို့ပြင် သူနှင့် ဘလင်ကင်သည် ထိုင်ဝမ်ရေလက်ကြား ငြိမ်းချမ်းရေးနှင့် တည်ငြိမ်ရေးသည် အရေးကြီးသည့်အမြင်ကို ဖလှယ်ခဲ့ကြသည်ဟု ဟာယာရှီက ပြောကြားခဲ့သည်။
တရုတ်အစိုးရသည် ၎င်း၏ နယ်နိမိတ်အဖြစ် ကြေညာထားသည့် ထိုင်ဝမ်အနီးတွင် စစ်လေယာဉ်များ စေလွှတ်ပျံသန်းခဲ့ပြီး ယင်းလုပ်ဆောင်ချက်ကို ထိုင်ဝမ်က စောဒကတက်နေမှုနှင့်အတူ မကြာသေးမီလများအတွင်း ရေလက်ကြားဖြတ်ကျော်ဆက်ဆံရေး တင်းမာမှုများ မြင့်တက်ခဲ့သည်။
အရှေ့တရုတ်ပင်လယ်နှင့် တောင်တရုတ်ပင်လယ်များအတွင်း ရှိရင်းစွဲအခြေအနေများကို ပြောင်းလဲရန် တရုတ်၏ တစ်ဖက်သတ်ကြိုးပမ်းမှုများကို ဟာယာရှီနှင့် ဘလင်ကင်တို့က ပြင်းထန်စွာ ဆန့်ကျင်ခဲ့ပြီး တရုတ်နှင့်ပတ်သက်သည့် အရေးကိစ္စများကို တုံ့ပြန်ရာတွင် နှစ်နိုင်ငံအကြား နီးကပ်စွာ ပူးပေါင်းဆောင်ရွက်မှုကို သဘောတူခဲ့ကြသည်ဟု ဂျပန် နိုင်ငံခြားရေးဝန်ကြီးဌာနက အစီရင်ခံစာ ထုတ်ပြန်ခဲ့သည်။
နိုဝင်ဘာ ၁၁ ရက်ကလည်း အမေရိကန်၏ အင်ဒို-ပစိဖိတ် စစ်ဌာနချုပ် အကြီးအကဲ ရေတပ်ဗိုလ်ချုပ်ကြီး ဂျွန်စီ အကွီလင်နိုသည် ဂျပန်ဝန်ကြီးချုပ် ဖူမီယို ကီရှီဒါနှင့် တွေ့ဆုံခဲ့ပြီး တရုတ်၏ စစ်ရေးလုပ်ရှားမှုများ မြင့်တက်နေသည့် အင်ဒို-ပစိဖိတ်ဒေသတွင် လွတ်လပ်ပြီး ပွင့်လင်းမှုရှိစေရန် အမေရိကန်၏ ကတိကဝတ်များကို ထပ်လောင်းအတည်ပြုခဲ့သည်။
အကွီလင်နိုသည် တရုတ်စစ်သင်္ဘောများ မကြာခဏတွေ့ရှိရတတ်သည့် ဂျပန်၏ တောင်ပိုင်းကျွန်းစုများသို့ သွားရောက်ခဲ့သည့် ခရီးစဉ်တွင် ဂျပန် ကိုယ်ပိုင်ကာကွယ်ရေးတပ်ဖွဲ့များ၏ လေ့ကျင့်မှုများကို လေ့လာကြည့်ရှုခဲ့ပြီး ဂျပန်စစ်ဦးစီးချုပ် ကိုဂျီယာမာဇာကီနှင့် သုံးရက်ကြာ တွေ့ဆုံဆွေးနွေးမှုများ ပြုလုပ်ခဲ့သည်။
-
ရန်ကုန်တိုင်းဘောလုံးအဖွဲ့ချုပ်ဥက္ကဋ္ဌဖလား အ သက်(၂၀)နှစ်အောက် အမျိုးသားဖိတ်ခေါ်ဘောလုံးပြိုင်ပွဲကျင်းပမည်
-
ဆို၊ က၊ ရေး၊ တီးပြိုင်ပွဲများသည် အမျိုးသားရေးစိတ်ဓာတ်ကို ပိုမိုတက်ကြွအောင်လှုံ့ဆော်ပေးသည့် ကြိုးပမ်းမှုတစ်ရပ်ဖြစ်ဟု နစက ဥက္ကဋ္ဌပြော
-
တနိုင်းမြို့အနီးကို ဗဟိုပြု၍ အင်အားရစ်ချ်တာစကေး ၄ အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ခတ်ခဲ့ပြီး နှစ်ရက်ဆက်တိုက် ငလျင်လှုပ်ခတ်မှုဖြစ်ပွား
-
MAI လေကြောင်းလိုင်း၏ လုပ်သက်ရင့်ဝန်ထမ်းများအား ဂုဏ်ပြုချီးမြှင့်ခြင်းနှင့်ပညာရေး၊ လူထုအကျိုးပြုလုပ်ငန်း နှင့်စပ်လျဉ်းသည့် အစီအစဉ်သစ်များအား မိတ်ဆက်ခြင်းအခမ်းအနားပြုလုပ်
-
မန္တလေးမြို့တွင် ယာဉ်စစ်လုပ်ငန်းဆောင်ရွက်နေသော ယာဉ်ထိန်းအမျိုးသမီး အရာရှိတစ်ဦး ပစ်ခတ်ခံရ