ဖောက်ခွဲမှုများ ပြုလုပ်ရန်အတွက် မည်သည့်လက်အောက်ခံတပ်ဖွဲ့များကိုမျှ ညွှန်ကြားထားခြင်း လုံးဝမရှိကြောင်းနှင့် ငြိမ်းချမ်းရေးလုပ်ငန်းစဉ် အောင်မြင်ရေးသန္နိဋ္ဌာန်ချထားကြောင်း ကရင်အမျိုးသားအစည်း အရုံး (KNU) က စက်တင်ဘာ ၂၇ ရက်တွင် ထုတ်ပြန်သည်။
၂၀၁၉ ခုနှစ် စက်တင်ဘာ ၁၆ ရက်၊ ရက်စွဲဖြင့် Social Media မှတစ်ဆင့် ပျံ့လွင့်နေသည့် ပြည်ထောင်စုသမ္မတ မြန်မာနိုင်ငံတော် နိုင်ငံတော်သမ္မတရုံး နိုင်ငံရေးနှင့် လုံ ခြုံရေးဌာနကြီးမှ ညွှန်ကြားရေးမှူးချုပ် (နိုင်ဆွေဦး) ၏ လက်မှတ်ဖြင့် ပြည်ထောင်စုနယ်မြေအတွင်းရှိ ရုံး/ဌာနအသီးသီးသို့ လုံခြုံရေးအထူးဂရုပြုဆောင်ရွက်ရေး လမ်းညွှန်မှုကို ဖော်ပြသောညွှန်ကြားစာနှင့် သက်ဆိုင် ရာအဆင့်ဆင့်သို့ တစ်ဆင့်ညွှန်ကြားစာများကို တွေ့ရှိရကြောင်း KNU ၏ သတင်းထုတ်ပြန်ချက်တွင် ဖော်ပြခဲ့သည်။
ထို့ပြင် အစိုးရဌာနအဆင့်ဆင့်တို့မှ ညွှန်ကြားစာများ ပေါ်ထွက်မှုမှတစ်ဆင့် မြန်မာနိုင်ငံဆိုင်ရာ နိုင်ငံတကာသံရုံးများတို့ကလည်း လုံခြုံရေးဆိုင်ရာ သတိပေးချက်များ ထုတ်ပြန်လာကြသည်ကို တွေ့ရကြောင်းလည်း KNU ၏သတင်းထုတ်ပြန်ချက်တွင် ဖော်ပြထားသည်။
အဆိုပါညွှန်ကြားစာတွင် မြောက်ပိုင်း မဟာမိတ်အဖွဲ့ဝင်အချို့ (AAအဖွဲ့/KIA အဖွဲ့နှင့် အဖွဲ့စိစစ်ဆဲ)၊ CNF နှင့် KNU အဖွဲ့ဝင်များ စုစုပေါင်း ၂၀ က ထိုင်းနိုင်ငံ မယ်လ (ခ) ဘဲကလော့ဒုက္ခသည်စခန်းအနီး တွင် အစည်းအဝေးပြုလုပ်ခဲ့ခြင်း၊ ထိုအစည်းအဝေးတွင် စက်တင်ဘာ ၁၆ ရက် (သို့မဟုတ်) စက်တင်ဘာ ၂၆ ရက်၊ အောက်တိုဘာ ၁၆ ရက် (သို့မဟုတ်) အောက်တိုဘာ ၂၆ ရက်၌ နေပြည်တော်ကောင်စီနယ်မြေတွင် ဖောက်ခွဲမှုတစ်ခုပြုလုပ်မည့် သတင်းနှင့်စပ်လျဉ်း၍ နိုင်ငံရေးနှင့် လုံခြုံရေးဌာနကြီးမှ စာအမှတ် ၅၀၆ (၁၅၈)/၁၂/သမ္မတရုံးရက်စွဲ -၂၀၁၉ ခုနှစ်၊ စက်တင်ဘာ ၁၆ ရက် နေ့စွဲဖြင့် ပြည်ထောင်စုနယ်မြေအတွင်းရှိ ရုံး/ ဌာနအသီးသီးတွင် လုံခြုံရေးအထူးဂရုပြု ဆောင်ရွက်သွားရန် ညွှန်ကြားကြောင်း ဖော်ပြခဲ့သည်။
အထက်ပါ စာပါအကြောင်းအရာအရ ‘KNU အဖွဲ့ဝင်များမှ’ ဟုလည်းကောင်း၊ ‘ဖောက်ခွဲမှုတစ်ခု ပြုလုပ်ရန်’ဟုလည်း ကောင်း ပါရှိသောကြောင့်KNU က ယခုကဲ့သို့ သတင်း ထုတ်ပြန်ရခြင်းဖြစ်ကြောင်း ဖော်ပြခဲ့သည်။
KNU အနေဖြင့် ငြိမ်းချမ်းရေးလုပ်ငန်းစဉ် ထိခိုက်ပျက်စီးစေရန် လုပ်ဆောင်မည့် မူဝါဒမရှိကြောင်း၊ KNU ၏ မည်သည့်လက်အောက်ခံ တပ်ဖွဲ့တစ်ခုခုအနေဖြင့်လည်း ငြိမ်းချမ်းရေးလုပ်ငန်းစဉ် ထိခိုက်စေမည့် မည်သည့်လုပ်ရပ်ကိုမျှ လုပ်ဆောင်ရန်မရှိ ကြောင်း KNU က သတင်းထုတ်ပြန်သည်။
စာပါအကြောင်းအရာအရ ‘အစည်းအဝေးတစ်ခုပြုလုပ်ပြီး နေပြည်တော်ကောင်စီနယ်မြေတွင် ဖောက်ခွဲမှုတစ်ခုပြုလုပ်ရန်’ ဆိုသည့်ကိစ္စနှင့်ပတ်သက်ပြီး KNU အနေဖြင့် ထိုသို့သော အစည်းအဝေးမျိုး မပြုလုပ်ခဲ့သကဲ့သို့ ဖောက်ခွဲမှုများ ပြုလုပ်ရန်အတွက် KNU ၏ မည်သည့်လက်အောက်ခံတပ်ဖွဲ့ များထံသို့ ညွှန်ကြားချက် တစ်စုံတစ်ရာညွှန် ကြားခြင်းမျိုး လုံးဝ (လုံးဝ) မရှိကြောင်း သတင်းထုတ်ပြန်ချက် တွင်ပါရှိ်သည်။
KNU သည် ငြိမ်းချမ်းရေးလုပ်ငန်းစဉ် အောင်မြင်ရေးအတွက် သန္နိဋ္ဌာန်ချထားသကဲ့သို့ တစိုက်မတ်မတ်ဖြင့် ရှေ့တန်းမှပါဝင်ကာ ကြိုးစားဆောင်ရွက်နေပြီး ဆက်လက်၍လည်း ဆောင်ရွက်နေမည်ဖြစ်ကြောင်း KNU က သတင်းထုတ်ပြန်သည်။
ထို့ပြင် KNU သည် နိုင်ငံရေးပြဿနာကို နိုင်ငံရေးနည်းလမ်းဖြင့် တရားမျှတပြီး ငြိမ်းချမ်းသည့် နည်းလမ်းဖြင့် ဖြေရှင်းမည်ဟု ‘မူဝါဒ’ ချမှတ်ထားသည့်အတိုင်း ရေရှည်တည်တံ့ခိုင်မြဲသော ငြိမ်းချမ်းရေးရရှိရန်နှင့် ဒီမိုကရေစီ ဖက်ဒရယ်ပြည်ထောင်စု ထူထောင်နိုင်ရေးအတွက် အစဉ်တစိုက် ကြိုးပမ်းဆောင်ရွက်သွားမည်ဖြစ်ကြောင်း KNU ၏ သတင်း ထုတ်ပြန်ချက်တွင်ပါရှိသည်။
KNU အဖွဲ့သည် NCA စာချုပ်တွင် ပါဝင်လက်မှတ်ရေးထိုးထားသည့် အဖွဲ့အ စည်းတစ်ခုဖြစ်ဖြစ်သည်။
-
မြန်မာစီးပွားရေး လုပ်ငန်းရှင်များနှင့် မိသားစုဝင်များအား တရုတ်နိုင်ငံ၌ ခြောက်လ နေထိုင်ခွင့်ရှိမည့် ဗီဇာအမျိုးအစားများကို နိုဝင်ဘာ ၁၈ ရက်တွင် စတင်ထုတ်ပေးမည်
-
နယူးဒေလီမြို့တော်တွင် မီးခိုးမြူများ ဖုံးလွှမ်းမှုကြောင့် မူလတန်းကျောင်းအားလုံး ပိတ်ထားခဲ့ရ
-
ဖိလစ်ပိုင်တွင် စူပါတိုင်ဖွန်းမန်-ယီ တိုက်ခတ်မှုကြောင့် သစ်ပင်များနှင့် ဓာတ်တိုင်များ လဲကျ
-
eSports လောကသို့ဝင်ရောက်ရန် ဆွေးနွေးမည်ဟု ဘိုင်ယန်မြူးနစ်အသင်း ဘုတ်အဖွဲ့ဥက္ကဋ္ဌ ရူမင်နစ်ဂီ ပြောကြား
-
အာဖဂန်နစ္စတန်မှ ဆုတ်ခွာခဲ့ပြီးနောက် အမေရိကန်သည် စူပါပါ၀ါနိုင်ငံ မဟုတ်တော့ဟု ဗြိတိန် ကာကွယ်ရေးဝန်ကြီးက ပြောကြား
