ပထမအကြိမ် ပြည်သူ့လွှတ်တော်ဥက္ကဋ္ဌဟောင်း ဗိုလ်ချုပ်ကြီး(ငြိမ်း)သူရဦးရွှေမန်း ဦးဆောင်သည့် ပြည်ထောင်စုကောင်းကျိုးဆောင်ပါတီ(UBP)သည် နိုင်ငံရေးပါတီအဖြစ် မှတ်ပုံတင်ထားခြင်းမှ ဖျက်သိမ်းရန် ဆောင်ရွက်နေပြီဖြစ်ကြောင်း UBP ပါတီနှင့် နီးစပ်သူများထံမှ သိရသည်။
“ပြီးခဲ့တဲ့ နှစ်ပတ်လောက်ကတည်းက ပါတီဖျက်သိမ်းဖို့ UEC ကို တင်ပြမယ်ဆိုပြီး ကြားရတယ်။ UEC ကို ပါတီ ဖျက်သိမ်းဖို့ တင်ပြီးပြီလား၊ မတင်ရသေးဘူးလားတော့ မသိရသေးဘူး” ဟု UBP ပါတီနှင့် နီးစပ်သူတစ်ဦးက ပြောကြားသည်။
ပြည်ထောင်စုကောင်းကျိုးဆောင်ပါတီ(UBP)၏ ဗဟိုအလုပ်အမှုဆောင်ကော်မတီဝင်၊ စစ်ကိုင်းတိုင်းဒေသကြီး UBP ပါတီဥက္ကဋ္ဌဖြစ်သူ ဦးစောလှထွန်းကမူ ပြည်ထောင်စုကောင်းကျိုးဆောင်ပါတီကို ဖျက်သိမ်းရန် ဆောင်ရွက်နေပြီဖြစ်ကြောင်း အောက်တိုဘာ ၁၁ ရက်တွင် ၎င်း၏ လူမှုကွန်ရက်စာမျက်နှာ၌ ရေးသားထားသည်။
ပြည်ထောင်စုကောင်းကျိုးဆောင်ပါတီ(UBP)ကို နိုင်ငံရေးပါတီအဖြစ် မှတ်ပုံတင်ထားခြင်းမှ ဖျက်သိမ်းရန် ဆောင်ရွက်နေပြီဖြစ်ကြောင်း သတင်းများထွက်ပေါ်နေသည့်အတွက် ပြည်ထောင်စုရွေးကောက်ပွဲကော်မရှင်ထံ တင်ပြထားခြင်းရှိ မရှိ ကော်မရှင်မှ ပြောရေးဆိုခွင့်ရှိသူနှင့် UBP ပါတီမှ တာဝန်ရှိသူများထံသို့ ဆက်သွယ်မေးမြန်းခဲ့သော်လည်း တစ်စုံတစ်ရာ ပြန်လည်ဖြေကြားခဲ့ခြင်း မရှိပေ။
၂၀၁၉ ခုနှစ် ဧပြီ ၈ ရက်တွင် ပြည်ထောင်စုရွေးကောက်ပွဲကော်မရှင်သို့ ပြည်ထောင်စုကောင်းကျိုးဆောင်ပါတီ(UBP) တည်ထောင်သူများက ပါတီမှတ်ပုံတင် လျှောက်ထားခဲ့ပြီး ဧပြီ ၂၅ ရက်တွင် UEC မှ နိုင်ငံရေးပါတီအဖြစ် မှတ်ပုံတင်ခွင့်ပြုခဲ့ပြီး ပါတီရုံးချုပ်ကို နေပြည်တော်ရှိ သူရဦးရွှေမန်း၏ နေအိမ်တွင် ဖွင့်လှစ်ခဲ့သည်။
ပြည်ထောင်စုကောင်းကျိုးဆောင်ပါတီသည် ၂၀၂၀ ပြည့်နှစ် အထွေထွေရွေးကောက်ပွဲတွင် ဝင်ရောက်ယှဉ်ပြိုင်ခဲ့သော်လည်း လွှတ်တော်ကိုယ်စားလှယ် တစ်နေရာမျှ အနိုင်ရရှိခဲ့ခြင်းမရှိသလို ပါတီဥက္ကဋ္ဌဖြစ်သူ သူရဦးရွှေမန်းမှာလည်း ရွေးကောက်ပွဲတွင် ဝင်ရောက်ယှဉ်ပြိုင်ခဲ့ခြင်း မရှိပေ။
နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီ အစိုးရ လက်ထက်တွင် ညှိနှိုင်းကွပ်ကဲရေးမှူး(ကြည်း၊ ရေ၊ လေ)အဖြစ် တာဝန်ယူခဲ့သည့် ဗိုလ်ချုပ်ကြီးဟောင်း သူရဦးရွှေမန်းသည် ၂၀၀၈ ခုနှစ် ဖွဲ့စည်းပုံအခြေခံဥပဒေအောက်တွင် ကျင်းပခဲ့သည့် ၂၀၁၀ အထွေထွေရွေကောက်ပွဲတွင် ပြည်ခိုင်ဖြိုးပါတီ ကိုယ်စားပြု၍ ဇေယျာသီရိမြို့နယ် ပြည်သူ့လွှတ်တော် ကိုယ်စားလှယ်အဖြစ် ဝင်ရောက်ယှဥ်ပြိုင်ခဲ့ပြီး ပထမအကြိမ် ပြည်သူ့လွှတ်တော်တွင် ဥက္ကဋ္ဌ တင်မြှောက်ခံခဲ့ရသည်။
၂၀၁၅ ခုနှစ်တွင် ကျင်းပသည့် အထွေထွေရွေးကောက်ပွဲတွင် ဝင်ရောက်ယှဉ်ပြိုင်ခဲ့ပြီး အနိုင်ရရှိခဲ့ခြင်းမရှိသော်လည်း NLD အစိုးရလက်ထက်တွင် ဒေါ်အောင်ဆန်းစုကြည်နှင့် ရင်းနှီးသည့် သူရဦးရွှေမန်းသည် ဥပဒေရေးရာနှင့် အထူးကိစ္စရပ်များ လေ့လာသုံးသပ်ရေးကော်မရှင်ဥက္ကဋ္ဌအဖြစ် တာဝန်ပေးအပ်ခြင်းခံခဲ့ရသည်။
၂၀၂၀ ပြည့်နှစ် အထွေထွေရွေးကောက်ပွဲမတိုင်မီ ပြည်ထောင်စုကောင်းကျိုးဆောင်ပါတီ(UBP)ကို တည်ထောင်ရန် ဆောင်ရွက်ချိန်တွင် သူရဦးရွှေမန်း ဥက္ကဋ္ဌအဖြစ် တာဝန်ယူထားသည့် ဥပဒေရေးရာနှင့် အထူးကိစ္စရပ်များ လေ့လာသုံးသပ်ရေးကော်မရှင် သက်တမ်းတိုးခွင့်ကို NLD လွှတ်တော်ကိုယ်စာလှယ်အများစု ပါဝင်သည့် ဒုတိယအကြိမ် ပြည်ထောင်စုလွှတ်တော်က ပယ်ချခဲ့သည်။
-
ဟဲဗီးဝိတ်တန်းလက်ဝှေ့သမား ဟာဆင်ရာမန်ဂျူနီယာနှင့် ဂျိတ်ပေါလ် ပြောင်းလဲထိုးသတ်မည်
-
ရုရှားနိုင်ငံ၌ မူးယစ်ဆေးမှုဖြင့် ဖမ်းဆီးခံထားရသည့် အမျိုးသမီးဘတ်စကက်ဘောသမား ဂရီနာ အပြစ်ရှိကြောင်း ဝန်ခံထွက်ဆို
-
စင်ကာပူအိုးပင်း ကြက်တောင်ပြိုင်ပွဲတွင် သက်ထားသူဇာ လက်ရည်စစ်ပွဲအဆင့်မှ စတင်ယှဉ်ပြိုင်ရမည်
-
မိမိကို ယုံကြည်စွာဖြင့် တာဝန်ပေးခဲ့သည့် PSG အသင်းဥက္ကဋ္ဌ အယ်လ်ခီလိုင်ဖီနှင့် ဘောလုံးအကြံပေး လူးဝစ်ကမ်ပို့စ်တို့ကို ကျေးဇူးတင်ကြောင်း နည်းပြ ဂယ်လ်ချီ ဆို
-
ဗာနာ၊ ဇီယာ့ရှ်နှင့် အိုဒွိုင်းတို့အတွက် ကမ်းလှမ်းမှုများကို ချယ်လ်ဆီးအသင်း လက်ခံမည်
