ကိုရီးယားဒါရိုက်တာ Bong Joon- ho ၏ အောင်မြင်ခဲ့သော Parasite ဇာတ်ကားသည် ကမ္ဘာတစ်ဝန်း ရုပ်ရှင်ပွဲတော်နှင့် ဆုပေးပွဲ ၅၇ ခုတွင် ပြသရန် ဖိတ်ကြားခံခဲ့ရပြီး ဆုပေါင်း ၅၅ ခုကို ဆွတ်ခူးခဲ့ကြောင်း ထိုဇာတ်ကားထုတ်လုပ်ရေးကုမ္ပဏီ CJENM က ဖေဖော်ဝါရီ ၇ တွင် ထုတ်ပြန်ခဲ့သည်။
လာမည့် အော်စကာဆုအခမ်းအနားတွင်လည်း Parasite ဇာတ်ကားသည် အကောင်းဆုံးရုပ်ရှင်ဆုအပါအဝင် ကဏ္ဍခြောက်ခုအတွက် ဆန်ခါတင်စာရင်းတွင် ဖော်ပြခံခဲ့ရသည်။ အလွန်အမင်းကွာဟသော မိသားစုနှစ်စု၏အကြောင်းကို သရုပ်ဖော်ထားသည့် ထိုဇာတ်ကားသည် ပြီးခဲ့သောနှစ် မေတွင် ကျင်းပခဲ့သည့် ကိန်းရုပ်ရှင်ပွဲတော်၌ အမြင့်ဆုံးဖြစ်သော ရွှေအုန်းပင်ဆုကို ရရှိခဲ့ပြီးနောက် ၂၀၁၉ ခုနှစ် တစ်နှစ်လုံးတွင် အလွန်အမင်း အောင်မြင်ခဲ့ကာ ဆုများ ဆက်တိုက် ရရှိရန် အစပျိုးခဲ့သည်။
၂၀၁၉ ခုနှစ် ဇွန်တွင်ကျင်းပသော ဆစ်ဒနီရုပ်ရှင်ပွဲတော်၌ ထိုဇာတ်ကားသည် အမြင့်ဆုံးဆု ချီးမြှင့်ခံခဲ့ရပြီး ငွေကြေးချို့တဲ့သည့် ဖခင်ဇာတ်ရုပ်နေရာမှ သရုပ်ဆောင်ခဲ့သော ဆောင်ကန်ဟိုသည် ပြီးခဲ့သောသြဂုတ်တွင် ဆွစ်ဇာလန်၌ ကျင်းပခဲ့သည့် လိုကာနိုအပြည်ပြည်ဆိုင်ရာ ရုပ်ရှင်ပွဲတော်တွင် Excellent Award ရရှိခဲ့သည်။
ထို့ပြင် ကယ်ဂါရီအပြည်ပြည်ဆိုင်ရာ ရုပ်ရှင်ပွဲတော်၊ မွန်ဂိုလီးယားတွင် အူလန်ဘာတောအပြည်ပြည်ဆိုင်ရာ ရုပ်ရှင်ပွဲတော်၊ အီရတ်တွင် ဆလီမာနီအပြည်ပြည် ဆိုင်ရာရုပ်ရှင်ပွဲတော်အပါအဝင် မြောက်အမေရိက၊ ဥရောပ၊ အာရှနှင့် အရှေ့အလယ်ပိုင်းတို့၌ ကျင်းပခဲ့သော ရုပ်ရှင်ပွဲတော်များတွင်လည်း ထိုဇာတ်ကားသည် ဆုများစွာ ရရှိခဲ့သည်။
ပြီးခဲ့သောနှစ် အောက်တိုဘာတွင် အမေရိကန်ရှိ ပြည်နယ်များ၌ ပြသခဲ့ပြီးနောက်ပိုင်း Parasite ဇာတ်ကားသည် အမေရိကန်ရှိ ရုပ်ရှင်ဝေဖန်သူများထံမှ အလွန်အမင်း ချီးကျူးခံရသော သုံးသပ်မှုများ ရရှိခဲ့သည်။
အော်စကာဆုပေးပွဲမတိုင်မီ အမေရိကန်ဆုပေးပွဲကာလသို့ ဝင်ရောက်လာစဉ် Parasite ဇာတ်ကားသည် လော့စ်အိန်ဂျလိစ်၊ ချီကာဂို၊ တိုရွန်တိုနှင့် ဆန်ဒီယေဂိုတို့အပါအဝင် ဒေသဆိုင်ရာ ရုပ်ရှင်ဝေဖန်ရေးအဖွဲ့များက ချီးမြှင့်သော အကောင်းဆုံး ရုပ်ရှင်ဆု၊ အကောင်းဆုံး ဇာတ်ညွှန်းဆုနှင့် အကောင်းဆုံး ပြည်ပဇာတ်ကားဆုများအပါအဝင် ထိပ်တန်းဆုအားလုံးနီးပါးကို သိမ်းကျုံးရရှိခဲ့ပြီးဖြစ်သည်။
၂၀၂၀ ပြည့်နှစ်တွင်လည်း Parasite ဇာတ်ကားသည် ရွှေကမ္ဘာလုံးဆုပေးပွဲ၌ အကောင်းဆုံး နိုင်ငံခြားဘာသာစကားပြော ဇာတ်ကားဆု ရရှိခဲ့ရာ ဟောလိဝုဒ်၏ ပြည်ပစာနယ်ဇင်းအဖွဲ့က စီစဉ်သောအခမ်းအနားတွင် ထိုဆုကို ရရှိခဲ့သည့် ပထမဆုံး တောင်ကိုရီးယားဇာတ်ကားဖြစ်လာခဲ့သည်။
Screen Actors Guild Awards တွင်လည်း Parasite ဇာတ်ကားသည် ထိပ်တန်းဂုဏ်ပြုဆုဖြစ်သော Cast in a Motion Picture ဆု ရရှိခဲ့သည့် အင်္ဂလိပ်စကားပြော မဟုတ်သော ပထမဆုံး ဇာတ်ကားဖြစ်လာခဲ့ပြီး Critics Choice Awards တွင်လည်း ဆုနှစ်ဆု ချီးမြှင့်ခံခဲ့ရသည်။
ဒါရိုက်တာ Bong သည် Writers Guild of America Awards နှင့် British Academy of Film and Television Arts (BAFTA) ဆုပေးပွဲနှစ်ခုစလုံးတွင် အကောင်းဆုံးမူလဇာတ်ညွှန်းဆု ရရှိခဲ့သည်။
အဓိကဆုပေးပွဲများတွင် ဆုပေါင်းများစွာ ရရှိခဲ့ပြီးနောက် Parasite ဇာတ်ကားသည် ဖေဖော်ဝါရီ ၁၀ တွင် ကျင်းပမည့် ၉၂ ကြိမ်မြောက် အော်စကာဆုပေးပွဲ၌လည်း အကောင်းဆုံးဇာတ်ကားဆုအတွက် ဒါရိုက်တာ ဆမ်မန်ဒက်၏ ပထမကမ္ဘာစစ်နောက်ခံဇာတ်ကား 1917 နှင့် ယှဉ်ပြိုင်ရမည်ဖြစ်သည်။
-
မြန်မာစီးပွားရေး လုပ်ငန်းရှင်များနှင့် မိသားစုဝင်များအား တရုတ်နိုင်ငံ၌ ခြောက်လ နေထိုင်ခွင့်ရှိမည့် ဗီဇာအမျိုးအစားများကို နိုဝင်ဘာ ၁၈ ရက်တွင် စတင်ထုတ်ပေးမည်
-
နယူးဒေလီမြို့တော်တွင် မီးခိုးမြူများ ဖုံးလွှမ်းမှုကြောင့် မူလတန်းကျောင်းအားလုံး ပိတ်ထားခဲ့ရ
-
ဖိလစ်ပိုင်တွင် စူပါတိုင်ဖွန်းမန်-ယီ တိုက်ခတ်မှုကြောင့် သစ်ပင်များနှင့် ဓာတ်တိုင်များ လဲကျ
-
eSports လောကသို့ဝင်ရောက်ရန် ဆွေးနွေးမည်ဟု ဘိုင်ယန်မြူးနစ်အသင်း ဘုတ်အဖွဲ့ဥက္ကဋ္ဌ ရူမင်နစ်ဂီ ပြောကြား
-
အာဖဂန်နစ္စတန်မှ ဆုတ်ခွာခဲ့ပြီးနောက် အမေရိကန်သည် စူပါပါ၀ါနိုင်ငံ မဟုတ်တော့ဟု ဗြိတိန် ကာကွယ်ရေးဝန်ကြီးက ပြောကြား
