အမေရိကန် ၀ါရင့်ရုပ်ရှင်မင်းသားကြီး ဆီဗက်စတာ စတားလုံးနှင့် ဇနီးဂျနီဖာဖလေဗင်တို့ သူတို့အိမ်ထောင်ရေးကို အဆုံးသတ်ရန်ပြင်ဆင်နေပြီး ဇနီးသည်ဘက်မှ သြဂုတ် ၁၉ ရက်တွင် ကွာရှင်းခွင့်စတင်လျှောက်ထားခဲ့သည်။
သူတို့နှစ်ဦးသည် မေကမှ အိမ်ထောင်သက်၂၅ နှစ်ပြည့်ကိုဆင်နွှဲထားပြီး စတားလုံးက အိမ်ထောင်ရေးပိုင်ဆိုင်မှုများကို ဖုံးကွယ်ထားသည်ဟု ဇနီးက ယူဆနေသည်။
ကွာရှင်းရန်ဖြစ်မလာမီကတည်းက စတားလုံးသည် လက်မောင်းတွင်ထိုးထားသည့် ဇနီးသည်မျက်နှာပုံတက်တူးကို ဖုံးချင်နေသည်ဟု တက်တူးဆရာ မိုက်ဒက်ဗရီးစ်က ပြောသည်။
“မနှစ်က သူကျွန်တော့်ကို ဆက်သွယ်တယ်။ သူ့မိန်းမမျက်နှာပုံနေရာမှာ Wonder Woman ပုံနဲ့အစားထိုးဖို့ ကျွန်တော်တို့ဆွေးနွေးကြတယ်။ ဒါပေမဲ့ Wonder Woman မှာ သရဖူပါတဲ့အတွက် အဲဒါနဲ့အစားထိုးဖို့ အဆင်မပြေကြောင်းသူ့ကိုရှင်းပြခဲ့တယ်”ဟု ဒက်ဗရီးစ်က People မဂ္ဂဇင်းကိုပြောသည်။
ဒက်ဗရီးစ်သည် စတားလုံး၏ဇနီးမျက်နှာပုံကို ၂၀၀၇ ခုနှစ်က ထိုးပေးခဲ့ပြီး ထိုပုံအတွက် ၂၅ နာရီ အချိန်ပေးခဲ့ရသည်။
လက်ရှိစတားလုံးလက်မောင်းတွင် ခွေးပုံဖြင့် အစားထိုးအုပ်ထားသည်။ သို့သော် ဒက်ဗရီးစ်လက်ရာ မဟုတ်ပေ။
ဇနီးဘက်က ကွာရှင်းရန်စတင်ခဲ့မှုနှင့်ပတ်သက်ပြီး စတားလုံးဘက်က ပြန်လည်ဖြေရှင်းထားသည်များလည်းရှိပြီး အိမ်ထောင်ရေး ပိုင်ဆိုင်မှုများကို တမင်တကာဖြုန်းတီးထားသည်ဆိုသည့် ဇနီး၏စွပ်စွဲချက်များကို စတားလုံးက ငြင်းထားသည်။
ဒွိုက်ဟုအမည်ရသည့် ရော့ဝယ်လာ ခွေးတစ်ကောင်အတွက် သူတို့နှစ်ဦး စကားများကြသည်ဆိုသည့် သတင်းများလည်းထွက်ခဲ့ပြီး၊ သူတို့၏ ၂၅ နှစ်ကြာအိမ်ထောင်ရေးမှာ ခွေးကိစ္စကြောင့် အဆုံးသတ်လိုက်ရသည်ဆိုသည့် ကောလာဟလများကို မင်းသားကြီးက ငြင်းခဲ့သည်။
ဇနီးဗလေဗင်က အိမ်မွေးတိရစ္ဆာန်မမွေးလိုဘဲ စတားလုံးက အကာအကွယ်ရရန် တစ်ကောင်ဖြစ်ဖြစ် မွေးလိုသူဖြစ်သည်။ စတားလုံးက အသေးအဖွဲကိစ္စတစ်ခုဖြင့် အိမ်ထောင်ရေးကို အဆုံးသတ်လိုက်ခြင်းမဟုတ်ဟု ပြောသော်လည်း ခွေးမွေးသည့်ကိစ္စဖြင့် သူတို့ချင်း သဘောထားကွဲခဲ့သည်ဟု ဝန်ခံထားသည်။
-
■ ၂၀၂၆ ကမ္ဘာ့ဖလားခြေစစ်ပွဲ အာရှဇုန် ပွဲစဉ်-၆ ပွဲကြိုသုံးသပ်ချက်
-
ဒဏ်ရာပြဿနာအချို့ရှိသော်လည်း လက်ဘနွန်နှင့်ပွဲ၌ ရလဒ်ကောင်းမည်ဟု ယုံကြည်ကြောင်း ဦးမျိုးလှိုင်ဝင်း ဆို
-
ဟဲဗီးဝိတ်တန်းလက်ဝှေ့သမား ဟာဆင်ရာမန်ဂျူနီယာနှင့် ဂျိတ်ပေါလ် ပြောင်းလဲထိုးသတ်မည်
-
ရုရှားနိုင်ငံ၌ မူးယစ်ဆေးမှုဖြင့် ဖမ်းဆီးခံထားရသည့် အမျိုးသမီးဘတ်စကက်ဘောသမား ဂရီနာ အပြစ်ရှိကြောင်း ဝန်ခံထွက်ဆို
-
စင်ကာပူအိုးပင်း ကြက်တောင်ပြိုင်ပွဲတွင် သက်ထားသူဇာ လက်ရည်စစ်ပွဲအဆင့်မှ စတင်ယှဉ်ပြိုင်ရမည်
