Top News

တောင်ကိုရီးယား၏စွပ်စွဲပြစ်တင်ခံရသော သမ္မတယွန်းဆော့ယိုသည် ဇန်နဝါရီ ၂၁ ရက်တွင် ဖွဲ့စည်းပုံအခြေခံဥပဒေဆိုင်ရာခုံရုံးကို ပထမဆုံးအကြိမ်ရောက်ရှိလာခဲ့ပြီး ၎င်းအား သမ္မတရာထူးမှ ဖယ်ရှားခြင်းပြုမပြုဆုံးဖြတ်မည့် တရားသူကြီးများနှင့် ပူးပေါင်းဆောင်ရွက်မည်ဟု ပြောကြားခဲ့သည်။

ယွန်းသည် ဒီဇင်ဘာ ၃ ရက်က စစ်အုပ်ချုပ်ရေးအမိန့်ကို ထုတ်ပြန်ကြေညာခဲ့သော်လည်း လွှတ်တော်က ထိုအမိန့်ကို မဲခွဲဆုံးဖြတ်ပြီး ပယ်ချခဲ့သည်။

ထို့နောက် ယွန်းသည် နာရီပိုင်းအတွင်းမှာပင် စစ်အုပ်ချုပ်ရေးအမိန့်ကို ပြန်လည်ရုပ် သိမ်းခဲ့သည်။ လွှတ်တော်ကမူ ယွန်းကို ဒီဇင်ဘာ ၁၄ ရက်တွင် စွပ်စွဲပြစ်တင်ခဲ့ပြီး သမ္မတတာဝန်များ ဆိုင်းငံံ့ခဲ့သည်။   

ယွန်းကမူ ၎င်း၏စွပ်စွဲပြစ်တင်မှုနှင့် ပတ်သက်ပြီး ဖွဲ့စည်းပုံအခြေခံဥပဒေဆိုင်ရာတရားရုံးတွင် အမှုရင်ဆိုင်နေရပြီးအခြားပုန်ကန်မှုစွပ်စွဲချက်များဖြင့် စုံစမ်းစစ်ဆေးခံနေရသည့်တိုင် အဆုံးအထိ တိုက်ပွဲဝင်သွားမည်ဟု ပြောကြားထားသည်။

ယွန်းသည် ပြီးခဲ့သည့်ရက်ပိုင်းက ဖမ်းဆီးခံခဲ့ရပြီး ၎င်းသည် တောင်ကိုရီးယားနိုင်ငံသမိုင်းတွင် ရာထူးလက်ဝယ်ရှိနေစဉ် ဖမ်းဆီးခံရသည့် ပထမဆုံး သမ္မတဖြစ်လာခဲ့သည်။

ပြီးခဲ့သည့်လက  အောင်မြင်ခြင်းမရှိခဲ့သည့် စစ်အုပ်ချုပ်ရေးအမိန့်ကြေညာခဲ့မှုအတွက် စွပ်စွဲပြစ်တင်ခံထားရသည့်ယွန်းကို ဆက်လက်ထိန်းသိမ်းထားရန် တရားသူကြီးတစ်ဦးက ထိန်းသိမ်းခွင့်ကာလကို သက်တမ်းတိုးပေးခဲ့ပြီးနောက် ယွန်းအားထောက်ခံသူများက တရားရုံးကို စီးနင်းတိုက်ခိုက်ခဲ့သည်။

“ကျွန်တော်ဟာ လိုအပ်မယ်ဆိုရင် မေးခွန်းမှန်သမျှကို ဖြေကြားသွားပါမယ်။ ဒါမှမဟုတ် နောက်ထပ် မှတ်ချက်စကားတွေကိုလည်း ပြောမှာဖြစ်ပါတယ်”ဟု ယွန်းက တရားသူကြီးတစ်ဦးကို ပြောကြားခဲ့သည်။

ယွန်းက ၎င်းထုတ်ပြန်သော စစ်အုပ်ချုပ်ရေးအမိန့်ကို အမတ်များမဲခွဲခြင်းမပြုနိုင်ရန် ယင်းအမတ်များကိုလွှတ်တော်ထဲမှ ဆွဲထုတ်ရန် ထိပ်တန်းတပ်မှူးများအား ညွှန်ကြားခဲ့ပါသလားဟု တရားသူကြီးက ယွန်းကို မေးမြန်းခဲ့သည်။

“ညွှန်ကြားခဲ့ခြင်းမရှိပါဘူး”ဟု ယွန်းဆော့ယိုက တရားသူကြီးကို ပြောကြားခဲ့သည်။

တောင်ကိုရီးယားနိုင်ငံ၏တရားဝင်နိုင်ငံတော်အကြီးအကဲအဖြစ် ဆက်လက်ရှိနေသော ယွန်းက အပြာရောင် တရားရေးဝန်ကြီးဌာန ဗန်ကားဖြင့် ထိန်းသိမ်းရေးစခန်းမှ မောင်းဝင်သွားသည်ကို အေအက်ဖ်ပီသတင်း ထောက်များကတွေ့ခဲ့သည်။ ပုန်ကန်မှုအကြောင်းများဖြင့် ပြစ်မှုဆိုင်ရာ စုံစမ်းစစ်ဆေးမှုများ လုပ်ဆောင်နေချိန်တွင် ယွန်းကိုထိန်းသိမ်းရေး စင်တာ၌ ထိန်းသိမ်းထားခြင်းဖြစ်သည်။

ယွန်း၏ဥပဒေဆိုင်ရာအဖွဲ့က ရွေးကောက်ပွဲနှင့်သက်ဆိုင်သော တာဝန်ရှိသူများအပါအဝင် သက်သေများအဖြစ် အနည်းဆုံး လူပုဂ္ဂိုလ် ၂၄ ဦးကို ဆင့်ခေါ်ပေးရန် မေတ္တာရပ်ခံခဲ့သည်ဟု ခုံရုံးပြောရေးဆိုခွင့်ရှိသူ ချောင်ဂျေဟွန်းက သတင်းထောက်များကို ပြောကြားခဲ့သည်။

ယွန်းဆော့ယိုသည် စစ်အုပ်ချုပ်ရေးကြေညာမှုနှင့်စပ်လျဉ်းသေ အကြောင်းအရာများကို ကိုယ်ရေးကိုယ်တာအရ ရှင်းပြပေးလိုပုံရသည်ဟု ယွန်း၏ဥပဒေအဖွဲ့က ပြောကြားခဲ့သည်။

Ref: AFP