Top News

၂၀၂၄ ခုနှစ်အတွင်း အကောင်းဆုံးရုပ်ရှင်များကို ရွေးချယ်ဂုဏ်ပြုသည့် KBS ရုပ်ရှင် ဆုပေးပွဲတွင် အမြင့်ဆုံးဖြစ်သည့် Grand Prize ဆုကို Dog Knows Everything ဇာတ်လမ်းတွဲဖြင့် ၀ါရင့်မင်းသားကြီးလီဆွန်း ဂျယ်က ဆွတ်ခူးသွားသည်။ အသက် ၉၀ အရွယ်လီသည် ယင်းဆုကို ဆွတ်ခူးသူများအနက် အသက်အကြီးဆုံး သရုပ်ဆောင်လည်း ဖြစ်သည်။

Dog Knows Everything တွင် လီဆွန်းဂျယ်က ဆိုဖီအမည်ရှိ ရဲခွေးလေးနှင့်အတူ ထူးခြားဆန်းကြယ်သည့် အမှုများကို ဖြေရှင်းပေးသူ ဇာတ်ကောင်နေရာမှ သရုပ်ဆောင်ထားသည်။

ဆုလက်ခံရယူပြီးနောက် လီက “တစ်နေ့နေ့ အခွင့်အရေးရှိလာမယ်လို့ ကျွန်တော် အမြဲယုံကြည်ခဲ့တာ။ ဒီနေ့တော့ ဒီလိုအဖိုးတန်ဆုကြီး ကျွန်တော်ရလိုက်ပါပြီ။ သရုပ်ဆောင်တာကို သရုပ်ဆောင်တာနဲ့ပဲ အကဲဖြတ်သင့်တာပါ။ လူကြိုက်များတာတွေ တခြားမဆိုင်တဲ့ အချက်တွေနဲ့ မဆုံးဖြတ်သင့်ဘူး”ဟု ပြော  သွားသည်။

ဆက်လက်၍ လီက ယခုရသည့်ဆုသည် ၎င်းအပိုင်မဟုတ် ၊  Dog Knows Everything ရိုက်ကူးရေးတစ်ဖွဲ့ လုံး၏ ပူးပေါင်းကြိုးစားမှုကြောင့်ဟုလည်း ပြောခဲ့သည်။ ရိုက်ကူးရေး လိုအပ်ချက်အရ လီသည် ဝေးလံသည့် နေရာများသို့ အကြိမ် ၂၀ ကျော် ခရီးထွက်ခဲ့ရသည်။

လီဆွန်းဂျယ်သည် ဂါချွန်တက္ကသိုလ်မှ ပါမောက္ခတစ်ဦးလည်းဖြစ်ပြီး ကျောင်းဆရာ ဘဝနှင့် သရုပ်ဆောင် ဘဝကြား ဟန်ချက်ညီအောင် ကြိုးစားနေသည့် ၎င်းအား တပည့်များက “ဘာမှပူမနေပါနဲ့ ဆရာ။ ဇာတ်လမ်းတွဲကိုပဲ အာရုံစိုက်ပါ။ ကျန်တာ ကျွန်တော်တို့ပဲ ကြည့်လုပ်လိုက်ပါမယ်”ဟု အားပေးပြောခဲ့  သည်ဟုလည်း လီက ပရိသတ်ကို ပြောပြသည်။

လီ၏ ကြည်နူးဖွယ်စကားများကြောင့်  ဆုပေးပွဲ တက်ရောက်လာသူ သရုပ်ဆောင်အများစု မျက်ရည်ကျခဲ့ရပြီး လီကိုယ်တိုင်လည်း ငိုခဲ့သည်။ လီ၏ အောင်မြင်မှုများကို ဂုဏ်ပြုသည့်အနေဖြင့် ပရိသတ်က မတ်တတ် ရပ်လျက် လက်ခုပ်သြဘာများ ပေးခဲ့သည်။

အဆိုပါ ရုပ်ရှင်ဆုပေးပွဲကို ၂၀၂၄ ခုနှစ်၊ ဒီဇင်ဘာ ၃၁ ရက်တွင် တိုက်ရိုက်ထုတ်လွှင့် ပြသရန် စီစဉ်ထားပြီးမှ Jeju Air လေယာဉ်ဖြစ်စဉ်ကြောင့် တိုက်ရိုက်ပြသမှုကို ရွှေ့ဆိုင်းလိုက်ကာ ၂၀၂၅ ခုနှစ် ၊ ဇန်နဝါရီ ၁၁ ရက်မှ သာ ထုတ်လွှင့်ပြသခဲ့သည်။