Top News

အင်္ဂလန်လက်ရွေးစင်အသင်း၏ နည်းပြဖြစ်သူ ဆောက်ဂိတ်သည် ပြင်သစ်အသင်းကို ရှုံးနိမ့်ကာ ၂၀၂၂ ကမ္ဘာ့ဖလားပြိုင်ပွဲ၏ ကွာတားဖိုင်နယ်အဆင့်မှ ထွက်ခွာခဲ့ရသော်လည်း အင်္ဂလန်လက်ရွေးစင်အသင်း၏သမိုင်းတွင် နိုင်ငံတကာပြိုင်ပွဲကြီးများ၌ ပွဲအများဆုံးကိုင်တွယ်သည့် နည်းပြအဖြစ်ရော၊ နိုင်ပွဲအများဆုံး ရယူနိုင်သည့် နည်းပြအဖြစ်ပါ ရပ်တည်လျက်ရှိကြောင်း သိရသည်။

ဆောက်ဂိတ်သည် အင်္ဂလန်လက်ရွေးစင်အသင်းကို နိုင်ငံတကာ ပြိုင်ပွဲကြီး (၃)ခုတွင်သာ တာဝန်ယူထားသော်လည်း ယင်းပြိုင်ပွဲကြီး (၃)ခု၌ ဆီမီးဖိုင်နယ်တစ်ကြိမ်၊ ဗိုလ်လုပွဲတစ်ကြိမ်နှင့် ကွာတားဖိုင်နယ်တစ်ကြိမ် တက်ရောက်အောင် စွမ်းဆောင်နိုင်ခဲ့သူဖြစ်သည်။

သူသည် ယခု ကမ္ဘာ့ဖလားပြိုင်ပွဲမတိုင်မီကတည်းက နိုင်ငံတကာပြိုင်ပွဲကြီးများတွင် ပွဲအများဆုံးကိုင်တွယ်သည့် နည်းပြဖြစ်လာရန် အခြေအနေကောင်းနေပြီး အုပ်စုအဖွင့်ပွဲစဉ်အဖြစ် အီရန်အသင်းအား အနိုင်ရရှိသည့်ပွဲကို ကိုင်တွယ်ခဲ့ပြီးသည့်နောက် ဆာဘော်ဘီရော့ဘ်ဆင်၏ (၁၅)ပွဲစံချိန်ကို အမီလိုက်နိုင်ခဲ့ခြင်းဖြစ်သည်။

သူသည် ကွာတားဖိုင်နယ်အဆင့်အထိ နောက်ထပ် (၄)ပွဲကို ဆက်လက်ကိုင်တွယ်ခဲ့ရာ နိုင်ငံတကာပြိုင်ပွဲကြီးများတွင် အင်္ဂလန်အသင်းကို ကိုင်တွယ်သည့်ပွဲအရေအတွက် (၁၉) ပွဲအထိ ရောက်ရှိလာခဲ့ပြီး ထိပ်ဆုံး၌ အပြတ်အသတ် ရပ်တည်နိုင်ခဲ့ခြင်းလည်း ဖြစ်သည်။

ဆောက်ဂိတ်သည် အင်္ဂလန်အသင်းကို ကိုင်တွယ်ခဲ့သည့် ယင်းပွဲစဉ် (၁၉)ပွဲတွင် နိုင်ပွဲရရှိမှုမှာ (၁၁)ပွဲအထိ ရှိခဲ့သည့်အတွက်လည်း ဂန္ထဝင်နည်းပြကြီး ဆာအဲ့လ်ဖ်ရမ်ဆေး၏ နိုင်ပွဲအများဆုံးနည်းပြစံချိန်ကို ကျော်ဖြတ်နိုင်ခဲ့ခြင်းဖြစ်သည်။

ဆာအဲ့လ်ဖ်ရမ်ဆေးသည် နိုင်ငံတကာပြိုင်ပွဲကြီးများတွင် အင်္ဂလန်အသင်းအတွက် နိုင်ပွဲ(၈)ပွဲ ရယူနိုင်ခဲ့ပြီး ဆောက်ဂိတ်ကမူ နိုင်ပွဲ (၁၁)ပွဲအထိ ရယူနိုင်ခဲ့ခြင်းဖြစ်သည်။

နိုင်ပွဲရာခိုင်နှုန်းအနေဖြင့်မူ ဆာအဲ့လ်ဖ်ရမ်ဆေးက (၁၂)ပွဲတွင် (၈)ပွဲအထိ အနိုင်ရခဲ့ခြင်းဖြစ်သဖြင့် ဆောက်ဂိတ်ထက် ပိုမိုမှတ်တမ်းကောင်းခဲ့သည်။

■ အင်္ဂလန်နည်းပြများ၏ နိုင်ငံတကာပြိုင်ပွဲမှတ်တမ်း

အမည်            ပွဲ    နိုင်    သရေ     ရှုံး

ဆောက်ဂိတ်         ၁၉    ၁၁    ၄    ၄

ဆာ်ဘော်ဘီရော့ဘ်ဆင်    ၁၅     ၅     ၄     ၆

အဲရစ်ဆင်            ၁၄     ၇     ၅     ၂

ဆာဝင်တာဘော်တန်        ၁၄     ၃     ၅     ၆

ဆာအဲ့လ်ဖ်ရမ်ဆေး        ၁၂     ၈     ၁     ၃

ရွိုင်းဟော့ဒ်ဆန်        ၁၁     ၃     ၅     ၃

ရော်နယ်လ်ဂရင်းဝုဒ်        ၈     ၄     ၃     ၁