Top News

ထိုင်းနိုင်ငံတွင် ကိုရိုနာဗိုင်းရပ်စ် ကူးစက်ပျံ့နှံ့မှုသည် နောက်ထပ်လအနည်းငယ်အထိ ဆက်လက်ဖြစ်ပွားနေပါက အလုပ်အကိုင် ၁၀ သန်းအထိ ဆုံးရှုံးဖွယ်ရှိကြောင်း စီးပွားရေးအကြံပေးကောင်စီတစ်ခုက ဧပြီ ၁၃ တွင် ထုတ်ပြန်ခဲ့သည်။

အရှေ့တောင်အာရှ၏ စီးပွားရေး ဒုတိယအင်အားအကြီးဆုံးနိုင်ငံသည် ဗိုင်းရပ်စ်ကူးစက်ပျံ့နှံ့မှုကြောင့် အထိနာနေပြီဖြစ်ပြီး စီးပွားရေးကျဆင်းမှုသို့ ဦးတည်နေသည်။

လတ်တလောတွင် အလုပ်အကိုင် ၇ သန်းခန့် ဆုံးရှုံးခဲ့ပြီဖြစ်ပြီး ထိုကူးစက်ပျံ့နှံ့မှုသည် နောက်ထပ် ၂ လ မှ ၃ လ အထိ ဆက်လက်ရှည်ကြာနေလျှင် အလုပ်အကိုင်ဆုံးရှုံးမှုသည် ၁၀ သန်းအထိ ရှိလာမည်ဖြစ်ကြောင်း ထိုင်းကုန်သည်ကြီးများ အသင်းခေါင်းဆောင်နှင့် အဖွဲ့ဝင်တစ်ဦးဖြစ်သူ ကာလင်းဆာရာဆင်က ပြောကြားခဲ့သည်။

ထိုင်းတွင် လုပ်သားအင်အားထုသည် ၃၈ သန်းခန့်ရှိသည်။

အစိုးရနှင့် စီးပွားရေးအေဂျင်စီများ၏ ကောင်စီသည် အစိုးရထံ ထောက်ပံ့ရေးဆိုင်ရာ ဆောင်ရွက်ချက်များ အဆိုမပြုမီ ထိုဆောင်ရွက်ချက်များအတွက် မေတ္တာရပ်ခံမှုကို ဆွေးနွေးခဲ့ကြောင်း ကောင်စီဥက္ကဌ တိုဆာပွန်း စီရီဆမ်းဟန်က ပြောကြားခဲ့သည်။ အစိုးရထံ အကူအညီတောင်းခံမှုများတွင် အတိုးနှုန်းသက်သာချေးငွေများ၊ အခွန်လျှော့ချမှုများနှင့် အလုပ်အကိုင်များပြန်လည်ရရှိရန် ဘဏ္ဍာရေးထောက်ပံ့မှုများ ပါဝင်မည်ဖြစ်ကြောင်း ၎င်းက ပြောကြားခဲ့သည်။

ထိုင်းနိုင်ငံတွင် ဧပြီ ၁၃ အထိ ကိုရိုနာဗိုင်းရပ်စ်ကူးစက်သူ ၂၅၇၉ ဦးရှိပြီဖြစ်ပြီး သေဆုံးသူ ၄၀ ရှိကာ နိုင်ငံတစ်ဝန်းတွင် ညမထွက်ရကာဖျူးမိန့် ထုတ်ပြန်ထားသည်။