Top News

တောင်ကိုရီးယားတွင် ဗိုင်းရပ်စ်ကူးစက်ပျံ့နှံ့မှုသစ်များအား ကြိုတင်ကာကွယ်ရန် ရည်ရွယ်သော တင်းကျပ်သည့် ကန့်သတ်မှုများကို ဖြေလျှော့ပေးရန် မကြာမီစီစဉ်သွားမည်ဖြစ်ကြောင်း တာဝန်ရှိသူများက ပြောကြားခဲ့သော်လည်း COVID-19 ကင်းစင်သွားပြီဖြစ်ကြောင်း ကနဦးတွင် ကြေညာခဲ့သူ ၁၁၆ ဦးထက်မနည်းတွင် Positive ရလဒ် ပြန်လည်ထွက်ပေါ်ခဲ့ကြောင်း တာဝန်ရှိသူများက ဧပြီ ၁၃ တွင် ပြောကြားခဲ့သည်။

တောင်ကိုရီးယားတွင် ဧပြီ ၁၃ ၌ ဗိုင်းရပ်စ်ကူးစက်သူသစ် ၂၅ ဦးသာ ရှိခဲ့သော်လည်း ရောဂါမှ ကောင်းမွန်သော်လည်း Positive ရလဒ် ပြန်လည်ထွက်ပေါ်သူအရေအတွက် မြင့်တက်လာမှုကြောင့် စိုးရိမ်မှုများကို ကြီးမားစေခဲ့သည်။

ထိုလူနာများသည် ဗိုင်းရပ်စ်ပြန်လည်ကူးစက်ခံရမှုထက် ဗိုင်းရပ်စ်က ပြန်လည်ထကြွလာခြင်းဖြစ်ဖွယ်ရှိကြောင်း ကိုရီးယားရောဂါထိန်းချုပ်ရေးနှင့် ကာကွယ်ရေးစင်တာ (KCDC) ညွှန်ကြားရေးမှူး Jeong Eun-Kyeong က ပြောကြားခဲ့သည်။

စမ်းသပ်စစ်ဆေးမှုများတွင် ချွတ်ယွင်းချက်များက Positive ရလဒ် ဖြစ်ပေါ်မှုတွင် အချက်တစ်ချက်အဖြစ် ပါဝင်ဖွယ်ရှိကြောင်း သို့မဟုတ် ဗိုင်းရပ်စ်၏ အကြွင်းအကျန်များက လူနာ၏စနစ်များထဲတွင် ကျန်နေဆဲဖြစ်ဖွယ်ရှိကြောင်း အခြားကျွမ်းကျင်သူများက ပြောကြားခဲ့သော်လည်း ယင်းသည် ထိုလူနာ သို့မဟုတ် အခြားသူများကို ကူးစက်မှု သို့မဟုတ် အန္တရာယ်ဖြစ်မှုမရှိကြောင်း ဆိုခဲ့သည်။

ဗိုင်းရပ်စ်ကူးစက်လူနာများ ပြန်လည်ကောင်းမွန်ပြီးမှ Positive ရလဒ် ပြန်လည်ထွက်ပေါ်သူ အရေအတွက်သည် ပြီးခဲ့သော သီတင်းပတ်က ၅၁ ဦးသာရှိရာမှ ယခုအခါ ၁၁၆ ဦးအထိ ရှိလာခဲ့ခြင်းဖြစ်သည်။

အမေရိကန်သမ္မတ ဒေါ်နယ်ထရန့်၏ မေတ္တာရပ်ခံမှုအပြီး တောင်ကိုရီးယားက အမေရိကန်သို့ ဗိုင်းရပ်စ် စမ်းသပ်စစ်ဆေးကိရိယာ ၆ သိန်းကို ဧပြီ ၁၄ တွင် ပေးပို့ရန် စီစဉ်ထားကြောင်း တောင်ကိုရီးယားအစိုးရ တာဝန်ရှိသူတစ်ဦးက ပြောကြားခဲ့သည်