Top News

အမေရိကန်လေယာဉ်တင်သင်္ဘော USS Theodore Roosevelt မှ သင်္ဘောသားတစ်ဦးသည် COVID-19 ကြောင့် ဧပြီ ၁၃ က သေဆုံးခဲ့ကြောင်း အမေရိကန်ရေတပ်က ပြောကြားခဲ့သည်။

ယင်းသင်္ဘောသားတွင် ဗိုင်းရပ်စ် ကူးစက်ခံထားရသည်ကို မတ် ၃၀ က အတည်ပြုခဲ့ပြီး ဧပြီ ၉ တွင် သတိမရတော့သောကြောင့် ဂူအမ်ရှိ ရေတပ်ဆေးရုံမှ အထူးကြပ်မတ်ကုသဆောင်သို့ ပြောင်းရွှေခဲ့သည်။

Roosevelt သည် ပစိဖိတ်အနောက်ခြမ်းတွင်ရှိသော အမေရိကန်လေယာဉ်တင် သင်္ဘောနှစ်စင်းအနက် တစ်စင်းဖြစ်ပြီး လောလောဆယ်တွင် ဂူအမ်၌ဆိုက်ကပ်ထားသည်။ ယင်းသင်္ဘောတွင် ဗိုင်းရပ်စ် ကူးစက်ခံထားရသူ ၆၀၀ နီးပါးရှိကြောင်း အတည်ပြုထားသည်။

သင်္ဘောတွင် အမှုထမ်းအများစု ဗိုင်းရပ်စ် ကူးစက်ခံထားရကြောင်း Roosevelt ၏ ကပ္ပတိန် ဘရက်ခရိုဇီယာက သတိပေးခဲ့မှု အများပြည်သူထံ ပေါက်ကြားခဲ့ပြီးနောက် ၎င်းအား ရေတပ်ဦးစီးချုပ် တောမတ်စ်မိုဒလီက ရာထူးမှထုတ်ပယ်ခဲ့သည်။ ခရိုဇီယာသည် Roosevelt သင်္ဘောကို မတ် ၂၇ တွင် ဂူအမ်၌ ဆိုက်ကပ်ခဲ့ပြီး သင်္ဘောအမှုထမ်း ၄,၈၀၀ အနက်အများစုကို ဘေးလွတ်ရာ ရွှေ့ပြောင်းရန်ကြိုးပမ်းခဲ့သော်လည်း အထက်အရာရှိများက ယင်းအစီအစဉ်ကို ပယ်ချခဲ့သည်။ သင်္ဘော၌ ကူးစက်ခံရသူ ၁၀၀ နီးပါးထိ ရှိလာချိန်တွင် ခရိုဇီယာက ကူးစက်မှုအကြောင်းကို အထက်အရာရှိများအား လိပ်မူ၍ စာရေးခဲ့ပြီး ယင်းစာသည် ၎င်း၏ဇာတိ ဆန်ဖရန်စစ္စကိုမှ သတင်းစာ ဆန်ဖရန်စစ္စကိုခရော်နီကယ်သို့ ပေါက်ကြားခဲ့သည်။ ထို့နောက် ဧပြီ ၂ တွင် ခရိုဇီယာအား ရာထူးမှဖယ်ရှားကြောင်း မိုဒလီက ကြေညာခဲ့သည်။

Roosevelt သင်္ဘော၌ ကူးစက်ခံရသူ ဦးရေသည် ဆက်လက်မြင့်တက်ခဲ့ပြီး သင်္ဘောပါ လူအားလုံး၏ ၉၂ ရာခိုင်နှုန်းကို စမ်းသပ်စစ်ဆေးခဲ့ရာ ခရိုဇီယာအပါအဝင် ၅၈၅ ဦး ဗိုင်းရပ်စ် ကူးစက်ခံထားရကြောင်း ရေတပ်က ထုတ်ပြန်ခဲ့သည်။ အမေရိကန်စစ်စခန်း ၁၅၀ နှင့် စစ်သင်္ဘောအများအပြားတွင် ကိုရိုနာဗိုင်းရပ်စ် ကူးစက်ခံထားရကြောင်း သတင်းများထွက်ပေါ်ထားပြီး ပင်တဂွန်၏ ကာကွယ်ရေးဝန်ထမ်း၊ မိသားစုနှင့် အရပ်သားဝန်ထမ်းနှင့်ကန်ထရိုက်တာများအနက် ၄,၅၂၈ ဦး ကူးစက်ခံထားရကြောင်း ဧပြီ ၁၃ က ထုတ်ပြန်ခဲ့သည်။