Top News

ကိုရိုနာဗိုင်းရပ်စ်ကြောင့် လူဦးရေ ၁.၃ ဘီလျံရှိသော အိန္ဒိယတစ်နိုင်ငံလုံးအား ပိတ်ဆို့ကန့်သတ်ထားမှုကို မေ ၃ အထိ သက်တမ်းတိုးကြောင်း ဝန်ကြီးချုပ်မိုဒီက ဧပြီ ၁၄ တွင် ကြေညာခဲ့သည်။

ကမ္ဘာတွင် အကြီးမားဆုံးသော ယင်းပိတ်ဆို့မှုသည် ဆင်းရဲသား သန်းပေါင်းများစွာအား အလုပ်အကိုင်နှင့် ဝင်‌ငွေ ဆုံးရှုံးသွားစေခဲ့သောကြောင့် ဝေဖန်မှုများ ရှိနေချိန်တွင် ပိတ်ဆို့ထိန်းချုပ်မှုကို အစိုးရက သက်တမ်းတိုးခဲ့ခြင်း ဖြစ်သည်။

မတ် ၂၅ က စတင်အာဏာသက်ဝင်ခဲ့သော ယင်းပိတ်ဆို့မှုသည် ဧပြီ ၁၄ ညတွင် သက်တမ်းကုန်မည်ဖြစ်သည်။

ကိုရိုနာဗိုင်းရပ်စ် ကူးစက်မှု ဆိုးရွားခြင်းမရှိသော နေရာများတွင်သာ ပိတ်ဆို့မှုကို လျှော့ပေါ့ပေးမည်ဟု မိုဒီက ရုပ်သံမှ ကြေညာခဲ့သည်။

နိုင်ငံတွင်း ဆေးဝါးနှင့်အစားအစာ ပြတ်လပ်မှု မရှိကြောင်း၊ ပြည်သူများကို ထိထိရောက်ရောက် ဖြန့်ဖြူးပေးမည် ဖြစ်ကြောင်း မိုဒီက ကတိပေးခဲ့သည်။

အိန္ဒိယတွင် ဧပြီ ၁၄ အထိ ကူးစက်ခံရသူ ၉,၀၀၀ ကျော်ရှိပြီး ၃၃၉ ဦးသေဆုံးထားသည်။ ပြည်နယ် ၁၅ ပြည်နယ်ရှိ ခရိုင် ၂၅ ခုတွင် ပြီးခဲ့သည့် ၁၄ ရက်အတွင်း ကူးစက်မှုအသစ် မရှိကြောင်း ဧပြီ ၁၃ တွင် အိန္ဒိယကျန်းမာရေးဝန်ကြီးဌာနက ကြေညာခဲ့သည်။

 ကိုရိုနာဗိုင်းရပ်စ်အရေး အာဆီယံခေါင်းဆောင်များ ဗီဒီယိုကွန်ဖရင့်ဆွေးနွေးပွဲ ကျင်းပ

ကိုရိုနာဗိုင်းရပ်စ်ကြောင့် အာဆီယံ၏ခရီးသွားလုပ်ငန်းနှင့် ပို့ကုန်အခြေပြုစီးပွားရေးကို ထိခိုက်နေသောကြောင့် ကိုရိုနာဗိုင်းရပ်စ်အတွက် အရေးပေါ်ရန်ပုံငွေ ထူထောင်ရန် အာဆီယံခေါင်းဆောင်များကို ဗီဒီယိုကွန်ဖရင့်ထိပ်သီးတွင် ဗီယက်နမ်က တိုက်တွန်းလှုံ့ဆော်ခဲ့သည်။

ဗီယက်နမ်သည် အာဆီယံ၏ယခုနှစ်အလှည့်ကျဥက္ကဋ္ဌဖြစ်ပြီး ခေါင်းဆောင်များ လူကိုယ်တိုင်တက်ရောက်မည့် ထိပ်သီးကို ဇွန်လသို့ ရွှေ့ဆိုင်းထားခဲ့သည်။

ကျယ်ကျယ်ပြန့်ပြန့် ခွဲခြားထိန်းသိမ်းမှုနှင့် လူမှုရေးဆိုင်ရာ ခွာခွာကင်းကင်းနေထိုင်မှုတို့ကို ထိရောက်စွာ ဆောင်ရွက်နိုင်မှုကြောင့် ဗိုင်းရပ်စ်ကို ထိန်းချုပ်မှု အောင်မြင်နေသည့်အကြောင်းကို ဗီယက်နမ်က အမွှမ်းတင်ပြောကြားခဲ့သည်။ ဗီယက်နမ်တွင် ဗိုင်းရပ်စ်ကူးစက်ခံထားရသူ ၂၆၅ ဦးရှိပြီး သေဆုံးသူ မရှိပေ။

စမ်းသပ်စစ်ဆေးမှုများ ကျယ်ကျယ်ပြန့်ပြန့်ဆောင်ရွက်ခဲ့မှုကြောင့် အင်ဒိုနီးရှားနှင့်ဖိလစ်ပိုင်အပါအဝင် အာဆီယံနိုင်ငံများတွင် ဗိုင်းရပ်စ် ကူးစက်မှုများ အမြောက်အမြား စစ်ဆေးတွေ့ရှိနေသည်။ လူဦးရေ သန်း ၂၆၀ ရှိသော အင်ဒိုနီးရှားတွင် ဗိုင်းရပ်စ်ကူးစက်ခံထားရသူ ၄၅၀၀ ကျော်နှင့် သေဆုံးသူ ၄၀၀ အောက်သာ ရှိပြီး စမ်းသပ်စစ်ဆေးမှု အကန့်အသတ်နှင့်သာ ဆောင်ရွက်နိုင်စွမ်းကြောင့် ကူးစက်မှု တွေ့ရှိခြင်း နည်းနေခြင်း ဖြစ်နိုင်သည်ဟု စိုးရိမ်နေကြသည်။