Top News

ဥရောပစူပါလိဂ်နှင့်ပတ်သက်၍ အားပြိုင်မှုများရှိနေပြီး ရီးယဲလ်နှင့် ဘာစီလိုနာအသင်းက ထောက်ခံသော်လည်း မန်ယူ၊ မန်စီးတီး၊ ချယ်လ်ဆီး၊ အာဆင်နယ်၊ ဘိုင်ယန် မြူးနစ်၊ PSG စသည့် ထိပ်တန်းကလပ်များ အပါအဝင် လိဂ်ပြိုင်ပွဲနှင့် အဖွဲ့အစည်းများ က ဆန့်ကျင်ကြောင်း ထုတ်ပြန်ခဲ့ကြသည်။

ဥရောပတရားရုံး (ECJ) က ဥရောပစူပါလိဂ်တွင် သွားရောက်ယှဉ်ပြိုင်မည့် ကလပ် အသင်းများအား ဥရောပဘောလုံးအဖွဲ့ချုပ် (UEFA) နှင့် ကမ္ဘာ့ဘောလုံးအဖွဲ့ချုပ် (FIFA) တို့က တားမြစ်ပိတ်ပင်ခြင်းမှာ တရားမဝင်ဘဲ အခွင့်အာဏာအလွဲသုံးစားပြုလုပ်ခြင်းဖြစ်ကြောင်း ဒီဇင်ဘာ ၂၁ ရက်တွင် ဆုံးဖြတ်ခဲ့သည်။ 

ECJ ၏ ဆုံးဖြတ်မှုအရ ဘောလုံး ပြိုင်ပွဲအသစ်ကျင်းပရန် FIFA နှင့် UEFA တို့၏စည်းမျဉ်းအတိုင်း ကြိုတင်ခွင့်ပြုချက် ရယူရန် လိုအပ်သော်လည်း ကစားသမားများအား ယင်းပြိုင်ပွဲတွင် ပါဝင်ယှဉ်ပြိုင်ခွင့် တားမြစ်ပိတ်ပင်ခြင်းမှာ တရားမဝင်ကြောင်း သိရသည်။ အဆိုပါဆုံးဖြတ်ချက်ထွက်ပေါ်လာပြီးနောက် နာရီပိုင်းအကြာမှာပင် ဥရောပစူပါလိဂ်ပြိုင်ပွဲကျင်းပမည့် A22 Sports Management ၏ အမှုဆောင်ချုပ် ဘန်းဟိုင်ရှက်က ကလပ်အသင်း ၆၄ သင်းနှင့် လိဂ်ပြိုင်ပွဲသုံးခု ပါဝင်မည့် အမျိုးသားပြိုင်ပွဲ၊ ကလပ်အသင်း ၃၂ သင်းနှင့် လိဂ်ပြိုင်ပွဲနှစ်ခုပါဝင်မည့် အမျိုးသမီးပြိုင်ပွဲအစီအစဉ်ကို မိတ်ဆက်ကြေညာခဲ့သည်။

ဥရောပစူပါလိဂ်ကျင်းပရန် ဦးဆောင်ပါဝင်ပြီး လက်ရှိအချိန်အထိ နုတ်ထွက်ခြင်း မရှိသေးသည့် စပိန်ထိပ်သီးကလပ် ရီးယဲလ်မက်ဒရစ်နှင့် ဘာစီလိုနာအသင်းက ယခုထုတ်ပြန်သည့် ပြိုင်ပွဲအစီအစဉ်ကို ထောက်ခံကြောင်း ကြေညာချက်ထုတ်ပြန်ခဲ့သည်။ သို့ သော် မန်ယူ၊ မန်စီးတီး၊ ချယ်လ်ဆီး၊ အာဆင်နယ်၊ ဘိုင်ယန်မြူးနစ်၊ PSG စသည့် ထိပ်တန်း ကလပ်များအပါအဝင် FIFA ၊ UEFA ၊ နိုင်ငံတကာ ကစားသမားများသမဂ္ဂ (FIFPRO) ၊ ဥရောပကလပ်အသင်းများအဖွဲ့ချုပ် (ECA) စသည့် အဖွဲ့အစည်းများကမူ ပြိုင်ပွဲအသစ်ကျင်းပမည့်အစီအစဉ်ကို လက်မခံကြောင်း တုံ့ပြန်ကြေညာခဲ့သည်။ ထို့ပြင် ပရီးမီးယားလိဂ်၊ ဘွန်ဒစ်လီဂါ၊ လာလီဂါ၊ လီဂူး-၁ နှင့် အီတလီဘောလုံးအဖွဲ့ချုပ်တို့ကလည်း စူပါလိဂ်ကို ထောက်ခံခြင်းမရှိကြောင်း ထုတ်ပြန်ခဲ့ကြသည်။

"FIFA နဲ့ UEFA တို့က စူပါလိဂ်ဖွဲ့စည်းခြင်းအပေါ် တားမြစ်မှုကို ဥရောပတရားရုံးက ဥရောပသမဂ္ဂဥပဒေအရ ဆုံးဖြတ်ချက်ချခဲ့ပေမဲ့ မန်ချက်စတာယူနိုက်တက်အနေနဲ့ UEFA က ဦးဆောင်ကျင်းပတဲ့ပြိုင်ပွဲတွေမှာ ပါဝင်ကစားဖို့ ကတိကဝတ် ပြုထားပြီးဖြစ်ပါတယ်။ အသင်းရဲ့ ရပ်တည်ချက်က မပြောင်းလဲပါဘူး။ UEFA ရဲ့ ပြိုင်ပွဲတွေမှာ ပါဝင်ယှဉ်ပြိုင်မယ့် ကတိကဝတ်ကို အပြည့်အဝလိုက်နာသွားမှာပါ။ ဥရောပပြိုင်ပွဲတွေ ဆက်လက်ဖွံ့ဖြိုးတိုးတက်မှုအတွက် UEFA ၊ ပရီးမီးယားလိဂ်နဲ့ ECA ကတစ်ဆင့် အပြုသဘောဆောင်တဲ့ ပူးပေါင်းဆောင်ရွက်မှုတွေ ပြုလုပ်သွားမှာပါ" ဟု မန်ယူအသင်း၏ ထုတ်ပြန်ချက်တွင် ဖော်ပြထားသည်။

A22 Sports Management ၏ ထုတ် ပြန်မှုအရ အားကစားပြိုင်ပွဲများ ထုတ်လွှင့်ပြသမည့် ပလက်ဖောင်းတစ်ခုတည်ထောင်၍ စူပါလိဂ်ပွဲစဉ်အားလုံးကို အခမဲ့ပြသမည် ဖြစ်ကြောင်း၊ စူပါလိဂ်၏ဝင်ငွေကို ကြော်ငြာ၊ စပွန်ဆာနှင့် ပရီမီယံစာရင်းသွင်းမှုများမှတစ် ဆင့် လည်ပတ်မည်ဖြစ်ကြောင်း၊ ပါဝင်ယှဉ်ပြိုင်မည့် ကလပ်အသင်းများအနေဖြင့် ပထမသုံးနှစ်အတွက် ဝင်ငွေအာမခံချက်ရရှိမည်ဖြစ်ပြီး အနည်းဆုံး ယူရိုသန်း ၄၀၀ ရရှိမည်ဖြစ်ကြောင်း သိရသည်။

ဥရောပစူပါလိဂ် ကျင်းပမည့်ပုံစံ

■ အမျိုးသားပြိုင်ပွဲကို ၆၄ သင်း၊ အမျိုးသမီးပြိုင်ပွဲ ကို ၃၂ သင်းဖြင့် ကျင်းပမည်။

■ အမျိုးသားပြိုင်ပွဲတွင် ၁၆ သင်းစီပါဝင်သည့် Star နှင့် Gold လိဂ်၊ ၃၂ သင်းပါဝင်မည့် Blue လိဂ်ပြိုင်ပွဲ သုံးခုပါဝင်မည်။

■ လိဂ်ပြိုင်ပွဲများအကြား တန်းတက်၊တန်းဆင်း စနစ်ပါဝင်ပြီး ပြည်တွင်းလိဂ်ပြိုင်ပွဲ စွမ်းဆောင်မှုအပေါ် မူတည်၍ Blue လိဂ်တွင် ယှဉ်ပြိုင်ခွင့်ရမည့်အသင်းများ ဝင်ခွင့်ပြုမည်။

■ ကလပ်အသင်းများအား ရှစ်သင်း တစ်အုပ်စု ခွဲခြား၍ အိမ်ကွင်း၊ အဝေးကွင်းစနစ်ဖြင့် တစ်နှစ်လျှင် အနည်းဆုံး ၁၄ ပွဲစီ ကြားရက်များတွင် ကစားရမည်။

■ ရာသီကုန်ချိန်တွင် ရှစ်သင်းစီကို ရှုံးထွက်အဆင့် ဆက်လက်ကစားစေ၍ လိဂ်တစ်ခုစီ၏ ချန်ပီယံအဖြစ် သတ်မှတ်မည်။

■ အမျိုးသမီးပြိုင်ပွဲတွင် Star နှင့် Gold လိဂ် အဖြစ် ၁၆ သင်းစီပါဝင်ပြီး အမျိုးသားပြိုင်ပွဲပုံစံအတိုင်း ကျင်းပမည်။