Top News

စီးရီးအေထိပ်သီးကလပ် အေစီမီလန်အသင်းသည် လက်ရှိ ၂၀၂၃ ခုနှစ်အတွင်း ပြိုင်ပွဲစုံပေးဂိုး (၆၄)ဂိုးအထိခွင့်ပြုထားရပြီး ၁၉၃၀ ခုနှစ်နောက်ပိုင်း အသင်းသမိုင်းတစ်လျှောက် ပြက္ခဒိန်တစ်နှစ်အတွင်း ပေးဂိုးအများဆုံး စံချိန်မှတ်တမ်းဆိုးကို ပိုင်ဆိုင်ခဲ့ကြောင်းသိရသည်။

အေစီမီလန်အသင်းသည် ၂၀၂၃ ခုနှစ်အတွင်း စီးရီးအေ၊ ချန်ပီယံလိဂ်၊ ကိုပါအီတာလီယာနှင့် အီတလီစူပါဖလားအစရှိသည့် ပြိုင်ပွဲ (၄)ခုတွင် ပွဲစဉ်ပေါင်း (၅၄)ပွဲကစားခဲ့ရာ၌ (၆၄)ဂိုးအထိခွင့်ပြုခဲ့ရခြင်းဖြစ်ပြီး အသင်းသမိုင်းတစ်လျှောက် အဆိုးရွားဆုံးခံစစ်အဖြစ် မှတ်တမ်းဝင်ခဲ့ခြင်း ဖြစ်သည်။

အေစီမီလန်အသင်းသည် လက်ရှိနည်းပြ ပီအိုလီလက်အောက်တွင် စကူဒက်တိုချန်ပီယံဆုအားတစ်ကျော့ပြန်ရယူနိုင်ခဲ့သလို၊ ချန်ပီယံလိဂ်တွင် ဆီးမီးဖိုင်နယ်သို့တက်ရောက်ပြီး ပုံစံကောင်းကိုပြသနိုင်ခဲ့သော်လည်း အသင်း၏ခံစစ်ပိုင်းအားနည်းမှုနှင့်အတူ စံချိန်တင်ပေးဂိုးများကိုခွင့်ပြုခဲ့ရခြင်းဖြစ်သည်။

အေစီမီလန်အသင်းသည် ယခုရာသီစီးရီးအေ ပွဲစဉ် (၁၇)ပွဲကစားပြီးချိန်တွင် ပေးဂိုး (၂၀) ဂိုးဖြင့် အမှတ်ပေးဇယားထိပ်ဆုံး (၆)သင်း၌ ပေးဂိုးအများဆုံးအသင်းအဖြစ်ရပ်တည်နေသလို၊ ချန်ပီယံလိဂ်တွင်လည်း အုပ်စုပွဲစဉ် (၆)ပွဲကစားပြီး ချိန်တွင် ပေးဂိုး(၈)ဂိုးအထိခွင့်ပြုခဲ့ရကြောင်းသိရသည်။

လက်ရှိတွင် အေစီမီလန်အသင်း၏ စွမ်းဆောင်ရည်ကျဆင်းမှုများကြောင့် နည်းပြပီအိုလီနှင့် အနာဂတ်အဆင်မပြေမှုများဖြစ်ပေါ်နေသလို၊ အသင်းတာဝန်ရှိသူများအနေဖြင့်လည်း လာမည့်ဇန်နဝါရီအပြောင်းအရွှေ့ကာလအတွင်း ခံစစ်ကစားသမားသစ်များထပ်မံခေါ်ယူသွားရန် ပြင်ဆင်နေကြောင်း အီတလီမီဒီယာများက ဖော်ပြခဲ့ကြသည်။