Top News

စီးရီးအေလက်ရှိချန်ပီယံနာပိုလီအသင်းသည် ဥရောပထိပ်တန်းအသင်းကြီးများမှ အပြိုင်ပစ်မှတ်ထားနေသည့် အသင်း၏ အဓိကတိုက်စစ်မှူး အိုဆင်မန်အား ၂၀၂၆ နွေရာသီအထိ သက်တမ်းရှိမည့် စာချုပ်သစ်ချုပ်ဆိုခဲ့ကြောင်း အတည်ပြုကြေညာခဲ့ပြီး စာချုပ်ဖျက်သိမ်းကြေးမှ ယူရိုသန်း (၁၃၀) ဖြစ်ကြောင်းသိရသည်။

အသက် (၂၄)နှစ်အရွယ်ရှိ နိုင်ဂျီးရီးယားလက်ရွေးစင်တိုက်စစ်မှူး အိုဆင်မန်သည် ပြီးခဲ့သည့် ဒီဇင်ဘာ (၂၄) ရက်နေ့က နာပိုလီအသင်းနှင့် တစ်နှစ်သက်တမ်းတိုးစာ ချုပ်ချုပ်ဆိုခဲ့ခြင်းဖြစ်ပြီး ၎င်းနှင့်ပတ်သက်သည့် အပြောင်းအရွှေ့သတင်းများကို တိတ်ဆိတ်စေခဲ့သည်။

အိုဆင်မန်သည် ယခုရာသီအစောပိုင်းက နာပိုလီအသင်းနည်းပြဟောင်း ရူဒီဂါစီယာနှင့် ဆက်ဆံရေးအဆင်မပြေခဲ့ခြင်းနှင့်အတူ လာမည့် ၂၀၂၄ နွေရာသီတွင် အသင်းမှထွက်ခွာတော့မည်ဟု သတင်းများထွက်ပေါ်ခဲ့သော်လည်း နည်းပြ အပြောင်းအလဲဖြစ်ခဲ့ပြီးနောက် အသင်းနှင့်စာချုပ်သစ် ထပ်မံချုပ်ဆိုခဲ့ခြင်းဖြစ်သည်။

၂၀၂၀ နွေရာသီအပြောင်းအရွှေ့က လိုင်လီအသင်းမှ နာပိုလီအသင်းသို့ပြောင်းရွှေ့ လာခဲ့သူ အိုဆင်မန်သည် ဒဏ်ရာပြဿနာများအကြားမှ နာပိုလီအသင်း၏ အဓိကတိုက်စစ်မှူးအဖြစ် ခြေစွမ်းပြခဲ့သူဖြစ်ပြီး ပြီးခဲ့သည့် ၂၀၂၂-၂၃ ရာသီက အသင်းအတွက် နှစ်ပေါင်း (၃၀)ကြာဝေးကွာနေသည့် စကူဒက်တိုချန်ပီယံဆုအား တစ်ကျော့ပြန်ရယူပေးနိုင်ခဲ့သလို၊ စီးရီးအေပြိုင်ပွဲ၏ တစ်နှစ်တာအကောင်းဆုံးကစားသမားဆုကိုလည်း ရယူနိုင်ခဲ့သူဖြစ်သည်။

ထို့ပြင် အိုဆင်မန်သည် ယခုဒီဇင်ဘာ အစောပိုင်းကလည်း ဆာလာနှင့် ဟာကီမီတို့ကိုကျော်ဖြတ်ကာ ၂၀၂၃ ခုနှစ်အတွက် အာဖရိကတစ်နှစ်တာအကောင်းဆုံးကစားသမားဆုကိုပထမဆုံးအကြိမ်ရယူနိုင်ခဲ့သလို ဘောလုံးကမ္ဘာ၏ အလားအလာအရှိဆုံး တိုက်စစ်မှူးအဖြစ် သတ်မှတ်ခံထားရသူလည်းဖြစ်သည်။

ထို့ကြောင့် နာပိုလီအသင်းသည် ၎င်းတို့၏အဓိက ကစားသမားအား အလွယ်တကူလက်မလွှတ်ရစေရန်အတွက် စာချုပ်သစ်ချုပ်ဆိုခဲ့ခြင်းဖြစ်ပြီး၊ ယင်းစာချုပ်သစ်အရ အိုဆင်မန်အားခေါ်ယူလိုသည့် စီးရီးအေပြင်ပကလပ်အသင်းများအနေဖြင့် စာချုပ်ဖျက်သိမ်းကြေး အနည်းဆုံး ယူရိုသန်း (၁၃၀)ပေးချေရမည်ဖြစ်ကြောင်းသိရသည်။

နာပိုလီနှင့် အိုဆင်မန်၏ စာချုပ်သစ်နှင့်ပတ်သက် ၍ ကစားသမား၏ အေးဂျင့်ဖြစ်သူ ရောဘတ်တိုကာလန် ဒါက "ကျွန်တော့်အနေနဲ့တော့ အိုဆင်မန်ရဲ့စာချုပ်သစ်ဟာ အီတလီဘောလုံးလောကအတွက် သမိုင်းဝင်အခိုက်အတန့်တစ်ခုလို့ပဲ ဖွဲ့ဆိုချင်ပါတယ်။ သူ (အိုဆင်မန်)ဟာ ဒဏ်ရာတွေအပြင်းအထန်ရရှိခဲ့ပေမယ့် သွင်းဂိုးတွေနဲ့ပြန်လာခဲ့ပြီး ဖြစ်နိုင်ဖို့ခက်တဲ့အောင်မြင်မှုတွေကို ပုံဖော်တည်ဆောက်နိုင်ခဲ့သူပါ။ အိုဆင်မန်အနေနဲ့ နေပယ်မြို့မှာ ကောင်းမွန်စွာတည်ရှိနေပြီး နာပိုလီအသင်းနဲ့အတူ အောင်မြင်မှုတွေထပ်ယူဖို့ ဆန္ဒပြင်းပြနေပါတယ်" ဟု စာချုပ်သစ် ချုပ်ဆိုမှုအပြီးတွင် ပြောကြားခဲ့သည်။

အိုဆင်မန်အားခေါ်ယူရန်အတွက် ရီးယဲလ်၊ ချယ်လ်ဆီး၊ အာဆင်နယ်၊ PSG၊ မန်ယူနှင့် လီဗာပူးလ်အသင်းတို့မှ အပြိုင်စိတ်ဝင်စားနေပြီး လာမည့်နွေရာသီတွင် အပြောင်းအရွှေ့အတွက် စတင်ကြိုးပမ်းဖွယ်ရှိနေသည်။