Top News

သားမယားအဖြစ် ပြုကျင့်သည်ဟု စွပ်စွဲခံရသည့် ဖျာပုံ NLD ပါတီ ဥက္ကဌမှာ အသက် (၇၅)နှစ်အရွယ်ရှိပြီဖြစ်ပြီး စွပ်စွဲသူမိန်းကလေး၏ ကိုယ်ဝန်မှာ နေ့စေ့လစေ့ မွေးဖွားခြင်းဖြစ်ကာ ကလေးငယ်မှာ ကျန်းမာသန်စွမ်းကြောင်း သိရသည်။



ဖြစ်စဉ်မှာ သားမယားအဖြစ်ပြုကျင့်ခံရသည်ဟုဆိုသော အသက် (၁၄)နှစ်အရွယ် မအေးမြတ်သူ ဖျာပုံမြို့နေသူမှာ ၂၀၁၅ခုနှစ် ဧပြီလမှ စတင်ကာ ဖျာပုံ NLD ပါတီဥက္ကဌ ဦးမင်းဆွေ၏ ရန်ကုန်မြို့   မရမ်းကုန်းမြို့နယ်တွင် ဖွင့်လှစ်ထားသော Great Light ကိုယ်ပိုင်အထက်တန်းကျောင်းတွင် အစ်မဖြစ်သူ မခင်ချိုသက်နှင့်အတူ လာရောက်အလုပ်လုပ်ခဲ့ပြီး ၂၀၁ရခုနှစ်တွင် အလုပ်လုပ်ခဲ့ကြောင်း၊ ယင်းနောက် မအေးမြတ်သူမှာ ရန်ကုန်မြို့ရှိ ကို--- ဆိုသူ (CCTV များ တပ်ဆင်ခြင်းလုပ်ငန်းများ လုပ်ကိုင်သူ) ထံတွင် ၂၀၁ရခုနှစ် နိုဝင်ဘာလ ၁၃ရက်နေ့တွင် ကို-- ၏ အဖွားဖြစ်သူအား ပြုစုရန် သွားရောက်အလုပ်လုပ်ကိုင်ခဲ့သေးကြောင်း၊ ကို-- ၏ အဖွားဆုံးပါးပြီးနောက် ၂၀၁ရခုနှစ် ဒီဇင်ဘာလခန့်တွင် နေအိမ်သို့ ပြန်လာခဲ့ကြောင်း၊ ယင်းနောက် မအေးမြတ်သူနှင့် အစ်မဖြစ်သူ မခင်ချိုသက်နှင့် အတူ ၂၀၁၈ခုနှစ် ဧပြီလတွင် Great Light ကိုယ်ပိုင်အထက်တန်းကျောင်းတွင် ထပ်မံအလုပ်ဝင်ခဲ့ကြောင်း၊ ယင်းနောက် သြဂုတ်လတွင် ကျန်းမာရေး မကောင်းသောကြောင့် နေအိမ်သို့ ပြန်လာခဲ့ပြီးနောက် ကိုယ်ဝန်ရှိနေကြောင်း သိရှိရ၍ မေးမြန်းရာတွင် Great Light ကိုယ်ပိုင်အထက်တန်းကျောင်းတွင် နေထိုင်စဉ် ဦးမင်းဆွေမှ သားမယားအဖြစ် ပြုကျင့်ခဲ့သောကြောင့် ကိုယ်ဝန်ရရှိသည်ဟု ပြောကြားခဲ့ကြောင်း၊ ထို့နောက် ၂၀၁၈ခုနှစ် ဒီဇင်ဘာလ ၄ရက်နေ့တွင် ကိုယ်ဝန် လမစေ့ပဲ မွေးဖွားခဲ့ပြီး မွေးစာရင်းထုတ်ရန်အတွက် ဖခင်အမည်အား ဆေးရုံတွင် နာမည်ပေးသွင်းစဉ်တွင ်ဦးမင်းဆွေ၏ အမည်အား ပေးသွင်းခဲ့သောကြောင့် ဦးမင်းဆွေမှ ဖျာပုံမြို့နယ်ရဲစခန်းတွင် နိုင်ငံသားများ၏ ပုဂ္ဂိုလ်ဆိုင်ရာ လွတ်လပ်မှုနှင့် ပုဂ္ဂိုလ်ဆိုင်ရာ လွတ်လပ်မှုကာကွယ်ပေးရေး ဥပဒေပုုဒ်မ ၁၀/၁၂ဖြင့် အမှုဖွင့် တိုင်ကြားခဲ့သောကြောင့် မအေးမြတ်သူ အသက်(၁၅)နှစ် အပါအဝင် ငါးဦးအား ဖမ်းဆီးခံခဲ့ရပြီး ၁ဝရက်ကြာ အချုပ်ခံရပြီး အာမခံရရှိခဲ့ကြောင်း ယင်းအာမခံအား ပြန်လည်ရုပ်သိမ်းပေးရန် တရားလိုဖက်မှ ဖျာပုံခရိုင်တရားသို့လည်း အယူခံတက်ထားပြီး လာမည့် ဖေဖော်ဝါရီ ၂၅ရက်နေ့တွင် အပြီးသတ် အမိန့်ချသွားမည်ဖြစ်ကြောင်း သိရသည်။   

“သမီးကတော့ ဘာမှ မလိုချင်ပါဘူး၊ ကလေးကိုလည်း ကိုယ့်ဘာသာမွေးမှာပါ ကလေးရဲ့  အဖေနာမည်ကိုပဲ လိုချင်တာပါ၊ ကလေးရဲ့  အဖေနာမည်ရမှာ မွေးစာရင်းကလည်း ရမှာမို့ပါ၊ အခုထိ မွေးစာရင်းမရသေးဘူး၊ ကလေးကို အဖေမရှိဘဲ မွေးတယ်လို့လည်း မဖြစ်စေချင်ပါဘူး၊ ကလေးကို လမစေ့ပဲနဲ့ မွေးရ ရောဂါတွေလည်း ဖြစ်သေးတယ် ကလေးကို မွေးထားတဲ့စာရွက်တွေလည်း သူတို့အကုန်သိမ်းသွားတယ်”ဟု မအေးမြတ်သူက ပြောသည်။

ဦးမင်းဆွေက မအေးမြတ်သူကို ၂၀၁၈ ခုနှစ် မေ ၁ ရက်တွင် တစ်ကြိမ်၊ မေ ၂ ရက်တွင် တစ်ကြိမ် အလိုမတူဘဲ သားမယားပြုကျင့်ခဲ့ကြောင်း၊ ဦးမင်းဆွေနှင့် ရရှိခဲ့သည့် ကိုယ်ဝန်က လမစေ့ဘဲ ကလေးမွေးဖွားခဲ့ကြောင်း၊ ကလေး မွေးချိန်တွင် မွေးစာရင်းထုတ်ရာ၌ အခက် တွေ့ခဲ့ရကြောင်း မအေးမြတ်သူက သတင်းစာရှင်းလင်းပွဲတွင် ပြောကြားထားသည်။

မအေးမြတ်သူ တက်ရောက် ကလေးမွေးဖွားခဲ့သည့် ဖျာပုံခရိုင် ပြည်သူ့ဆေးရုံကြီးသို့ သွားရောက်ကာ မအေးမြတ်သူ၏ ကျန်းမာရေးအခြေအနေအား ဆေးရုံအုပ်ကြီးဖြစ်သူ ဒေါက်တာတင်လှထံ မေးမြန်းရာတွင် “သူက ၂၀၁၈ခုနှစ် ၁၂လပိုင်း ၄ရက်နေ့ မနက်စောစောမှာ ဆေးရုံရောက်လာတယ် ၊ ၉နာရီ ၃၈ မိနစ်မှာ ရိုးရိုးမွေးဖွားတယ်၊ ကလေးက ၆ ပေါင် ၂ အောင်စ ရှိတယ်၊ သွားဖွားမီးယပ်ဆရာမကြီးရဲ့ တွေ့ရှိချက်အရ ၃၆ ပတ်ပြည့်မှီပြီး မွေးဖွားတယ်လို့ သိရတယ်၊ လပြည့် ပေါင်ပြည့် မွေးဖွားတာပါ၊ မွေးကင်းစကလေးကို အဝါနည်းနည်းတွေ့လို့ ဆေးရုံဆင်းခါနီးမှာ ခဏ ဓါတ်ကင်တာကလွဲလို့ ကျန်တဲ့ ကျန်းမာရေးချို့ယွင်းမှုမရှိပါဘူး၊ ၆ရက်နေ့မှာပဲ ဆေးရုံက ပြန်ဆင်းသွားပါတယ်၊ မွေးစာရင်းထုတ်ပေးဖို့ကတော့ ကျွန်တော်တို့မှာ ကလေး အဖေ အမေရဲ့ သန်းခေါင်စာရင်း လိုပါတယ်၊ ကလေးအဖေအမည်မှာလည်း တရားဝင် စာတင်ကန့်ကွက်ထားတာ ရှိပါတယ်၊ ဒါနဲ့ ပက်သက်ပြီးတော့ ကျွန်တော့်ကိုတော့ လာမတွေ့သေးပါဘူး” ဟုပြောကြားသည်။



မအေးမြတ်သူ၏ မိသားစုနေထိုင်သည့် ပတ်ဝန်းကျင်အား စုံစမ်းမေးမြန်းရာတွင် မအေးမြတ်သူ နေထိုင်ရာ ရပ်ကွက်၏ အုပ်ချုပ်ရေးမှူးဖြစ်သူ ဦးမင်းလွင်က “သူတို့မိသားစုနဲ့ ပက်သက်ပြီးတော့ ရုံးမှာလာရောက်ပြီး ပြသနာတွေဖြေရှင်းရတာ ကြီးကြီးမားမားတစ်ခုမှ မရှိပါဘူး၊ အခြားသော အရှုပ်အရှင်းတွေလည်း မကြားမိပါဘူး၊ သူတို့မိသားစုနဲ့ ပက်သက်ရင် ကြွေးမှီကိစ္စလေး တစ်ချို့သာ တစ်ခါတစ်လေ ဖြေရှင်းပေးရတာ ရှိပါတယ်၊ ဒါကလည်း သောင်းကဏန်းလောက် တွေပါ”ဟု ပြောကြားသည်။



  စွပ်စွဲခံရသူ ဦးမင်းဆွေမှာ အသက် ၇၅နှစ်ရှိပြီဖြစ်ပြီး ပန်းသေပန်းညှိးရောဂါလည်းရှိကာ သားကြောဖြတ်ထားသူတစ်ဦးလည်းဖြစ်ကြောင်း၊ မအေးမြတ်သူ လာရောက်အလုပ်လုပ်သည့် အချိန်နှင့် ကိုယ်ဝန်ဆောင်ချိန်များ လွဲမှားမှုများရှိနေကြောင်း၊ မအေးမြတ်သူ၏ အစ်မတစ်ဦးမှာ သင်တန်းကျောင်းတွင် အလုပ်လုပ်ကိုင်လျက်ရှိပြီး ဖြစ်စဉ်များကြောင့် ရှက်ရွံကာ မိသားစုအား အဆက်အသွယ်မလုပ်ကြောင်း၊ ယင်းဖြစ်စဉ်နှင့် ပက်သက်၍ မိသားစုဂုဏ်သိက္ခာအတွက် DNA စစ်ဆေးခြင်းများပါ လုပ်ဆောင်သွားမည်ဖြစ်ကြောင်း စွပ်စွဲခံရသူ ဦးမင်းဆွေ၏ သမီးဖြစ်သူ ဒေါ်စုစုထွေးမှ သူ၏ ဖေ့ဘွတ်စာမျက်နှာတွင် ရေးသားထားသည်။



ယင်းဖြစ်စဉ်များနှင့်လည်း ပတ်သက်ပြီး ဖျာပုံ NLD ပါတီ ဥက္ကဌမှ ဖေဖေါ်ဝါရီ ၂၂ရက်တွင် ရန်ကုန်မြို့  House of Orchid တွင် သတင်းစာရှင်းလင်းပွဲ ပြုလုပ်မည်ဖြစ်ကြောင်း သိရသည်။