Top News

ရန်ကုန်-မန္တလေး အမြန်လမ်းမကြီးမိုင်တိုင်အမှတ် ၃၁၇ မိုင်အနီးတွင် ဖေဖော်ဝါရီ ၂၁ ရက် နံနက်အစောပိုင်းက ဘုရားဖူး Express ယာဉ်အား ကင်တာယာဉ်တစ်စီးက နောက်မှဝင်တိုက်မိပြီး ကနဦးသတင်းအရ ခရီးသည် ၁၈ ဦးခန့် ထိခိုက်ဒဏ်ရာရရှိသွားကြောင်း နေပြည်တော်အမြန်လမ်းမကြီး ရဲတပ်ဖွဲ့မှူးရုံးမှ သိရသည်။

ယာဉ်မတော်တဆမှုကြောင့် ထိခိုက်ဒဏ်ရာရရှိမှုအခြေအနေနှင့် ပတ်သက်ပြီး အမြန်လမ်းမကြီးရဲတပ်ဖွဲ့မှူးရုံးမှ တာဝန်ရှိသူတစ်ဦးက “Express နဲ့ ကင်တာကားနဲ့ တိုက်တာပေါ့ဗျာ။ Express က ရပ်ထားတာ၊ ရပ်ထားတာကို နောက်ကကင်တာကားက ဝင်တိုက်ပစ်တာ။ တိုက်လိုက်တော့ ကင်တာပေါ်မှာပါတဲ့လူက ၁၆ ဦးရှိတယ်။ ယာဉ်မောင်းကတော့ ကိုကျော်မင်းခိုင်ပါ။ ကင်တာ ကားပေါ်က ၁၅ ဦးကတော့ ဒဏ်ရာရတာပေါ့။ Express ကားပေါ်မှာပါတာကတော့ ကျား ၁၅ ဦး၊ မ ၃၀ မှာ၊ ကျားသုံးဦးပဲ ဒဏ်ရာရပါတယ်။ အခုမှ ကျွန်တော်တို့လည်း အခင်းဖြစ်တဲ့နေရာမှာ ဝိုင်းလုပ်နေတုန်းပဲရှိသေးတယ်”ဟု ပြောကြားသည်။

ဖြစ်စဉ်မှာ ဖေဖော်ဝါရီ ၂၁ ရက် နံနက် ၆ နာရီ ၄၅ မိနစ်ခန့်က ရန်ကုန်-မန္တလေး အမြန်လမ်းမကြီးပေါ်တွင် နေပြည်တော်ဘက်မှ မန္တလေးဘက်သို့ ယာဉ်ပေါ်တွင် ခရီးသည် ၁၅ ဦးခန့်လိုက်ပါလျက် ယာဉ်မောင်းကိုကျော် မင်းခိုင်မောင်းနှင်သော ယာဉ်အမှတ် 2F/-------ကင်တာယာဉ်မှာ အမြန်လမ်းမကြီး မိုင်တိုင်အမှတ် ၃၁၇ မိုင် ၄ ဖာလုံအနီးသို့ အရောက်တွင် ကားပျက်၍ လမ်းဘေးတွန်းချနေသော Express မော်တော်ယာဉ် အမှတ် 9E/---- မြတ်စွယ်တော်ဘုရားဖူးယာဉ်အား အရှိန်မထိန်းနိုင်ဘဲ နောက်မှဝင်ရောက်တိုက်မိခဲ့ခြင်းဖြစ်ကြောင်း အမြန်လမ်းရဲတပ် ဖွဲ့မှူးရုံး၏ ထုတ်ပြန်ချက်အရ သိရသည်။

ယာဉ်မတော်တဆမှုဖြစ်ပွားရာသို့ ပြင်စည်အမြန်လမ်းမကြီးရဲစခန်းမှ ရဲတပ်ဖွဲ့ဝင်များ၊ အမြန်လမ်းမီးသတ်စခန်းမှ တာဝန်ရှိသူများက သွားရောက်စစ်ဆေးခဲ့ကြရာနောက်မှ ဝင်တိုက်သော ကင်တာယာဉ်ပေါ်လိုက်ပါသူများအနက် ခေါင်းခန်းတွင်လိုက်ပါခဲ့သော

ယာဉ်မောင်းပါ ကျားသုံးဦးတို့မှာ ကားခေါင်းအတွင်းညပ်မိနေသဖြင့် အရေးပေါ် ကယ်ဆယ်မှုများ ပြုလုပ်ခဲ့ရကြောင်း၊ အဆိုပါ ကင်တာယာဉ်ပေါ်မှ ခရီးသည် ကျားသုံးဦး၊ မ ၁၂ ဦး(ကလေးနှစ်ဦးပါ) စုစုပေါင်း ၁၅ ဦး ထိခိုက်ဒဏ်ရာများ ရရှိခဲ့ကြောင်း၊ ရှေ့မှအတိုက်ခံရသောဘုရားဖူး Express ယာဉ်ပေါ်လိုက်ပါသူ ကျား ၁၅ ဦး၊ မ ၃၀ ဦးအနက် ကျားသုံးဦးသာ ထိခိုက်ဒဏ်ရာရရှိခဲ့ကြောင်း၊ ထိခိုက်ဒဏ်ရာရရှိသူများအား နီးစပ်ရာဆေးရုံသို့ ပို့ဆောင်ပေးခဲ့ကြောင်း သိရသည်။

အဆိုပါ ယာဉ်မတော်တဆမှုဖြစ်စဉ် နှင့်ပတ်သက်ပြီး နောက်မှဝင်တိုက်သော ကင်တာယာဉ်မောင်း ကိုကျော်မင်းခိုင်အား ပြင်စည်အမြန်လမ်းမကြီးရဲစခန်းမှ အမှုဖွင့်အရေးယူနိုင်ရန် စစ်ဆေးဆောင်ရွက်လျက်ရှိကြောင်း သိရသည်။

ရန်ကုန်-မန္တလေး အမြန်လမ်းမကြီးတွင် ၂၀၁၉ ခုနှစ် ဇန်နဝါရီလအတွင်းက ယာဉ်မတော်တဆမှုပေါင်း ၄၃ ကြိမ်ဖြစ်ပွား၍ ယာဉ်မတော်တဆမှုကြောင့် သေဆုံးသူ ကျားလေးဦး၊ မတစ်ဦး၊ စုစုပေါင်း ပေါင်းငါးဦး သေဆုံးကာ ထိခိုက်ဒဏ်ရာရသူ ကျား၂၅ ဦး၊ မ ၃၃ ဦး စုစုပေါင်း ၅၉ ဦးရှိကြောင်း နေပြည်တော်အမြန်လမ်းမကြီး ရဲတပ်ဖွဲ့မှူးရုံး မှတ်တမ်းများအရ သိရသည်။