Top News

ရခိုင်ပြည်နယ်မြောက်ပိုင်းတွင် နှစ်ဖက်ဖြစ်ပွားနေသော လက်နက်ကိုင်တိုက်ပွဲများအား အမြန်ဆုံးရပ်ဆိုင်းပေးရေး ရခိုင်ပြည်နယ်အစိုးရမှ ပြည်ထောင်စုအစိုးရသို့ တိုက်တွန်းကြောင်းအဆိုကို ဖေဖော်ဝါရီ ၁၄ ရက်ကကျင်းပသော ဒုတိယအကြိမ် ရခိုင်ပြည်နယ်လွှတ်တော် နဝမပုံမှန်အစည်းအဝေး ဒုတိယနေ့တွင် ရသေ့တောင်မြို့နယ်မှ ပြည်နယ်လွှတ်တော်ကိုယ်စားလှယ် ဦးသန်းနိုင်က အဆိုတင်သွင်းခဲ့ရာ ယင်းအဆိုအား ဆက်လက်ဆွေးနွေးရန် အတည်ပြုခဲ့သဖြင့် ဖေဖော်ဝါရီ ၂၁ ရက်တွင် ဆက်လက်ဆွေးနွေးခဲ့ပြီး ရခိုင်ပြည်နယ်လွှတ်တော်က အတည်ပြုလိုက်ကြောင်း သိရသည်။

အဆိုနှင့်ပတ်သက်ပြီး ဦးသန်းနိုင်က “တိုက်ပွဲဆိုတာကို ဘယ်သူမှ လိုချင်ကြတာ မဟုတ်ဘူး။ ကမ္ဘာပေါ်မှာရှိတဲ့ လူတိုင်းမလိုချင်ကြပါဘူး။ အခုရခိုင်မှာ ဖြစ်နေတဲ့တိုက်ပွဲ တွေကလည်း စားပွဲဝိုင်းမှာ အပြီးပြတ်အောင် ဖြေရှင်းရမယ့် ကိစ္စတွေဖြစ်တဲ့အတွက် စစ်တွေကို ရပ်စဲဖို့ တောင်းဆိုတိုက်တွန်းရတာ ဖြစ်ပါတယ်။ ကန့်ကွက်သူကတော့ မရှိခဲ့ပါဘူး။ နောက်အပတ်ထဲ ဆက်လက်ဆွေးနွေးနိုင်ခြေ ရှိပါတယ်။ နောက်ပြီး ရခိုင်ပြည်နယ်အတွင်းမှာ ဇန်နဝါရီလကတည်းကစပြီး ဖြစ်ပွားလာတဲ့ တိုက်ပွဲတွေဟာ တစ်မြို့နယ်ကနေ နောက်မြို့နယ်တွေအထိ ကူးစက်လာပြီး ကျယ်ပြန့်လာခဲ့တာကိုလည်း တွေ့ရတယ်။ အဲဒီလို စစ်ရေးနယ်မြေက ကျယ်ပြန့်လာသလို စစ်ဘေးဒုက္ခသည်တွေကလည်း များလာတယ်။ ၆၀၀၀ ကျော်တောင်ရှိတယ်လို့ အကြမ်းဖျင်းအားဖြင့် သိရတယ်။ နောက်တစ်ခုက မတ်လထဲမှာဆိုရင် ရခိုင်ပြည်နယ်ရဲ့ အနာဂတ်ကြယ်ပွင့်လူငယ်လေးတွေ၊ သားကောင်းသမီးကောင်းတွေအနေနဲ့ ဆယ်တန်းစာမေးပွဲကိုလည်း ဖြေဆိုရတော့မှာဖြစ်တဲ့အတွက် စိတ်အေးချမ်းသာစွာနဲ့ ဖြေဆိုနိုင်ဖို့အတွက် လည်းရည်ရွယ်ပြီး တောင်းဆိုတာဖြစ်ပါတယ်။ တိုက်ပွဲဖြစ်ပွားနေတဲ့နေရာတွေမှာလည်း စားသောက်ရေးနဲ့ လမ်းပန်းဆက်သွယ်ရေးကိစ္စတွေ စတဲ့လူမှုစီးပွားဘဝတွေ ယိုယွင်းလာတဲ့ အတွက်ကြောင့် တိုက်ပွဲဖြစ်နေမယ့်အစား ငြိမ်းချမ်းစွာနဲ့ စားပွဲဝိုင်းမှာ ဆွေးနွေးစေချင်တာ ဖြစ်ပါတယ်” ဟု အဆိုတင်သွင်းသူ ဦးသန်းနိုင်က ပြောကြားသည်။

ရခိုင်ပြည်နယ်အစိုးရအဖွဲ့မှတစ်ဆင့် ပြည်ထောင်စုအစိုးရအဖွဲ့သို့ တိုက်တွန်းတဲ့ အဆိုအား ပြည်နယ်လွှတ်တော်ကိုယ်စားလှယ် ဦးထွန်းသာစိန်(မြောက်ဦး-၁)၊ ဦးဖိုးစံ(ကျောက်ဖြူ-၂)၊ ဦးလှသိန်းအောင် (မင်း ပြား-၂)၊ ဦးမောင်လှကျော် (ကျောက်တော်-၁)၊ ဦးအောင်ဝင်း(မြေပုံ-၁)တို့က ဆွေးနွေးခဲ့ကြကြောင်း သိရသည်။ ယင်းအဆိုနှင့်ပတ်သက်၍ သက်ဆိုင်ရာပြည်နယ်အဆင့်မှ ဆွေးနွေးလိုက ဆွေးနွေးရန်ဖြစ်သော်လည်း ပြည်နယ်အဆင့် တာဝန်ရှိသူများ တက်ရောက်ခြင်း မရှိ၍ လွှတ်တော်၏ သဘောထားဆန္ဒကိုရယူပြီး အဆိုအား အတည်ပြုကြောင်း ကြေညာခဲ့သည်ဟု သိရသည်။

“အခုဖြစ်နေတဲ့ စစ်ပွဲစစ်ဘောင်က ကျယ်လာတယ်။ ဒါကြောင့် ရပ်ပေးစေချင်တယ်။ စစ်ပွဲဆိုတာကို မလိုချင်ဘူး။ နိုင်ငံတော်ဟာ တည်ငြိမ်အေးချမ်းပြီး ဖွံ့ဖြိုးတိုးတက်တာကိုသာ လိုချင်တယ်။ နှစ်ပေါင်း ၇၀ ကျော်ဖြစ်နေတဲ့ တိုက်ပွဲတွေကိုလည်း ခြုံငုံ ပြီးပြောချင်တာ ဖြစ်တဲ့အတွက် ရပ်ပေးစေချင်တယ်။ စားပွဲဝိုင်းမှာ ဆွေးနွေးစေချင်တယ်။ တိုက်ပွဲဖြစ်ရင် နိုင်ငံတော်နဲ့ ပြည်သူတွေသာ နစ်နာတယ်။ ငြိမ်းချမ်းရေးစားပွဲဝိုင်းမှာ ထိုင်ပြီးစကားပြောစေချင်တယ်။ အဲဒီလိုပြောတဲ့ အခါမှာလည်း ကိုယ်ဘက်သူ့ဘက်မခွဲဘဲ လိုတိုးပိုလျှော့အနေနဲ့ ညှိနှိုင်းပေးစေချင်တဲ့အတွက် ထောက်ခံဆွေးနွေးခဲ့တာ ဖြစ်တယ်။ မနေ့ကဆိုရင် ရသေ့တောင်မှာ သေဆုံးတဲ့အနေ အထားအထိ ဖြစ်ခဲ့တယ်ဆိုတော့ စိတ်မကောင်းဖြစ်ရတယ်။ စိုးရိမ်မိတယ်” ဟု ထောက်ခံဆွေးနွေးသူ ဦးလှအောင်သိန်းက ပြောကြားသည်။

ရခိုင်ပြည်နယ်အတွင်း ဖြစ်ပေါ်နေသော တိုက်ပွဲများကြောင့် စစ်ဘေးရှောင်များ တစ်နေ့ထက်တစ်နေ့ များပြားလာခဲ့ပြီး ၆၀၀၀  ဝန်းကျင်အထိ ရှိလာခဲ့ကြောင်း သိရသည်။ ယင်းအပြင်တိုက်ပွဲဖြစ်ပွားသည့် နေရာများမှာလည်း ကျယ်ပြန်လာရာ မောင်တော၊ ဘူးသီးတောင်၊ ရသေ့တောင်၊ ကျောက်တော်၊ ပုဏ္ဏားကျွန်း၊မြောက်ဦးမြို့နယ်များတွင်လည်း ဖြစ်ပွားမှုရှိခဲ့ကြောင်း သတင်းများအရ သိရသည်။