Top News

ရန်ကုန်-မန္တလေး အမြန်လမ်းမကြီး မိုင်တိုင်အမှတ် ၃၁၇ မိုင် အနီးတွင် ဖေဖော်ဝါရီ ၂၁ ရက် နံနက်ပိုင်းက ဘုရားဖူး Express ယာဉ်အား ကင်တာယာဉ်တစ်စီးက နောက်မှဝင်တိုက်မိပြီး ကနဦးသတင်းအရ ခရီးသည် ၁၈ ဦးခန့် ထိခိုက်ဒဏ်ရာ ရရှိသွားခဲ့ကြောင်း နေပြည်တော် အမြန်လမ်းမကြီး ရဲတပ်ဖွဲ့မှူးရုံးမှ သိရသည်။

ဖြစ်စဉ်မှာ ဖေဖေါ်ဝါရီ ၂၁ ရက်နေ့ နံနက် ၆ နာရီ ၄၅ မိနစ်အချိန်ခန့်က ရန်ကုန်-မန္တလေး အမြန်လမ်းမကြီးပေါ်တွင် နေပြည်တော်ဘက်မှ မန္တလေးဘက်သို့ ယာဉ်ပေါ်တွင် ခရီးသည် ၁၅ ဦးခန့် လိုက်ပါလျက် ယာဉ်မောင်း ကိုကျော်မင်းခိုင် မောင်းနှင်သော ယာဉ်အမှတ် 2F/ 9--- ကန်တာယာဉ်မှာ အမြန်လမ်းမကြီး မိုင်တိုင်အမှတ် ၃၁၇ မိုင် ၄ ဖာလုံအနီးသို့ အရောက်တွင် ကားပျက်၍ လမ်းဘေး တွန်းချနေသော Express မော်တော်ယာဉ် အမှတ် 9E/6---- မြတ်စွယ်တော် ဘုရားဖူး မော်တော်ယာဉ်အား အရှိန်မထိန်းနိုင်ပဲ နောက်မှဝင်ရောက် တိုက်မိခဲ့ခြင်းဖြစ်ကြောင်း အမြန်လမ်း ရဲတပ်ဖွဲ့မှူးရုံး၏ ထုတ်ပြန်ချက်အရ သိရသည်။

ယာဉ်မတော်တဆမှု ထိခိုက်ဒဏ်ရာရရှိမှု အခြေအနေနှင့် ပတ်သက်ပြီး အမြန်လမ်းမကြီး ရဲတပ်ဖွဲ့မှူးရုံးမှ တာဝန်ရှိသူ တစ်ဦးက “Express နဲ့ ကင်တာကားနဲ့ တိုက်တာပေါ့ဗျာ၊ Express ကရပ်ထားတာ၊ ရပ်ထားတာကို နောက်က ကင်တာကားက ဝင်တိုက်ပစ်တာ၊ တိုက်ပလိုက်တော့ ကင်တာပေါ်မှာ ပါတဲ့လူက ၁၆ ဦးရှိတယ်။ ယာဉ်မောင်းကတော့ ကိုကျော်မင်းခိုင်ပါ၊ ကင်တာကားပေါ်က ၁၅ ဦးကတော့ ဒဏ်ရာရတာပေါ့၊ Express ကားပေါ်မှာ ပါတာကတော့ ကျား ၁၅ ဦး၊ မ ၃၀ မှာ ကျား ၃ ဦးပဲ ဒဏ်ရာရပါတယ်။ အခုမှ ကျွန်တော်တို့လည်း အခင်းဖြစ်တဲ့ နေရာမှာ ဝိုင်းလုပ်နေတုန်းပဲ ရှိသေးတယ်” ဟုပြောကြားသည်။

ယာဉ်မတော်တဆမှု ဖြစ်ပွားရာသို့ ပြင်စည်အမြန်လမ်းမကြီးရဲစခန်းမှ ရဲတပ်ဖွဲ့ဝင်များ၊ အမြန်လမ်း မီးသတ်စခန်းမှ တာဝန်ရှိသူများက သွားရောက်စစ်ဆေးခဲ့ကြရာ နောက်မှဝင်တိုက်သော ကင်တာယာဉ်ပေါ် လိုက်ပါသူများအနက် ခေါင်းခန်းတွင် လိုက်ပါခဲ့သော ယာဉ်မောင်းပါ ကျား ၃ ဦးတို့မှာ ကားခေါင်းအတွင်း ညှပ်မိနေသဖြင့် အရေးပေါ် ကယ်ဆယ်မှုများ ပြုလုပ်ခဲ့ရကြောင်း၊ အဆိုပါ ကင်တာယာဉ်ပေါ်မှ ခရီးသည် ကျား ၃ ဦး၊ မ ၁၂ ဦး (ကလေး ၂ ဦးပါ)၊ စုစုပေါင်း ၁၅ ဦခန့် ထိခိုက်ဒဏ်ရာများ ရရှိခဲ့ကြောင်း၊ ရှေ့မှအတိုက်ခံရသော ဘုရားဖူး Express ယာဉ်ပေါ် လိုက်ပါသူ ကျား ၁၅ ဦး၊မ ၃၀ ဦးအနက် ကျား ၃ ဦးသာ ထိခိုက်ဒဏ်ရာ ရရှိသွားခဲ့ကြောင်း၊ ယာဉ်မတော်တဆမှုကြောင့် နောက်မှဝင်တိုက်သော ကင်တာယာဉ်မှာ ရှေ့ခေါင်းပိုင်း ပိန်ချိုင့်ပျက်စီး၍ အတိုက်ခံရသော ဘုရားဖူး Express ယာဉ်မှာ နောက်ပိုင်း အနည်းငယ်သာ ပျက်စီးသွားခဲ့ကြောင်း၊ ထိခိုက်ဒဏ်ရာရရှိ သူများအား အမြန်လမ်းတပ်ဖွဲ့ပိုင် မော်တော်ယာဉ်၊ နယ်မြေခံပရဟိတ အသင်းအဖွဲ့ မော်တော်ယာဉ်များဖြင့် နီးစပ်ရာ ဆေးရုံသို့ ပို့ဆောင်ကူညီ ပေးခဲ့ကြကြောင်း သိရသည်။

အဆိုပါ ယာဉ်မတော်တဆမှုဖြစ်စဉ်နှင့် ပတ်သက်ပြီး နောက်မှဝင်တိုက်သော ကင်တာယာဉ်မောင်း ကိုကျော်မင်းခိုင်အား ပြင်စင်အမြန်လမ်းမကြီးရဲစခန်းမှ အမှုဖွင့်အရေးယူနိုင်ရန် စစ်ဆေးဆောင်ရွက်လျက် ရှိကြောင်း သိရသည်။ ရန်ကုန်-မန္တလေး အမြန်လမ်းမကြီးပေါ်တွင် ၂၀၁၉ ခုနှစ် ဇန်နဝါရီလ အတွင်းက၊ ယာဉ်မတော်တဆမှုပေါင်း ၄၃ ကြိမ်ဖြစ်ပွား၍ ယာဉ်မတော်တဆမှုကြောင့် သေဆုံးသူ ကျား ၄ ဦး၊ မ ၁ ဦး၊ စုစုပေါင်း ၅ ဦး သေဆုံးကာ၊ ထိခိုက်ဒဏ်ရာရသူ ကျား (၂၅) ဦး၊ မ(၃၃) ဦး၊ စုစုပေါင်း (၅၉) ဦး ရှိခဲ့ကြောင်း နေပြည်တော် အမြန်လမ်းမကြီး ရဲတပ်ဖွဲ့မှူးရုံး မှတ်တမ်းများအရ သိရသည်။