Top News

ချင်းပြည်နယ် အတွင်းတွင် COVID-19 လူနာနှစ်ဦး ဆေးရုံမှဆင်းခွင့်ရခဲ့ပြီး Case-1 လူနာမှာ Home Quarantine ပြင်ပသို့ သွားလာခွင့်ရပြီဖြစ်ကာ Quarantine Center တွင်နေရသူ ၁၇၀ ခန့် ရှိနေကြောင်း ချင်းပြည်နယ် လူမှုရေးဝန်ကြီး ဦးပေါင်လွန်မင့်ထန်က ပြောကြားသည်။

“Case-1 လူနာက Negative နှစ်ခါ၊ Home Quarantine ကလည်း ပြည့်သွားပြီဆိုတော့ သူက သွားလာလို့ရပြီ။ ချင်းပြည်နယ် အတွင်းမှာ Negative နှစ်ကြိမ်ပြလို့ ဆေးရုံက ဆင်းသွားတာ Case-150 နဲ့ Case-1 နဲ့ နှစ်ယောက်ပေါ့။ Case-150 ကတော့ မနေ့က ဆေးရုံက ဆင်းပြီ ဒီကနေ့ Home Quarantine စတင်ပြီပေါ့။ Case-31 ကတော့ ပထမအကြိမ် Negative ဖြစ်ပြီ၊ ဒုတိယအကြိမ် Negative ပြရင်တော့ သူလည်း ဆေးရုံက ဆင်းလို့ရပြီ။ လောလောဆယ် ချင်းပြည်နယ် အတွင်းမှာ Positive လူနာ ၄ ယောက် ကျန်သေးပါတယ်။ ဟားခါးမှာက Positive တစ်ယောက်ဆိုတော့ မနေ့က ဆင်းသွားပြီ။ ချင်းပြည်နယ် အတွင်းမှာရှိတဲ့ Quarantine စင်တာမှာ ရှိနေတဲ့သူ စုစုပေါင်း ၁၇၀ ယောက် ရှိပါတယ်။ ပြည်ပက ပြန်လာသူ ရှိသလို ခရီးသွားလာတဲ့ ဝန်ထမ်းတွေကိိုလည်း Quarantine စင်တာမှာ ထားတယ်။ နတလ ကျောင်းတွေ၊ အိမ်တွင်းမှု ကျောင်းတွေ၊ ဟားခါးမှာ ဆိုရင်တော့ အားကာသိပ္ပံ၊ ဟားခါး ကောလိမ်ပ၊ နတလ အိမ်တွင်းမှု ကျောင်းတွေကို အားကိုးပါတယ်” ဟု ချင်းပြည်နယ် လူမှုရေးဝန်ကြီး ဦးပေါင်လွန်မင့်ထန်က ပြောကြားသည်။

Case-1 သည် နှစ်ကြိမ်ဆက်တိုက် ပိုးမရှိကြောင်း စစ်ဆေးတွေ့ရှိခဲ့သည့် အတွက် ဧပြီလ ၃၀ ရက်က ဆေးရုံမှ ဆင်းခွင့်ရခဲ့ခြင်းဖြစ်ပြီး တီးတိန်မြို့ လွယ်ဘွာလ်ရပ်ကွက်ရှိ ဦးလေးတော်စပ်သူ၏ နေအိမ်တွင် Home Quarantine အဖြစ် ၁၄ ရက် နေထိုင်ခဲ့ခြင်း ဖြစ်သည်။

Case-150 သည် ဧပြီလ ၂၉ ရက်နေ့က တရုတ်နိုင်ငံမှ ပြန်လာပြီး ဟားခါးမြို့ရှိ န.တ.လ ကျောင်းတွင် Quarantine ဝင်နေစဉ် ကိုရိုနာဗိုင်းရပ်စ် ကူးစက်ခံထားရကြောင်း စစ်ဆေးတွေ့ရှိခဲ့ခြင်း ဖြစ်သည်။

အဆိုပါ လူနာကို ကျန်းမာရေး စောင့်ရှောက်မှုများပေးပြီး အာခေါင်တို့ဖတ် နမူနာနှင့် နားခေါင်းတို့ဖတ် နမူနာတို့ကို ဓါတ်ခွဲစစ်ဆေးခဲ့ရာ မေလ ၁၀ ရက်နေ့တွင် ပိုးမရှိကြောင်း တစ်ကြိမ် စစ်ဆေးတွေ့ရှိခဲ့ပြီး ထပ်မံစစ်ဆေးခဲ့ရာ မေလ ၁၃ ရက်နေ့တွင်လည်း ပိုမရှိကြောင်း ထပ်မံစစ်ဆေး တွေ့ရှိခဲ့သောကြောင့် မေလ ၁၃ ရက်နေ့တွင် ဟားခါးမြို့ ဆေးရုံမှ ဆင်းခွင့်ပြုလိုက်ခြင်းဖြစ်ကြောင်း သိရသည်။

ဟားခါးမြို့မှ Case-150 လူနာနှင့် ထိတွေ့ခဲ့သူ ၅၆ ဦးကို စစ်ဆေးခဲ့ရာမှာလည်း ပိုးမရှိကြောင်း စစ်ဆေးတွေ့ရှိ ခဲ့သည်ဟု သိရသည်။