Top News

ဘင်္ဂလားပင်လယ်အော်တွင် ဖြစ်ပေါ်နေသော လေဖိအားနည်းရပ်ဝန်းသည် မေ ၁၅ တွင် မုန်တိုင်းငယ်အဖြစ်သို့ ရောက်ရှိပြီး မေ ၁၆ ရက်တွင် ဆိုင်ကလုန်းမုန်တိုင်းအဖြစ် ပြောင်းလဲနိုင်ကြောင်း မိုးလေဝသနှင့် ဇလဗေဒညွှန်ကြားမှု ဦးစီးဌာနက ထုတ်ပြန်ထားသည်။

“လက်ရှိကတော့ ကပ္ပလီပင်လယ်ပြင် တောင်ပိုင်းနဲ့ ဘင်္ဂလားပင်လယ်အော် အရှေ့တောင်ပိုင်းကနေ အနောက်မြောက်ဘက်ကို နည်းနည်းရွေ့လာတယ်။ အခုဘင်္ဂလားပင်လယ်အော် အရှေ့တောင်ပိုင်းထဲကို ရောက်နေတယ်။ လက်ရှိမှာ လေဖိအားနည်းရပ်ဝန်းပဲ ရှိသေးတယ်။  မေ ၁၅ မှာတော့ မုန်တိုင်းငယ် အဆင့်ကို ရောက်နိုင်တယ်။ ပြီးသွားရင် ၁၆ ရက်မှ ဆိုင်ကလုန်းမုန်တိုင်းအဆင့်ကို ရောက်နေတယ်။ ၁၆ ရက်နေ့အထိ လမ်းကြောင်းက အနောက်မြောက်ဘက်ကို ဆက်သွားနေတဲ့ အနေအထားရှိတယ်။ ၁၇ ရက်နေ့မှာတော့ အရှေ့မြောက်ဘက်ထဲကို ပြန်ကွေ့လာမှာဖြစ်တဲ့ အတွက်ကြောင်မို့လို့ မြန်မာနိုင်ငံက မေ ၁၉၊ ၂၀ လောက်မှာ မိုးရနိုင်တယ်။ လက်ရှိမှာတော့ အရှေ့မြောက်ဘက်ကို ကွေ့လာတဲ့အခါမှာ ကမ်းဖြတ်ဖို့မှာတော့ လောလောဆယ် သချင်္ာပုံစံပြု မော်ဒယ်တွက် ထုတ်ချက်တွေအရ အမျိုးမျိုး ထွက်နေသေးတယ်။ အချို့မော်ဒယ်တွေက အိန္ဒိယနဲ့ ဘင်္ဂလားဒေ့ရှ်ကြား ဝင်သွားတဲ့ဟာရှိတယ်။ အချို့ကတော့ ဘင်္ဂလားဒေ့ရှ်ကို တိုက်ရိုက်ဝင်တာပြတယ်။ အဲဒီမော်ဒယ်က နည်းနည်းများတယ်။ အချို့ကြတော့ ရခိုင်မြောက်ပိုင်းကို ဝင်မှာပြတဲ့အတွက် ဘယ်ကမ်းကိုဝင်မယ်ဆိုတာ ပြောလို့မရသေးဘူး” ဟု မိုးလေဝသနှင့် ဇလဗေဒ ညွှန်ကြားမှု ဦးစီးဌာနမှ ညွှန်ကြားရေးမှူးချုပ် ဒေါက်တာဦးကျော်မိုးဦးက ပြောကြားသည်။

မိုးလေဝသနှင့် ဇလဗေဒညွှန်ကြားမှု ဦးစီးဌာနမှ မေ ၁၄ ရက် နေ့လည် ၁ နာရီခွဲ တိုင်းထွာချက်များအရ ဘင်္ဂလားပင်လယ်အော် အရှေ့တောင်ပိုင်းတွင် ဖြစ်ပေါ်နေ သော လေဖိအားနည်းရပ်ဝန်းသည် ဆက်လက်တည်ရှိနေပြီး ပိုမိုအားကောင်းလာကာ နောက်၂၄ နာရီအတွင်း ဘင်္ဂလားပင်လယ်အော် တောင်ပိုင်းတွင် မုန်တိုင်းငယ်အဆင့်သို့ လည်းကောင်း၊ နောက် ၄၈ နာရီအတွင်း ဆိုင်ကလုန်းမုန်တိုင်း အဆင့်သို့ လည်းကောင်း ရောက်ရှိနိုင်ကြောင်း၊ အဆိုပါ လေဖိအားနည်း ရပ်ဝန်းသည် မုန်တိုင်းငယ်အဆင့်သို့ ရောက်ရှိပြီးနောက်၊ ကနဦးတွင် အနောက်မြောက်ဘက်သို့ ရွေ့လျားပြီး၊ မေ ၁၇ ရက် နောက်ပိုင်းတွင် မြောက်-အရှေ့မြောက်ဘက်သို့ကွေ့ကာ ဘင်္ဂလားပင်လယ်အော် မြောက်ပိုင်းသို့ ရွေ့လျားနိုင်သည်ဟု ခန့်မှန်းရကြောင်း ထုတ်ပြန်ထားသည်။

၁၈၉၇ ခုနှစ်မှ ၂၀၁၀ ပြည့်နှစ်အထိ နှစ်ပေါင်း ၁၀၀ ကျော်တွင် ဘင်္ဂလားပင်လယ်အော်နှင့် ကပ္ပလီ ပင်လယ်ပြင်တို့တွင် ဖြစ်ပေါ်ခဲ့သည့် မုန်တိုင်းများအနက် မြန်မာနိုင်ငံသို့ ဦးတည်ခဲ့သော မုန်တိုင်း ၂၀ ခန့်ရှိခဲ့ကြောင်း သိရသည်။

ဘင်္ဂလားပင်လယ်အော်တွင် မုန်တိုင်းများသည် ဧပြီလ၊ မေလ၊ အောက်တိုဘာလနှင့် နိုဝင်ဘာလများတွင် ဖြစ်ပေါ်လေ့ရှိပြီး မုတ်သုံလေရာသီ ကာလအတွင်း ဘင်္ဂလားပင်လယ်အော် မြောက်ပိုင်းတွင် မုတ်သုံမုန်တိုင်းငယ်များ ဖြစ်ပေါ်တတ်ကြောင်း၊ မိုးကြိုရာသီနှင့် မိုးလွန်ရာသီများတွင်ဖြစ်သော မုန်တိုင်းများသည် အဖျက်စွမ်းအားများ၍ ပျက်စီးဆုံးရှုံးမှုများစွာ ဖြစ်စေနိုင်ကြောင်း သိရသည်။

မုန်တိုင်းများ၏ အရေးပါသော အဖျက်စွမ်းအား သုံးမျိုးသည် လေပြင်းများ တိုက်ခတ်ခြင်း၊ မိုးသည်းထန်စွာ ရွာသွန်ခြင်းနှင့် မုန်တိုင်း ဒီရေတက်ခြင်းတို့ ဖြစ်ကြောင်း၊ မြန်မာ့ကမ်းရိုးတန်းသို့ မုန်တိုင်းဖြတ်ကျော်ပါက မုန်တိုင်း၏ အင်အားနှင့် အရွယ်အစားပေါ်တွင် မူတည်ပြီး အများဆုံး လေတိုက်နှုန်းမှာ တစ်နာရီ မိုင် ၁၂၀ မှ ၁၃၀ အထိရှိနိုင်ကြောင်း၊ အားကောင်းသော မုန်တိုင်းဖြစ်ပါက လေတိုက်နှုန်း ပိုမိုပြင်းထန်မည်၊ မိုးကြီးမည်၊ မုန်တိုင်းဒီရေ တက်ရောက်မှု ပိုမြင့်မည်ဖြစ်ကြောင်း၊ ရခိုင်ကမ်းရိုးတန်းနှင့် မြစ်ဝကျွန်းပေါ်ဒေသများသည် မုန်တိုင်းဘေးအန္တရာယ်ရှိသော ဒေသများဖြစ်ပြီး ချင်းပြည်နယ်၊ ရှမ်းပြည်နယ်၊ မကွေးတိုင်း၊ မန္တလေးတိုင်း၊ စစ်ကိုင်းတိုင်းတို့သည် မုန်တိုင်းများဖြတ်ကျော် ရွေ့လျားမှုကြောင့် ဒေသအလိုက် မိုးကြီးခြင်း၊ လျှပ်တစ်ပျက် ရေကြီးခြင်းနှင့် လေပြင်း တိုက်ခတ်မှုများ ကြုံတွေ့နိုင်ကြောင်း သိရသည်။