Top News

ပြည်သူ့လွှတ်တော်၊ အမျိုးသားလွှတ်တော် ကိုယ်စားလှယ်များနှင့် အထောက်အကူပြု ဝန်ထမ်းများအား COVID-19 ရောဂါပိုးစစ်ဆေးရန် ကျန်းမာရေး စစ်ဆေးခြင်းနှင့် ဓာတ်ခွဲနမူနာယူခြင်း လုပ်ငန်းများကို ကျန်းမာရေးနှင့် အားကစား ဝန်ကြီးဌာနက လုပ်ဆောင်လျက်ရှိကြောင်း သိရသည်။

နေပြည်တော် စည်ပင်သာယာရေး ကော်မတီ၊ စည်ပင်ဧည့်ရိပ်သာ၌ ပြည်သူ့လွှတ်တော်နှင့် အမျိုးသား လွှတ်တော် ကိုယ်စားလှယ်များနှင့် အထောက်အကူပြု ဝန်ထမ်းများအား COVID-19 ရောဂါပိုး စစ်ဆေးမှုများ ပြုလုပ်ရန် ကျန်းမာရေး စစ်ဆေးခြင်းနှင့် ဓာတ်ခွဲနမူနာယူခြင်း လုပ်ငန်းများ ဆောင်ရွက်လျက်ရှိကြောင်း၊ မေ ၁၃ ရက်က ယင်းနေရာသို့ ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး သွားရောက်ကြည့်ရှုပြီး တာဝန်ကျ ကျန်းမာရေး ဝန်ထမ်းများအား ဆေးခန်းတွင် လာရောက်ပြသသူများကို ကုသမှုပေးရုံသာမက ကျန်းမာရေး အသိပညာပေးခြင်း လုပ်ငန်းများကို တွဲဖက်ဆောင်ရွက်ရန်နှင့် ရောဂါအမျိုးအစားအလိုက်၊ ကျား/မ အသက်အရွယ်အလိုက် ရောဂါဖြစ်ပွားမှုများကို အသုံးချ သုတေသနပုံစံ ဆောင်ရွက်ရန် စသည်တို့ကို မှာကြားခဲ့ကြောင်း သိရသည်။

ထို့ပြင် ဓာတ်ခွဲနမူနာရယူခြင်း လုပ်ငန်းများ ဆောင်ရွက်ရာတွင် ရောဂါကူးစက်ဖြစ်ပွားမှု မရှိစေရေး လိုက်နာကျင့်သုံးရန် ကျန်းမာရေး အသိပညာပေး နှိုးဆော်မှုများ ပြုလုပ်ရမည်ဖြစ်ကြောင်း၊ ဓာတ်ခွဲနမူနာရယူ စစ်ဆေးခံမည့် သူများအား ရောဂါလက္ခဏာ တစ်စုံတရာ မရှိသော်လည်း ရောဂါပိုး ကူးစက်ခံရမှု ရှိနေနိုင်သည်ကို အသိပညာပေး ပြောကြားရမည်ဖြစ်ကြောင်း၊ မိမိတွင် ရောဂါကူးစက်မှု ရှိပါကလည်း စောစီးစွာ ကုသမှု ခံယူနိုင်မည်ဖြစ်ပြီး မိမိ၏ မိသားစုနှင့် မိတ်ဆွေများထံသို့ ရောဂါကူးစက်မှုမှ ကာကွယ်နိုင်မည် ဖြစ်ကြောင်းကို အလေးထား ပြောကြားရန် လိုအပ်ကြောင်း၊ ရောဂါရှိသူ တစ်ဦးထံမှ ရောဂါကူးစက်မှု ခံရပါက ကူးစက်မှုခံရပြီး ငါးရက်မှ ခုနစ်ရက်အတွင်းတွင် ရောဂါပိုးတွေ့ရှိနိုင်ခြေ အများဆုံး ဖြစ်ကြောင်းနှင့် ဓာတ်ခွဲစစ်ဆေးရာတွင် ရောဂါပိုး မတွေ့ရှိရသော်လည်း ပေါ့ဆခြင်း မပြုဘဲ ရောဂါကူးစက်ပြန့်ပွားမှု မရှိစေရေး ဆောင်ရန်၊ ရှောင်ရန် အချက်များကို ဆက်လက်လိုက်နာရန်မှာ အထူးအရေးကြီးကြောင်း စသည်တို့ကို ပြောကြားသည်။

ထိုကဲ့သို့ ကျန်းမာရေး စစ်ဆေးခြင်းနှင့် ဓာတ်ခွဲနမူနာ ရယူခြင်းအား မေ ၁၃ ရက်တွင် လွှတ်တော် အထောက်အကူပြု ဝန်ထမ်းများအား လည်းကောင်း၊ မေ ၁၄ ရက်နှင့် ၁၅ ရက်တွင် လွှတ်တော် ကိုယ်စားလှယ်များအား လည်းကောင်း အလှည့်ကျ နံပါတ်စဉ်များဖြင့် ပြုလုပ်ဆောင်ရွက်လျက်ရှိသည်။        

COVID-19 ရောဂါကူးစက်ပြန့်ပွားမှုအား ကာကွယ်နိုင်ရန်အတွက် လွှတ်တော်ကျင်းပနေစဉ် ကာလအတွင်း လွှတ်တော် ကိုယ်စားလှယ်ကြီးများနှင့် လွှတ်တော်အရပ်ရပ်မှ တာဝန်ရှိသူများ အနေဖြင့် ကျန်းမာရေးနှင့် အားကစား ဝန်ကြီးဌာနမှ ထုတ်ပြန်ထားသော အကြံပြုချက်များအတိုင်း တိကျစွာ လိုက်နာဆောင်ရွက်ရမည် ဖြစ်ကြောင်း ထုတ်ပြန်ကြေညာထားသည်။