Top News

ရန်ကုန်တိုင်းအတွင်းရှိ အခြေခံစားသောက်ဆိုင်များကို ကန့်သတ်ချက်ဖြင့် ဖွင့်လှစ်ခွင့်ပြုနိုင်ရန် ကျန်းမာရေးဌာန၏ ညွှန်ကြားချက်ကို စောင့်ဆိုင်းနေပြီး Semi Lockdown ကျန်ရှိနေသည့် မြို့နယ်များ ပါဝင်မည် မဟုတ်ကြောင်း ရန်ကုန်တိုင်း ဒုတိယမြို့တော်ဝန် ဦးစိုးလွင်က ပြောကြားသည်။

“အခုမှ စဉ်းစားတုန်း၊ စျေးဆိုင်တွေ ပြန်ဖွင့်ဖို့ မဖွင့်ဖို့ ဆိုတာကို ညှိနှိုင်းနေတုန်း ရှိသေးတယ်။ ကျန်းမာရေးဌာနက စီစဉ်ညွှန်ကြား ရမှာပေါ့နော်။ သူတို့ဆီကနေ ဘာညွှန်ကြားချက်လာမယ်ဆိုတာ စောင့်ကြည့်ပြီးတော့ ကျွန်တော်တို့ ဘယ်လိုလုပ်ရမယ် ဆိုတာကို စဉ်းစားရမှာ။ ကျန်းမာရေး ဝန်ကြီးဌာနက ဘယ်လိုလုပ်မယ် ဆိုတာကို ညွှန်ကြားမှ ဆောင်ရွက်လို့ရမှာပါ။ ကျွန်တော်တို့က ပေးဖွင့်တာတော့ ဖွင့်မယ်။ လူသိပ်အများကြီး လက်မခံနိုင်ဘူး။ ဆိုင်တစ်ဆိုင်မှာ လူများနေရင် အလွယ်တကူ ကူးနိုင်တယ်။ Social Distancing က ခြောက်ပေလုပ်ထားတာကို ခြောက်ပေလုပ်ထားတဲ့ အခါကြတော့ ဆိုင်တွေမှာ လူဘယ်လောက် ဆန့်မလဲ။ ဆိုင်ထဲမှာ လူအများကြီး မရှိဖို့၊ ထိုင်စားသောက်ချင်ရင်တော့ ထိုင်စားသောက်လေ ပူးပူးကပ်ကပ်ကြီးထိုင်လို့ မရဘူးလေ။ ခွာခွာထိုင်ဖို့  အသိပေးရမှာပေါ့။ တကယ်လို့ ပြန်ဖွင့်ခွင့် ပေးလို့ရှိရင် ပိတ်ထားတာ ကြာလာပြီလေ။ လူတွေကလည်း ငြီးငွေ့လာပြီဆိုတော့ ဖြစ်တဲ့မြို့နယ်တွေတော့ ပိတ်ထားမယ်။ မဖြစ်တဲ့ မြို့နယ်တွေကို ပိတ်ထားမယ်။ အခု Semi Lockdown ကနေ ဖွင့်သွားတဲ့ မြို့နယ်ကို ဖွင့်ပေးမယ်။ အားလုံးကို ဖွင့်ပေးမှာ မဟုတ်ဘူး။ အင်းစိန်လိုမြို့နယ်ကိုတော့ မဖွင့်ပေးနိုင်သေးဘူး။ Semi Lockdown ရှိနေသေးတဲ့ မြို့နယ်တွေကိုတော့ ဖွင့်ခွင့်မပြုပါဘူး။ ကျန်တဲ့မြို့နယ်တွေကို ဖွင့်ဖို့စီစဉ်နေတယ်” ဟု ဦးစိုးလွင်က ပြောကြားသည်။

မေ ၁၃ ရက်တွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် ကျန်းမာရေးနှင့် အားကစား ဝန်ကြီးဌာန ပြည်ထောင်စုဝန်ကြီး၊ ရန်ကုန်မြို့တော်ဝန် ဦးမောင်မောင်စိုး၊ ဒုတိယမြို့တော်ဝန် ဦးစိုးလွင်၊ လှိုင်သာယာ၊ ရွှေပြည်သာနှင့် ဗိုလ်တထောင်မြို့နယ်များမှ လွှတ်တော်ကိုယ်စားလှယ်များ Video Conferencing ဆွေးနွေးခဲ့ကြောင်း သိရသည်။

အဆိုပါ ဆွေးနွေးပွဲတွင် ရန်ကုန်တိုင်း၌ Semi Lockdown ပြုလုပ်ထားသည့် တာမွေ၊ ဗိုလ်တထောင်နှင့် မင်္ဂလာဒုံမြို့နယ်၊ တောင်ဥက္ကလာပမြို့နယ်၊ ပန်းဘဲတန်းမြို့နယ်၊ ဗဟန်းမြို့နယ်၊ မရမ်းကုန်းမြို့နယ်၊ အင်းစိန်မြို့နယ်၊ ရွှေပြည်သာမြို့နယ်၊ လှိုင်သာယာမြို့နယ်တို့အနက် လှိုင်သာယာ၊ ရွှေပြည်သာ၊ ဗိုလ်တထောင်၊ မင်္ဂလာဒုံမြို့နယ်များတွင် COVID-19 ရောဂါပိုးအသစ် တွေ့ရှိသူ မရှိတော့သည်မှာ ရက် ၂၀ ကျော်နေပြီ ဖြစ်သဖြင့် Semi Lockdown အားဖြေလျော့ရန် အဓိကထား ဆွေးနွေးခဲ့ကြောင်း သိရသည်။

လက်ရှိ၌ ရန်ကုန်တိုင်းအတွင်း စားသောက်ဆိုင်များတွင် ဆိုင်ထိုင်စားခွင့် မရှိဘဲ ပါဆယ်စနစ်ဖြင့်သာ ဝယ်ယူစားသုံးခွင့် ရှိနေသည်။

မေ ၁၁ ရက်တွင် ရန်ကုန်တိုင်းဒေသကြီး Coronavirus Disease 2019 (COVID-19) ထိန်းချုပ်ရေးနှင့် အရေးပေါ် တုံ့ပြန်ရေး ကော်မတီက ကြေညာချက် ထုတ်ပြန်ခဲ့ပြီး အဆိုပါ ကြေညာချက်တွင် နေအိမ်မှ ပြင်ပသို့ ထွက်ခွာသွားလာတိုင်း ပါးစပ်၊ နှာခေါင်းစည်း Mask တပ်ရန် ကျန်းမာရေးနှင့် အားကစားဝန်ကြီးဌာနက ထုတ်ပြန်ထားသည့် အချက်ဆယ်ချက်မှအပ လူငါးဦးဖြစ်စေ၊ လူငါးဦးထက်ပို၍ဖြစ်စေ စုဝေးခြင်းမပြုရန် ဖော်ပြထားသည်။

ကျန်းမာရေးနှင့် အားကစားဝန်ကြီးဌာ နက မေ ၁၄ ရက် နံနက်ပိုင်းအထိ ထုတ်ပြန်ချက်တွင် COVID-19 ရောဂါဖြစ်ပွားသူ ၁၈၁ ဦးရှိသည့်အနက် ရန်ကုန်တိုင်းဒေသကြီး အတွင်းရှိ မြို့နယ် ၂၈ မြို့နယ်တွင် ၁၄၆ ဦး ကူးစက်ခံထားရပြီး ငါးဦးသေဆုံးခဲ့ပြီဖြစ်ကြောင်း သိရသည်။