Top News

ကျူးကျော်နေထိုင်သူများကို စနစ်တကျ နေရာချထားပေးရန် ဆောင်ရွက်နေပြီး မေမေ့မေတ္တာပရောဂျက် အမည်ဖြင့် စီမံချက်တစ်ခု ရေးဆွဲ၍ ဆောင်ရွက်လျက်ရှိကြောင်း ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက ပြောကြားသည်။

ရန်ကုန်တိုင်းဒေသကြီး အစိုးရအဖွဲ့၏ စတုတ္ထနှစ် တစ်နှစ်တာ ကာလအတွင်း ပြည်သူများအတွက် ဆောင်ရွက်ချက်များနှင့် ရှေ့လုပ်ငန်းစဉ်များနှင့် ပတ်သက်၍ ပြောကြားရာတွင် ဦးဖြိုးမင်းသိန်းက ယင်းကဲ့သို့ ထည့်သွင်းပြောကြား ခဲ့ခြင်းဖြစ်သည်။

“အဓိက စိန်ခေါ်မှုအကြီးဆုံးကိစ္စ တစ်ခုက ကျူးကျော်ပြဿနာတစ်ရပ် ဖြစ်ပါတယ်။ ကျူးကျော်နေထိုင်နေတဲ့ သူတွေကို စနစ်တကျ နေရာချထားပေးဖို့ကို ကြိုးစားဆောင်ရွက်နေပါတယ်။ ဒီကိစ္စကို Community ကနေ အခြေပြုပြီး မေမေ့မေတ္တာပရောဂျက်ဆိုပြီး စီမံချက်တစ်ခု ရေးဆွဲပြီး ဆောင်ရွက်နေပါတယ်။ ကျူးကျော်နေထိုင် သူတွေဟာ တိုင်းဒေသကြီးရဲ့ လုပ်သားအရင်းအမြစ်တွေ ဖြစ်ပါတယ်။ သူတို့ရဲ့ လူမှုဘဝကို စနစ်တကျ ဖွံ့ဖြိုးတိုးတက်အောင် ဆောင်ရွက်ပေးခြင်းဖြင့် နိုင်ငံတော်ရဲ့ စီးပွားရေး ဖွံ့ဖြိုးတိုးတက်ရေးကို အထောက်အကူ ဖြစ်စေမှာ ဖြစ်ပါတယ်” ဟုဦးဖြိုးမင်းသိန်းက ပြောကြားသည်။

တိုင်းဒေသကြီး အစိုးရအနေဖြင့် ကျူးကျော်နေထိုင်သည့် သူများကို Community ပိုင်မြေပေါ်တွင် ၎င်းတို့ကို စနစ်တကျ နေရာချထားပေးပြီး ချေးငွေကဏ္ဍတစ်ခု တည်ထောင်ပေးခြင်းဖြင့် နေအိမ်များကို တည်ဆောက်ပြီး ၎င်းတို့ ပိုင်ဆိုင်သည့် အိမ်ရာအဖြစ် နေထိုင်နိုင်ရန် ဆောင်ရွက်ပေးနိုင်ခဲ့ကာ ရွှေပြည်သာ၊ လှိုင်သာယာနှင့် ဒဂုံမြို့သစ်မြို့ နယ်များတွင် ဆောင်ရွက်လျက်ရှိကြောင်း ဝန်ကြီးချုပ်က ပြောကြားသည်။

“ကျူးကျော်နေထိုင်တဲ့ သူတွေကို စနစ်တကျ နေရာချထားပေးရေးက စက်ရုံ၊ အလုပ်ရုံတွေမှာ အလုပ်လုပ်နေတဲ့ လုပ်သားအင်အားကို ဖြည့်ဆည်းပေးရာ ရောက်သလို စက်မှုဇုန်တွေရဲ့ မီးဘေး၊ ရေဘေး ကိစ္စရပ်တွေကိုပါ ထိန်းသိမ်းရာ ရောက်ပါတယ်။ စက်မှုဇုန်ထဲမှာ ကျူးကျော်နေထိုင်တဲ့အတွက် မီးဘေးအန္တရာယ်ရှိသလို ရေနုတ်မြောင်းတွေ အပေါ်မှာ ကျူးကျော်အိမ်တွေနဲ့ ပိတ်ဆို့နေတဲ့အတွက် ရေကြီးရေလျှံမှု ပြဿနာတွေကို ကြုံရပါတယ်။ ဒါကြောင့် စက်မှုဇုန်အဆင့် မြှင့်တင်ရေးကဏ္ဍကို ကြိုးပမ်း ဆောင်ရွက်နေပါတယ်” ဟု ဝန်ကြီးချုပ်က ပြောကြားသည်။

ရန်ကုန်တိုင်းအစိုးရက ကျူးကျော်နေ ပြည်သူများအတွက် တွံတေးမြို့နယ်၌ အိမ်ရာယူနစ် ၂၆၀၀၀ ကျော် ဆောက်လုပ်ပေးမည် ဖြစ်ကြောင်း ရန်ကုန်တိုင်းဒေသကြီး အစိုးရအဖွဲ့ လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က ယခုနှစ် ဇန်နဝါရီ၂၉ ရက်တွင် ပြုလုပ်သည့် ဒုတိယအကြိမ် ရန်ကုန်တိုင်းဒေသကြီး လွှတ်တော် ၁၁ ကြိမ်မြောက် ပုံမှန်အစည်းအဝေး ဒသမနေ့တွင် ပြောကြားသည်။

လက်ရှိရွှေပြည်သာမြို့နယ် သံဒင်း ၄၈ ရပ်ကွက်တွင် Community Land Housing ပထမအသုတ်တွင် အိမ် ၂၆၄ လုံး ဆောက်လုပ်ပြီးစီး၍ နေရာချထားပြီးဖြစ်ကြောင်း၊ ဆက်လက်၍ ရွှေပြည်သာ၊ လှိုင်သာယာ၊ ဒဂုံဆိပ်ကမ်း၊ ဒဂုံတောင်၊ ဒဂုံအရှေ့နှင့် ရွှေပေါက္ကံတို့တွင် အိမ်ရာယူနစ် တစ်သောင်းစီ စုစုပေါင်းအိမ်ရာ ခြောက်သောင်း ဆောင်ရွက်သွားရန် စီမံကိန်း ရေးဆွဲထားကြောင်း ရန်ကုန်တိုင်းဒေသကြီး အစိုးရအဖွဲ့က ပြောကြားထားသည်။