Top News

၂၀၂၀ ပြည့်နှစ် နှစ်ကုန်ပိုင်း၌ ကျင်းပဖွယ်ရှိသည့် အထွေထွေရွေးကောက်ပွဲတွင် မဲပေးသူ ရာခိုင်နှုန်းများပြားစေရန် ကြိုတင်မဲပေးခြင်းကိုအားပေးရန် လိုအပ်သည်ဟု ရွေးကောက်ပွဲဆိုင်ရာ ပြည်သူ့လှုပ်ရှားမှုအဖွဲ့ (PACE) စီမံကိန်းအစီအစဉ် မန်နေဂျာကို ဟန်စိုးထွန်းက ပြောကြားသည်။

PACE ဖန်တီးအိမ်နှင့် ရောင်ခြည်သစ်တို့ ပြီးခဲ့သည့်ရက်ပိုင်းက အွန်လိုင်းမှ ပါဝင်ဆွေးနွေးခဲ့သည့် COVID-19 ကပ်ရောဂါကာလ ရွေးကောက်ပွဲစကားဝိုင်းတွင် ကိုဟန်စိုးထွန်းက ပြောကြားခဲ့ခြင်းဖြစ်သည်။

ရွေးကောက်ပွဲကျင်းပချိန် COVID-19 ကူးစက်မည့် စိုးရိမ်မှုကြောင့် ပြည်သူက လာရောက်မဲပေးမှုမရှိလျှင် ကိုယ်စားပြုမှုနှင့် မှန်ကန်သည့် ကိုယ်စားလှယ်လောင်းရရှိရေးတွင် အားနည်းမှုများ ဖြစ်ပေါ်နိုင်သည်ဟု ကိုဟန်စိုးထွန်းက ဆိုသည်။

“အဲဒီတော့ ရွေးကောက်ပွဲနေ့ တစ်နေ့တည်းမှာတင် မဲပေးဖို့ကို အာရုံမစိုက်ဘဲနဲ့ ကြိုတင်မဲပေးမှုကိုပါ အာရုံစိုက်လာဖို့လိုတယ်” ကိုဟန်စိုးထွန်းက ပြောကြားသည်။

ကြိုတင်မဲကိုအားမပေးကြသည့် ရည်ရွယ်ချက်မှာ ကြိုတင်မဲသည် မဲလိမ်၊ မဲခိုးသည့် ပြဿနာများ ပေါ်ပေါက်နိုင်သည်ဟု ယူဆသောကြောင့်ဖြစ်ပြီး ယင်းအတွက် လက်ရှိကြိုတင်မဲပေးသည့် နည်းဥပဒေကို ပြင်ဆင်ရန် လိုအပ်သည်ဟု ၎င်းက ဆိုသည်။

ကြိုတင်မဲပေးရာတွင် ပြည်တွင်းရွှေ့ ပြောင်းသူများ ကြိုတင်မဲပေးသည့်စနစ်နှင့် ပြည်ပရောက်သူများ မဲပေးသည့်စနစ် နှစ်မျိုးရှိပြီး တည်ဆဲနည်းဥပဒေအရ ပြည်တွင်းရွှေ့ပြောင်းသူများသည် ရွေးကောက်ပွဲမတိုင်မီ ကော်မရှင်မှ သတ်မှတ်ကြေညာပေးသည့်နေ့တွင် ကြိုတင်မဲပေးရပြီး ပြည်ပရောက်သူများသည် သက်ဆိုင်ရာနိုင်ငံ၏ မြန်မာနိုင်ငံ ဆိုင်ရာသံရုံး၊ ကောင်စစ်ဝန်ရုံးများတွင် ကြိုတင်မဲပေးရသည်။

COVID-19 ဖြစ်ပွားနေဆဲကာလဖြစ်သောကြောင့် မဲပေးမည့်ပြည်သူလူထုနှင့် မဲရုံစောင့်ကြပ်မည့် ဝန်ထမ်းများ ရောဂါကူးစက်မှု မခံရစေရေး သမားရိုးကျမဟုတ်သော နည်းလမ်းများကို အသုံးပြုရန် လိုအပ်ကာ ယင်းအတွက် ရွေးကောက်ပွဲကော်မရှင်အနေဖြင့် သက်ဆိုင်ရာကဏ္ဍအသီးသီးမှ အဖွဲ့အစည်းများနှင့် ညှိနှိုင်းဆွေးနွေးရန် လိုအပ်ကြောင်း စကားဝိုင်းတွင် ပါဝင်ဆွေးနွေးသူများက ထောက်ပြသည်။

“ရွေးကောက်ပွဲဖွင့်တဲ့အချိန်၊ ပိတ်တဲ့အချိန် ရွေးကောက်ပွဲကို လာထည့်တဲ့အချိန်မျိုးတွေကအစ COVID ကပ်ရောဂါနဲ့ ကူးစက်ရောဂါကနေ ကာကွယ်နိုင်တဲ့ အစီအမံတွေဖြစ်ဖို့။ အဲဒါတွေ နည်းဥပဒေအသစ်တော့ ပြန်ထုတ်ရမယ်ထင်တယ်။ ကော်မရှင်အနေနဲ့” ဟု ဖန်တီးအိမ်အဖွဲ့ဒါရိုက်တာ မခင်လေးငယ်က ပြောကြားသည်။

ပုံမှန်အခြေအနေတွင်ပင် အားနည်းသည့် မဲစာရင်းစစ်ဆေးမှု လုပ်ငန်းစဉ်အတွက် အွန်လိုင်းမှတစ်ဆင့် ဆောင်ရွက်နိုင်သည့် နည်းပညာအကူအညီနှင့် ကပ်ရောဂါကာလဖြစ်၍ ကျန်းမာရေးဝန်ကြီးဌာန၏ အကြံဉာဏ်များလည်း ရယူဆောင်ရွက်ရန် ပါဝင်ဆွေးနွေးသူများက တိုက်တွန်းသည်။

“ပြည်ထောင်စုရွေးကောက်ပွဲကော်မရှင်အနေနဲ့က မဲစာရင်းကိုလူတွေ လာစစ်ဖို့အတွက် ဘယ်လိုနည်းနဲ့ လုပ်မလဲဆိုတာ နည်းပညာပိုင်းဆိုင်ရာ အကန့်အသတ်ရှိတယ်။ ပုံမှန်သမားရိုးကျနဲ့ မဲစာရင်းက ကြေညာလို့ မရနိုင်တော့ဘူး။ အဲဒါဆိုရင် ဒီမဲစာရင်းမှာပါတဲ့ အချက်အလက်တွေကို ပြည်သူတွေ စစ်ဖို့အတွက် မဲစာရင်းအချက်အလက်တွေကို ပြည်သူတွေဆီရောက်အောင် ဘယ်လိုပေးမလဲဆိုတာက စိန်ခေါ်မှုပဲ” ဟု ရောင်ခြည်သစ်အဖွဲ့ ဒါရိုက်တာမခင်လှက ပြောကြားသည်။