Top News

COVID-19 ကြောင့် ထိခိုက်သည့် စီးပွားရေးလုပ်ငန်းများအတွက် အစိုးရက ကျပ်ဘီလျံ ၁၀၀ ထုတ်ချေးပေးမည့် အစီအစဉ်တွင် လျှောက်လွှာ ၄၀၀၀ ကျော်ရရှိထားပြီး လုပ်ငန်းရှင် ၃၀၀ ကျော်ကို ချေးငွေ ၁၃ ဘီလျံကျော် ထုတ်ပေးထားပြီးဖြစ်ကာ ကျန်ချေးငွေများကို မေလကုန်တွင် ထုတ်ပေးနိုင်မည်ဟု ခန့်မှန်းထားကြောင်း ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI) အထွေထွေအတွင်းရေးမှူးချုပ် ဦးအေးဝင်း၏ ပြောကြားချက်အရ သိရသည်။

ချေးငွေလျှောက်လွှာစတင်လက်ခံသည့် မတ် ၃၀ ရက်မှ လျှောက်လွှာပိတ်သည့် ဧပြီ ၉ ရက်အထိ လျှောက်လွှာ ၄၂၅၈ စောင် လက်ခံရရှိခဲ့ပြီး  လုပ်ငန်းရှင် ၃၀၀ ကျော်ကို ငွေကျပ် ၁၃ ဘီလျံ ချေးပေးခဲ့ပြီးဖြစ်ကြောင်း သိရသည်။

အဆိုပါ လျှောက်လွှာ ၄၂၅၈ စောင်တွင် သတ်မှတ်ထားသည့် အချက်အလက်များနှင့် ကိုက်ညီသည့် လုပ်ငန်းများကိုသာ ချေးငွေထုတ်ပေးမည်ဖြစ်ပြီး COVID-19 ကာလအတွင်း စီးပွားရေးလုပ်ငန်းများ ဆက်လက်လည်ပတ်နိုင်ရန် ထုတ်ပေးခြင်းဖြစ်ကာ လုပ်ငန်းချဲ့ထွင်ရန် ရင်းနှီးမြှုပ်နှံရန် ထုတ်ပေးခြင်းမဟုတ်ကြောင်း သိရသည်။

“မတ်လ ၂၉ ရက်မှာ ဘီလျံ ၁၀၀ ချေးငွေကို ကုန်သည်စက်မှုအသင်းချုပ်မှာရယ်၊  တိုင်းနဲ့ပြည်နယ်မှာရှိတဲ့  ကျွန်တော်တို့ရဲ့ CCI တွေအားလုံးမှာရယ်၊ ချေးငွေလျှောက်လွှာတွေကို လက်ခံဖို့ မတ်လ ၃၀ ရက်နေ့က နေပြီးတော့ ဧပြီလ ၉ ရက်အထိကို လက်ခံဖို့ဆိုပြီးတော့ ကြေညာခဲ့ပါတယ်။ အသင်းချုပ်ကနေ ချေးငွေလျှောက်လွှာ  ၄၂၅၈ စောင် ချေးငွေလျှောက်လွှာ လက်ခံရရှိပါတယ်။ အဲဒါကတော့ အဓိကကတော့ နေရာသုံးနေရာကနေပြီးတော့ ရရှိတာပါ။ အသင်းချုပ် ရန်ကုန်ရုံးမှာလာပြီးတော့ တင်တဲ့လျှောက်လွှာတွေရှိတယ်။ တိုင်းနဲ့ပြည်နယ်မှာ လာပြီးတော့ တင်တဲ့လျှောက်လွှာတွေရှိတယ်။ ကျွန်တော်တို့ ဒီအွန်လိုင်းကနေပြီးတော့ လက်ခံရရှိတဲ့ လျှောက်လွှာတွေရှိတယ်။ လက်ရှိအချိန်မှာတော့ ပထမအသုတ်မှာ ၈၅ ဦး၊ ဒုတိယအသုတ်မှာတော့ ၁၁၃ ဦးနဲ့ တတိယအသုတ်မှာတော့ ၁၁၁ ဦး စုစုပေါင်း ၃၀၀ ကျော် ချေးငွေထုတ်ချေးပြီးပါပြီ။ လျှောက်လွှာတွေကို အဆင့်ဆင့်စိစစ်ရတော့ အချိန်တော့ တော်တော်လေးယူရပါတယ်။ ယခုလကုန်လောက် နောက်ဆုံးထားပြီးတော့ လုပ်ငန်းတော်တော်များများကို ချေးငွေထုတ်ချေးနိုင်မယ်လို့ မျှော်မှန်းထားပါတယ်” ဟု UMFCCI အထွေထွေအတွင်းရေးမှူးချုပ် ဦးအေးဝင်းက ပြောကြားသည်။

ချေးငွေလျှောက်ထားသည့် မတူညီသောလုပ်ငန်းအမျိုးအစားများနှင့် လုပ်ငန်းအရွယ်အစားများထဲမှ အဆင့်ဆင့်စိစစ်ရွေးချယ်ရပြီး မေလကုန်နောက်ဆုံးထားကာ ကျန်ရှိနေသည့်လျှောက်လွှာတွေကို ချေးငွေထုတ်ပေးသွားနိုင်ရန် မျှော်မှန်းထားကြောင်း၊ ချေးငွေရရှိသည့် လုပ်ငန်းများအနေဖြင့် ၎င်းတို့နှင့် သက်ဆိုင်ရာ တိုင်းနဲ့ပြည်နယ်များရှိ မြန်မာ့စီးပွားရေးဘဏ်တွင် သွားရောက်ထုတ်ယူနိုင်ပြီး ဘဏ်နှင့် စာချုပ်ချုပ်ပြီးပါက ချေးငွေရရှိမည်ဖြစ်ကြောင်း သိရသည်။

အဆိုပါချေးငွေသည် လုပ်ငန်းရှင်များအနေဖြင့် မိမိတို့လုပ်ငန်းရှိ ဝန်ထမ်းများ လုပ်သားများကို လစာထုတ်ပေးနိုင်ရန် ထုတ်ချေးခြင်းဖြစ်ပြီး ဝင်ငွေအလွန်နည်းကာ ထိုးကျသွားသည့်လုပ်ငန်းများ ကာလတစ်ခုထိ လည်ပတ်နိုင်ရန် လုံလောက်သည့်ငွေဖြစ်ကြောင်း သိရသည်။

“နောက်တစ်ခုက နယ်ကလျှောက်လွှာ တင်ထားတဲ့တချို့သူတွေက သူတို့နောက်ကျနေတယ်ဆိုတာမျိုး ပြောတယ်။ ချေးငွေ မကျသေးဘူးဆိုပြီးတော့ စိတ်ပူနေတာမျိုးတွေရှိတယ်။ အဓိကက လျှောက်လွှာလက်ခံမယ် ပရိုစီဂျာပေါ်မှာလည်း မူတည်တယ်။ နယ်တွေမှာ တစ်ဆင့်တင်တဲ့သူတွေကျတော့ လျှောက်လွှာပိတ်တာ ၉ ရက်နေ့ ပိတ်တယ်။ အဲဒီလိုပိတ်တာကြောင့် လျှောက်လွှာတွေက သင်္ကြန်ကာလနောက်ပိုင်း ၂၀ ရက်နေ့ နောက်ပိုင်းလောက်မှ ရောက်လာတယ်။ ဒါပေမဲ့ တချို့နယ်တွေက အွန်လိုင်းကနေ လျှောက်တာမျိုးလည်းရှိတဲ့အတွက် စိစစ်တဲ့အပိုင်းမှာ မြန်သွားတာဖြစ်ပါတယ်။ အကြောင်းအမျိုးမျိုးကြောင့် ချေးငွေမတင်လိုက်ရတဲ့ လုပ်ငန်းတွေအတွက်လည်း နောက်ထပ်အခွင့်အလမ်းရှိ နိုင်ပါတယ်” ဟု ဦးအေးဝင်းက ပြောကြားသည်။

ကုန်သည်စက်မှုအသင်းချုပ်အနေဖြင့် WHO မှ ကိုရိုနာဗိုင်းရပ်သည် ကမ္ဘာ့ကပ်ရောဂါအဖြစ် သက်မှတ်ခဲ့သည့်အချိန်တွင် ကပ်ရောဂါကြောင့် မြန်မာနိုင်ငံစီးပွားရေးတွင်လည်း ရိုက်ခတ်မှုများ ရှိလာနိုင်သည့်အတွက် ကြိုတင်ပြင်ဆင်ဆောင်ရွက်မှုအဖြစ် နိုင်ငံတော်အစိုးရ၊ သက်ဆိုင်ရာဝန်ကြီးဌာနများ၊ လုပ်ငန်းရှင်များ၊ အသင်းအဖွဲ့များနှင့် အလုပ်သမားသမဂ္ဂများနှင့် ညှိနှိုင်းခဲ့ကြောင်း သိရသည်။ 

နေပြည်တော်တွင် ပြုလုပ်ခဲ့သည့် စီးပွားရေးကုစားမှုကော်မတီအစည်းအဝေးတွင် စီးပွားရေးအရ ထိခိုက်နစ်နာမှုများနှင့် ပတ်သတ်၍   ပထမအဆင့်အနေဖြင့် ဘီလျံ ၁၀၀ စတင်ထုတ်ချေးမည့် အစီအစဉ်ကို ညှိနှိုင်းဆောင်ရွက်ပေးခဲ့ကြောင်း သိရသည်။