Top News

COVID-19 ကိစ္စရပ်နှင့်ပတ်သက်သည့် စည်းကမ်းဖောက်ဖျက်မှုများကြောင့် တရားစွဲဆို ထောင်ဒဏ်ချမှတ်ခံရသူသည် မတ်လမှ ဧပြီလကုန်အထိ ၆၇၀ ရှိပြီး ညမထွက်ရအမိန့် ချိုးဖောက်၍ အရေးယူခံရသူဦးရေ အများဆုံးဖြစ်ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ မေ ၁၄ ရက်တွင် ထုတ်ပြန်ချက်အရ သိရသည်။

ယင်းသို့ တရားစွဲဆိုထောင်ဒဏ်ချမှတ်ခံရမှုများတွင် ညမထွက်ရအမိန့်ကို ချိုးဖောက်မှုကြောင့် အရေးယူခံရသူ ၄၅၅ ဦးရှိပြီး Quarantine စင်တာတွင် နေထိုင်စဉ် သတ်မှတ်စည်းကမ်းမလိုက်နာ၍ သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေ၊ ကူးစက်ရောဂါများ ကာကွယ်နှိမ်နင်းရေးဥပဒေတို့ဖြင့် တရားစွဲဆို ထောင်ဒဏ်ချမှတ်ခံရသူ ၁၈၄ ဦးရှိကြောင်း AAPP ၏ ထုတ်ပြန်ချက်တွင် ပါရှိသည်။

ဧရာဝတီတိုင်းဒေသကြီးရှိ မြို့နယ်အချို့တွင် ညမထွက်ရအမိန့် ချိုးဖောက်သူ၂၀၀ ကျော်နှင့် ကရင်ပြည်နယ် မြဝတီမြို့တွင် ၁၃၁ ဦးကို အရေးယူခဲ့ပြီး တနင်္သာရီတိုင်း၊ စစ်ကိုင်းတိုင်း၊ မန္တလေးတိုင်း၊ ပဲခူးတိုင်း၊ ရန်ကုန်တိုင်း၊ ရှမ်းပြည်နယ်နှင့် ကယားပြည်နယ်တို့တွင် ညမထွက်ရအမိန့် ချိုးဖောက်၍ အရေးယူခံရသူ စုစုပေါင်း ၁၅၆ ဦးရှိကြောင်း AAPP ထုတ်ပြန်ချက်တွင် ဖော်ပြထားသည်။

မေ ၁၅ ရက်အထိ အကျုံးဝင်သော ည ၁၀ နာရီမှ နံနက် ၄ နာရီအထိ နေအိမ်ပြင်ပ သွားလာမှုမပြုရ အမိန့်ညွှန်ကြားချက်ကို တိုင်းဒေသကြီးနှင့် ပြည်နယ်အစိုးရများက ဧပြီလလယ်ခန့်တွင် ထုတ်ပြန်ထားခြင်းဖြစ်သည်။

ထို့ပြင် သတ်မှတ်ထားသည့်အမိန့်များ ချိုးဖောက်မှုကြောင့် ရာဇသတ်ကြီးဥပဒေဖြင့် အမှုဖွင့်ခံရသူ ၁၉ ဦး၊ ငြိမ်းချမ်းစွာစုဝေးခွင့်နှင့် စီတန်းလှည့်လည်ခွင့်ဥပဒေဖြင့်တစ်ဦး အမှုဖွင့်ခံရပြီး ရဲအက်ဥပဒေဖြင့်နှစ်ဦး၊ နိုင်ငံခြားသားများ မှတ်ပုံတင်ရေး အက်ဥပဒေဖြင့် တစ်ဦးတို့ တရားစွဲဆို ထောင်ဒဏ်ချမှတ်ခံခဲ့ရကြောင်း AAPP မှ သိရသည်။

COVID-19 ထိန်းချုပ်ရေးဆောင်ရွက်သည့် တာဝန်ရှိသူများအား ဓားဖြင့်ရန်ပြုမှုကြောင့် ရာဇသတ်ကြီးဥပဒေဖြင့် အမှုဖွင့်ရသူများနှင့် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေဖြင့် တရားစွဲဆိုခံရသူအချို့လည်း ရှိကြောင်း သိရသည်။

COVID-19 နှင့်ပတ်သက်၍ သက်ဆိုင်ရာတိုင်းဒေသကြီးနှင့် ပြည်နယ်အစိုးရများ၏ ညွှန်ကြားချက်များကို ချိုးဖောက်၍ အရေးယူခံရမှုများအနက် ကချင်ပြည်နယ် မြစ်ကြီးနား မြို့နယ်ရှိ မြစ်ကြီးနားဘူတာတိုက်နံရံ၌ COVID-19 အသိပညာပေး ပန်းချီရေးဆွဲသူ သုံးဦးကို တရားစွဲဆိုမှုဖြစ်စဉ်၊ ရန်ကုန်တိုင်းဒေသကြီး COVID-19 ရောဂါထိန်းချုပ်နိုင်ရေး ထုတ်ပြန်ထားသည့် ညွှန်ကြားချက်များအား လိုက်နာရန်ပျက်ကွက်သည့် တရားဟောဆရာ စောဒေးဗစ်လားအပါအဝင် လေးဦးကို သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေဖြင့် မရမ်းကုန်မြို့နယ်ရဲစခန်းနှင့် အင်းစိန်မြို့နယ်ရဲစခန်းတို့က အမှုဖွင့်သည့်ဖြစ်စဉ်၊ မွန်ပြည်နယ် ကျိုက်မရောမြို့နယ်တွင်း လူစုလူဝေးဖြင့် ဘုရားထီးတင်ပင့်ဆောင်ခြင်းအတွက် ဦးဆောင်သူ ကျိုက်မရောမြို့နယ် ကော့ခလိန်းကျေးရွာအုပ်စု၊ ကြာအင်းချောင်းကျေး ရွာမှဦးဇော်မင်းကို သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေဖြင့် တရားစွဲဆိုခဲ့သည့် ဖြစ်စဉ်များက ထင်ရှားခဲ့သည်။

အချို့သောတိုင်းဒေသကြီးနှင့် ပြည်နယ်များတွင် COVID-19  နှင့် ဆက်နွှယ်၍ အရေးယူခဲ့သည့် ဖြစ်စဉ်များမှာ Quarantine စင်တာမှ ထွက်ပြေးမှု၊ ရောဂါဖြစ်ပွားခြင်း ရှိ မရှိ ထိန်းသိမ်းစောင့်ကြပ်ခံရမည်ကို ကျေနပ်ခြင်းမရှိ၍ ဆဲဆိုရမ်းကားမှု၊ ရောဂါကာကွယ်ရေးဆောင်ရွက်သည့် တာဝန်ရှိသူများကို နှောင့်ယှက်မှု၊ ကျန်းမာရေးအစစ်ဆေးခံရန် ငြင်းဆန်မှု၊ COVID-19 ဖြစ်ပွားနေစဉ်ကာ လအတွင်း လူစုလူဝေးဖြင့် ဆန္ဒပြတောင်းဆိုမှု၊ COVID-19 ကာကွယ်ထိန်းချုပ်ရေးအစိုးရ ညွှန်ကြားချက်များကို လိုက်နာဆောင်ရွက်ရန် ပျက်ကွက်မှု စသည်တို့ဖြစ်ကြောင်း AAPP ထုတ်ပြန်ချက်အရ သိရသည်။