Top News

ရန်ကုန်တိုင်းအတွင်းရှိ မြို့နယ်လေးခုနှင့် စစ်ကိုင်းတိုင်းအတွင်းရှိ မြို့နယ်တစ်ခုကို Stay at Home နေထိုင်ရန် သတ်မှတ်ချက် ပြန်လည်ပယ်ဖျက်လိုက်ကြောင်း ကျန်းမာရေးနှင့် အားကစားဝန်ကြီးဌာနက ထုတ်ပြန်ကြေညာလိုက်သည်ဟု မေ ၁၄ ရက် ည ၈ နာရီ သတင်းတွင် မြန်မာ့ရုပ်မြင်သံကြားက ကြေညာသည်။

Stay at Home သတ်မှတ်ထားသည့် မြို့နယ်များမှာ ရန်ကုန်တိုင်းဒေသကြီးတွင် ၁၀ မြို့နယ်၊ စစ်ကိုင်းတိုင်းဒေသကြီးတွင် တစ်မြို့နယ်ရှိပြီး ယင်းတို့အနက်မှ ရန်ကုန်တိုင်းတွင် လေးမြို့နယ်နှင့် စစ်ကိုင်းတိုင်းဒေသကြီးမှ တစ်မြို့နယ်တို့ကို ဖြေလျော့ပေးခဲ့ခြင်းဖြစ်သည်။

ဖြေလျော့ပေးခဲ့သည့် အကြောင်းရင်းမှာ  အနည်းဆုံး ၂၁ ရက်အတွင်း COVID-19 ရောဂါ ထပ်မံတွေ့ရှိရမှုမရှိခြင်း၊ ဓာတ်ခွဲဲအတည်ပြုလူနာများမှလည်း လူတစ်ဦးမှတစ်ဦး သို့ အစုလိုက် ကူးစက်ဖြစ်ပွားမှုမရှိခြင်း၊ Stay at Home ကာလအတွင်း ကျန်းမာရေးအသိပညာ မြှင့်တင်ခြင်းလုပ်ငန်းများကို သက်ဆိုင်ရာဌာနများနှင့် ပြည်သူများက အလေးထားဆောင်ရွက်ခဲ့ခြင်း၊ ဓာတ်ခွဲအတည်ပြုလူနာနှင့် ဆက်စပ်မိသူအားလုံးကို ရှာဖွေဖော်ထုတ်၍ ဓာတ်ခွဲနမူနာရယူပြီး စစ်ဆေးရာတွင်လည်း အနည်းဆုံး ၂၁ ရက်အတွင်း ထပ်မံတွေ့ရှိရမှု မရှိခြင်း စသည့်အချက်များကြောင့်ဖြစ်သည်ဟု ကျန်းမာရေးဝန်ကြီးဌာနက ထုတ်ပြန်သည်။

Stay at Home သတ်မှတ်ချက် ပယ်ဖျက်လိုက်သည့် ရန်ကုန်တိုင်းဒေသကြီးရှိ မြို့နယ်လေးခုမှာ ရွှေပြည်သာ၊ လှိုင်သာယာ၊ မင်္ဂလာဒုံ၊ ဗိုလ်တထောင်မြို့နယ်များဖြစ်ပြီး စစ်ကိုင်းတိုင်းဒေသကြီးရှိ မြို့နယ်တစ်ခုမှာ ကလေးမြို့နယ်တို့ဖြစ်သည်။

ရန်ကုန်တိုင်းဒေသကြီးရှိ မြို့နယ်လေးခုမှာ ဧပြီ ၁၈ ရက်ကတည်းက Stay at Home နေထိုင်ရန် သတ်မှတ်ခံရပြီး တစ်လနီးပါးခန့်အကြာတွင် ဖြေလျော့လိုက်ခြင်းဖြစ်ကာ စစ်ကိုင်းတိုင်း ကလေးမြို့နယ်မှာ ဧပြီ ၂၀ ရက်တွင် Stay at Home သတ်မှတ်ခံခဲ့ရခြင်းဖြစ်သည်။

ကျန်းမာရေးနှင့် အားကစားဝန်ကြီးဌာန၏ ထုတ်ပြန်ချက်အရ ရွှေပြည်သာနှင့် မင်္ဂလာဒုံမြို့နယ်တို့တွင် ရောဂါပိုးတွေ့ရှိသူ သုံးဦးစီ၊ လှိုင်သာယာနှင့် ဗိုလ်တထောင်မြို့နယ်တို့တွင် ငါးဦးစီရှိခဲ့ပြီး စစ်ကိုင်းတိုင်း ကလေးမြို့တွင် တစ်ဦးရှိခဲ့ကြောင်း သိရသည်။