Top News

COVID-19 ရောဂါပိုး အများဆုံးတွေ့ရှိထားသည့် ရန်ကုန်မြို့တွင် အလုပ်ခွင်ဝင်ကြသူများ၊ စားဝတ်နေရေးအတွက် သွားလာလှုပ်ရှားသူများဖြင့် ပြန်လည်စည်ကားလာသည်ကို တွေ့ရသည်။

မေ ၁၄ ရက် မွန်းလွဲပိုင်းအထိ COVID-19 ရောဂါပိုးတွေ့ရှိထားသူ ၁၈၁ ဦးရှိလာခဲ့ပြီး ယင်းတွေ့ရှိမှုများအနက် ရန်ကုန်တိုင်းဒေသကြီးသည် ရောဂါပိုးတွေ့ရှိမှု အများဆုံးအဖြစ် ၁၄၁ ဦးထိရှိကြောင်း ကျန်းမာရေးနှင့် အားကစားဝန်ကြီးဌာန၏ သတင်းထုတ်ပြန်ချက်များအရ သိရသည်။

COVID-19 ရောဂါပိုး စတင်တွေ့ရှိခဲ့သည့် ကနဦးကာလများသည် သင်္ကြန်ကာလရုံး ပိတ်ရက်များနှင့် တိုက်ဆိုင်ခဲ့ပြီး ယင်းကာလများ၌ အစိုးရ၏ Stay at Home အစီအစဉ်အရ ရန်ကုန်မြို့တွင် လူသွားလူလာ နည်းပါးခဲ့သော်လည်း သင်္ကြန်အားလပ်ရက်များ ကုန်ဆုံး၍ လုပ်ငန်းခွင်များ ပြန်လည်စတင်လာချိန်၌ ရန်ကုန်မြို့မှာ ပြန်လည်စည်ကားလာခဲ့ခြင်း ဖြစ်သည်။

“တက္ကစီက အရင် Stay Home တုန်းကတော့ ဆွဲလို့ မကောင်းဘူးပေါ့။ ကားထွက်ချင်လည်း ထွက်လိုက်တယ်။ မထွက်ချင်လည်း နားလိုက်တယ်လေ။ ဒါပေမယ့် အဲဒီလိုအကြာကြီး နေသွားလို့ကလည်း မဖြစ်ဘူးကိုး။ အခုနောက်ပိုင်းက အလုပ်တွေကလည်း ပြန်ဖွင့်၊ ပြီးတော့ လူတွေကလည်း အရင်လောက် မဟုတ်တောင် ပြန်သွားနေကြတော့ ပုံမှန်လေးတော့ ကားက ဆွဲကောင်းနေတယ်။ ကားတွေကတော့ ပြန်ပိတ်လာပြီ” ဟု ရန်ကုန်မြို့အတွင်း သွားလာနေသည့် အငှားယာဉ်မောင်းတစ်ဦးက ပြောကြားသည်။

ဧပြီလကုန်ပိုင်းတွင် တစ်နိုင်တစ်ပိုင် စီးပွားရေးလုပ်ငန်းများ ပြန်လည်ဖွင့်လှစ်လုပ် ကိုင်လာသဖြင့် ပြန်လည်အသက်ဝင်လာခဲ့ရာမှ မေ ၁ ရက်တွင် အစိုးရ၏ သတ်မှတ်စစ်ဆေးမှုများအပြီး စက်ရုံ၊ အလုပ်ရုံများ ပြန်ဖွင့်လာမှုကြောင့် အလုပ်သွား၊ အလုပ်ပြန်ကြသူများ ပိုမိုများပြားလာခဲ့သည်ကို တွေ့ရသည်။

ယင်းအပြင် လက်လုပ်လက်စား အခြေခံလူတန်းစားများ၏ စားဝတ်နေရေးအတွက် သွားလာလှုပ်ရှားမှုများကြောင့်လည်း ရန်ကုန်မြို့သည် COVID-19 ရောဂါပိုး ထိန်းချုပ်နေသည့် ကာလအတွင်းတွင် မြင့်တက်လာသည် ရောဂါပိုးတွေ့ရှိသူ အရေအတွက်နှင့်အတူ ယာဉ်ကြောပိတ်ဆို့မှုများ ပြန်လည်ဖြစ်ပေါ်လာခြင်း၊ ရုံးတက်ရုံးဆင်းချိန်များတွင် လူအသွားအလာများ ပုံမှန်နီးပါး ပြန်လည်များပြားလာခဲ့သည်ကို တွေ့ရသည်။

“စျေးက မရောင်းလို့မရဘူးလေ။ မရောင်းရင် စားစရာရှိတော့မှာ မဟုတ်ဘူးလေ။ ရောဂါအတွက်ကတော့ Mask တက်တယ်။ လက်သန့်ဆေး ဆောင်ထားတယ်။ လူတွေကလည်း ဒီလိုပဲ သွားနေကြတာပဲလေ။ အခုဆို ပိုတောင်များလာသေးတယ်။ ဒါမှမလုပ်ရင် စားဝတ်နေရေးကမှ မပြေလည်တော့တာ။ မလုပ်လို့ မရဘူးလေ။ အိမ်ထဲမှာပဲ နေလို့မှမဖြစ်တာ” ဟု သာကေတမြို့နယ်အတွင်း လက်တွန်းလှည်းဖြင့် လှည့်လည်စျေးရောင်းချနေသူတစ်ဦးက ဆိုသည်။

ရန်ကုန်မြို့တွင် ရောဂါပိုးတွေ့ရှိမှု အများဆုံးမြို့နယ်ဖြစ်သည့် အင်းစိန်မြို့နယ်အပါအဝင် မြို့နယ်အချို့တွင် နေထိုင်သူများအား Stay at Home နေထိုင်ရန်အတွက် အစိုးရက ညွှန်ကြားမှုများ ပြုလုပ်ထားခြင်း၊ မေ ၁၃ ရက်မှ စတင်ကာ ရန်ကုန်မြို့အတွင်း သွားလာနေကြသူများအနေဖြင့် Mask မတပ်လျှင် ဒဏ်ရိုက်မည့် အစီအစဉ် ပြုလုပ်ခြင်း စသည်ဖြင့် အစိုးရက COVID-19 ရောဂါထိန်းချုပ်ရန် အတွက် ဆောင်ရွက်လျက်ရှိသည်။

ယင်းသို့ ထိန်းချုပ်လျက်ရှိနေသော်လည်း ရန်ကုန်မြို့အတွင်းတွင် ရုံးဆင်းရုံးတက်ချိန်များ၊ နံနက်ပိုင်းနှင့် ညနေပိုင်း အချိန်များတွင် ပျံကျစျေးသည်များ စျေးရောင်းချရာနေရာများ၊ လှည်းတန်းမီးပွိုင့်နှင့် အနီးတစ်ဝိုက်ကဲ့သို့ ယခင်က လူသွားလူလာ အလွန်များပြားခဲ့သည့် နေရာများနှင့် ရန်ကုန်မြို့လယ်တို့တွင် ယာဉ်ကြောပိတ်ဆို့မှုများဖြစ်ပေါ်ခြင်း၊ ယခင်အတိုင်းနီးပါး လူသွားလူလာ များပြားလာရာ ယင်းအခြေအနေသည် COVID-19 ရောဂါပိုး ပြန့်နှံ့မှု ပိုမိုဆိုးရွာလာစေမည်ကို ရန်ကုန်ဒေသခံအချို့က စိုးရိမ်မှုများ ဖြစ်ပေါ်လျက်ရှိနေသည်။

ကျန်းမာရေးနှင့် အားကစားဝန်ကြီးဌာနကလည်း ယင်းအခြေအနေများနှင့် ပတ်သက်၍ မေ ၃ ရက်တွင် ပိတ်ထားသော စက်ရုံ၊ အလုပ်ရုံများ ပြန်လည်ဖွင့်လှစ်လာခြင်းသည် ရောဂါကူးစက်ပြန့်ပွားမှုများ များပြားလာနိုင်သည့် အခြေအနေတစ်ရပ်တွင် ပါဝင်ကြောင်း သတင်းထုတ်ပြန်ခဲ့သည်။