Top News

မြန်မာနိုင်ငံအနေဖြင့် နိုင်ငံဖြတ်ကျော်ခေါ်ဆိုရေးစင်တာဂိုဏ်းများကို တိုက်ဖျက်ရာတွင် ထိုင်းနိုင်ငံနှင့် ပူးပေါင်းဆောင်ရွက်သွားမည်ဟု ထိုင်းဒစ်ဂျစ်တယ်စီးပွားရေးနှင့် လူမှုရေးဝန်ကြီး Prasert Jantararuangtong က ပြောကြားကြောင်း ဘန်ကောက်ပို့စ့်သတင်းတွင် ဖော်ပြထားသည်။

ဘန်ကောက်တွင် ကျင်းပသော ပ ဉ္စမအကြိမ်မြောက် အာဆီယံဒစ်ဂျစ်တယ်ဝန်ကြီးများ အစည်းအဝေးတွင် တက်ရောက်ခဲ့သူများက အွန်လိုင်းလိမ်လည်မှုနှင့် ခေါ်ဆိုရေးစင်တာ ဂိုဏ်းများသည် အရေးတကြီး ပြဿနာများဖြစ်ပြီး ပူးပေါင်းဖြေရှင်းရန် ကြိုးပမ်းမှုလိုအပ်ကြောင်း ပြောကြားခဲ့သည်ဟု ၎င်းက ပြောကြားသည်။

ထိုင်း ဒစ်ဂျစ်တယ်စီးပွားရေးနှင့် လူမှုရေးဝန်ကြီးဌာနအနေဖြင့် နိုင်ငံအများအပြားနှင့် သဘောတူညီမှုများ ပြုလုပ်ထားသော်လည်း အဆိုပါစာချုပ်များသည် မူဘောင်တစ်ခုသာ ပေးဆောင်ထားပြီး ထိထိရောက်ရောက် အကောင်အထည်ဖော်ရန်အတွက် ခိုင်မာသော အစီအမံများ လိုအပ်ကြောင်း ၎င်းက ဆက်လက်ပြောကြားသည်။

ထို့ပြင် ဇန်နဝါရီ ၁၆ ရက်နှင့် ၁၇ ရက်တွင် ထိုင်းနိုင်ငံဘန်ကောက်မြို့တွင် ပြုလုပ်ခဲ့သည့် အာဆီယံ ဒစ်ဂျစ်တယ်ဝန်ကြီးများအစည်းအဝေးတွင် အာဆီယံနိုင်ငံများအကြား ကျားဖျန့်လုပ်ငန်းများ နှိမ်နင်းရာတွင် ပူးပေါင်းဆောင်ရွက်မည့် ဘန်ကောက်ဒစ်ဂျစ်တယ်ကြေညာစာတမ်း ထုတ်ပြန်လိုက်သည်ဟု သတင်းတွင် ဆက်လက်ဖော်ပြထားသည်။

ဝန်ကြီးများအစည်းအဝေးတွင် ဆိုက်ဘာလုံခြုံရေး၊ နယ်စပ်ဖြတ်ကျော် ဒေတာဖလှယ်မှုနှင့် ဒစ်ဂျစ်တယ်စီးပွားရေး၏ ပူးတွဲဖွံ့ဖြိုးတိုးတက်ရေးအပါအဝင် ပူးပေါင်းဆောင်ရွက်မှုဆိုင်ရာ မူဘောင်အမျိုးမျိုးကိုလည်း ဆွေးနွေးခဲ့သည်။

ယခုနှစ်အစည်းအဝေး၏ ဆောင်ပုဒ်မှာ "Secure, Innovative, Inclusive: Shaping Asean's Digital Future" ဖြစ်ပြီး ဘေးကင်းလုံခြုံသော ဒစ်ဂျစ်တယ်ပတ်ဝန်းကျင်ကို တည်ဆောက်ရန် အာဆီယံ၏ ကတိကဝတ်ကို ရောင်ပြန်ဟပ်ခဲ့ပြီး ၎င်းတွင် အွန်လိုင်းခြိမ်းခြောက်မှုများနှင့် ဆိုက်ဘာရာဇဝတ်မှုများကို ချက်ခြင်းတုံ့ပြန်ခြင်း၊ တီထွင်ဆန်းသစ်မှုများနှင့် နည်းပညာအသစ်များကို ဖော်ဆောင်ခြင်းနှင့် နည်းပညာကို တန်းတူညီမျှရရှိစေရေးတို့ ပါဝင်သည်ဟု သတင်းတွင် ဆက်လက်ဖော်ပြထားသည်။

အဆိုပါအစည်းအဝေးသို့ နိုင်ငံတော်စီမံအုပ်ချုပ်ရေးကောင်စီမှ ဒုတိယဝန်ကြီးချုပ်နှင့် ပို့ဆောင်ရေးနှင့်ဆက်သွယ်ရေးဝန်ကြီးဌာန ပြည်ထောင်စုဝန်ကြီး ဗိုလ်ချုပ်ကြီး မြထွန်းဦးလည်း တက်ရောက်ခဲ့သည်။

ပြည်ထောင်စုဝန်ကြီး ဗိုလ်ချုပ်ကြီး မြထွန်းဦးက ဒစ်ဂျစ်တယ်အသွင်ကူးပြောင်းခြင်းအတွက် ဆောင်ရွက်ရာတွင် လုံခြုံမှု၊ ဆန်းသစ်တီထွင်မှုနှင့် အားလုံးပါဝင်နိုင်မှုဟူသည့် မူများအပေါ် အခြေခံပြီးဆောင်ရွက်ရန်လိုအပ်ကြောင်း၊ မြန်မာနိုင်ငံအပါအဝင် အာဆီယံနိုင်ငံများတွင် အွန်လိုင်းလိမ်လည်မှုများ တိုးတက်ဖြစ်ပေါ်လာနေသည့်အတွက် ၎င်းတို့ကိုတိုက်ဖျက်ရာတွင် ပိုမိုပူးပေါင်းဆောင်ရွက်ရန်၊ ဒစ်ဂျစ်တယ်ငွေကြေး ဝန်ဆောင်မှုများအပါအဝင် ဒစ်ဂျစ်တယ်ဝန်ဆောင်မှုများကို အသုံးပြုသူများက ယုံကြည်မှုမြှင့်တင်နိုင်ရေး ပူးပေါင်းဆောင်ရွက်ပေးရန်နှင့် အားလုံးပါဝင်သည့် ဒစ်ဂျစ်တယ်ချိတ်ဆက်မှုကို အကောင်အထည်ဖော်ရာတွင် အင်တာနက်နှင့် ချိတ်ဆက်အသုံးပြုနိုင်မှုကိုသာရည်မှန်းပြီး ဆောင်ရွက်ခြင်းမဟုတ်ဘဲ ပြည်သူများနှင့် စီးပွားရေးလုပ်ငန်းများမှ ဒစ်ဂျစ်တယ်ဝန်ဆောင်မှုများကို အဓိပ္ပာယ်ရှိရှိ အသုံးပြုနိုင်ရေးအတွက် digital literacy အစီအစဉ်များကိုလည်း အလေးပေးဆောင်ရွက်သွားရန် လိုအပ်ကြောင်း ဆွေးနွေးပြောကြားခဲ့သည်ဟု နိုင်ငံတော်စီမံအုပ်ချုပ်ရေးကောင်စီက သတင်းထုတ်ပြန်ထားသည်။