Top News

ကိုရိုနာဗိုင်းရပ်စ်ကူးစက်ပျံ့နှံ့မှုအား ကမ္ဘာ့ကျန်းမာရေးအဖွဲ့  WHO ၏ ကိုင်တွယ် ဖြေရှင်းမှုနှင့်ပတ်သက်၍ ဝေဖန်ခဲ့ပြီးနောက် ယင်းအဖွဲ့သည် အခြေခံကျသည့် ပြုပြင်ပြောင်းလဲမှု လုပ်ဆောင်ရန် လိုအပ်ကြောင်း နှင့် WHO  အတွက် အများဆုံးလှူဒါန်းသည့် နိုင်ငံဖြစ်သည့် အမေရိကန်က ထိုအဖွဲ့ထံ ရန်ပုံငွေကို ပြန်လည် ထည့်ဝင်ဖွယ် မရှိတော့ကြောင်း အမေရိကန် နိုင်ငံခြားရေးဝန်ကြီး မိုက်ပွန်ပီယိုက ပြောကြားခဲ့သည်။

WHO ၏အားနည်းချက်များကို ပြင်ဆင်ရန်အတွက် ဖွဲ့စည်းတည်ဆောက်ပုံဆိုင်ရာ ပြင်ဆင်ရန်လိုအပ်ကြောင်း ပွန်ပီယိုက   ဧပြီ ၂၂ ရက်နှောင်းပိုင်းတွင် Fox News သို့ ပြောကြားခဲ့သည်။ WHO ၏ ခေါင်းဆောင် ပိုင်းဆိုင်ရာ အပြောင်းအလဲ ပြုလုပ်ရန်ကို ပယ်ချရန် ရှိ၊ မရှိနှင့်ပတ်သက်၍  ပွန်ပီယိုက “အဲဒါထက် ပိုပြီးတော့ အမေရိကန်အခွန်ထမ်းတွေရဲ့ ငွေတွေ  WHO  ဆီ  ရောက်သွားတာမျိုးကို အမေရိကန်က ဘယ်တော့မှ အာမခံ ပေးနိုင်တော့မှာ မဟုတ်ဘူး” ဟု ၎င်းက ပြောကြားခဲ့သည်။

ပွန်ပီယို၏ ထိုးနှက်ချက်အပြီး အမေရိကန်အောက်လွှတ်တော်ရှိ ဒီမိုကရက်များက ထရန့်အစိုးရသည် ကိုရိုနာဗိုင်းရပ်စ်ကူးစက် ပျံ့နှံ့မှု ကိုင်တွယ် ဖြေရှင်းရာတွင် ၎င်းတို့၏ ညံ့ဖျင်းမှုအား အာရုံလွှဲစေရန်အတွက် WHO ကို ကြားဝင်ခံခိုင်းရန် ကြိုးစားနေသည်ဟု စွပ်စွဲခဲ့သည်။

သမ္မတဒေါ်နယ်ထရန့်ထံ ပေးပို့သည့် စာတစ်စောင်တွင် WHO  အတွက် အမေရိကန်အစိုးရက ပြီးခဲ့သောသီတင်းပတ်တွင် ထည့်ဝင်မှု ဆိုင်းငံ့ခဲ့သည့် အလှူငွေများကို ချက်ချင်း ပြန်လည်ထည့်ဝင်ရန် တောင်းဆို ထားခဲ့သည်။

 တရုတ်တွင် ယင်းဗိုင်းရပ်စ် ဆိုးဆိုးရွားရွား ကူးစက်ပျံ့နှံ့မှုကို WHO  က ဖုံးဖိပေးခဲ့သည်ဟု ထရန့်က စွပ်စွဲခဲ့သည်။ အမေရိကန်က ရန်ပုံငွေ အများအပြား ထည့်ဝင်ထားသော်လည်း WHO  သည် တရုတ်ကို အလွန်အမင်းဗဟိုပြု လွန်းသည်ဟုလည်း ၎င်းက စွပ်စွဲခဲ့သည်။ ထရန့်က အမေရိကန်အခွန်ထမ်းများသည် WHO အတွက် တစ်နှစ်လျှင် ဒေါ်လာ သန်း ၄၀၀ နှင့် သန်း ၅၀၀ အကြား ထောက်ပံ့ပေး ခဲ့ပြီး တရုတ်ကမူ တစ်နှစ်လျှင် ဒေါ်လာ သန်း ၄၀ နှင့် ယင်းထက်နည်းသည့် ပမာဏမျှသာ ထည့်ဝင်ခဲ့ကြောင်း ပြောကြားခဲ့သည်။

တရုတ်က WHO ကို  နောက်ထပ် ဒေါ်လာ သန်း ၃၀ ထည့်ဝင်မည်

ကမ္ဘာတစ်ဝန်းတွင် ကိုရိုနာဗိုင်းရပ်စ် တိုက်ဖျက်ရေးအတွက် ကူညီရန် တရုတ်က WHO ကို နောက်ထပ် ဒေါ်လာသန်း ၃၀ ပေးမည်ဟု ဧပြီ ၂၃ တွင် ထုတ်ပြန်ခဲ့သည်။ အမေရိကန်က WHO  အတွက် ရန်ပုံငွေ  ထောက်ပံ့မှု ရပ်ဆိုင်းမည်ဟု ထုတ်ပြန်ခဲ့ပြီး ရက်အနည်းငယ်အကြာတွင် တရုတ်က ယင်းသို့ ကြေညာခဲ့ခြင်းဖြစ်သည်။

ယခင် ကတိပေးခဲ့သည့် ဒေါ်လာ သန်း ၂၀ အပြင် နောက်ထပ် ဒေါ်လာ သန်း ၃၀ ပံ့ ပိုး ပေးမည်ဖြစ်ကြောင်း၊ ယင်းသည် ဖွံ့ဖြိုးဆဲနိုင်ငံများ၏ ကျန်းမာရေးစောင့်ရှောက်မှုစနစ်များ အားကောင်းစေရန် အထောက်အပံ့ဖြစ် စေနိုင်မည်ဖြစ်ကြောင်းတရုတ်နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ် ကန်စွမ်းက ပြောကြားခဲ့သည်။

တရုတ်၏ ထောက်ပံ့ပေးမှုသည် တရုတ်အစိုးရနှင့် ပြည်သူလူထုက WHO အပေါ် ထောက်ခံမှုနှင့် ယုံကြည်မှုကို ထင်ဟပ်စေကြောင်း ၎င်းက ပြောကြားခဲ့သည်။

အမေရိကန်က ရန်ပုံငွေထည့်ဝင်မှု ဆိုင်းငံ့ခဲ့မှုသည် WHO ၏ ကမ္ဘာတစ်ဝန်း အခြားရောဂါများ ထိန်းချုပ်သည့် အစီအစဉ် များအတွက် အကျိုးဆက်များဖြစ်လာနိုင်ခြေရှိသည်ဟု လေ့လာသူများက သတိပေးခဲ့သည်။

ဗိုင်းရပ်စ်ကူးစက်ပျံ့နှံ့မှုပမာဏကို WHO က ဖုံးဖိပေးခဲ့သည်ဆိုသောအနောက်တိုင်း၏ ဖော်ပြခဲ့မှုများကို တရုတ်က ငြင်းဆိုခဲ့ပြီး WHO နှင့် လွန်ကဲသည့် နွေးထွေးသော ဆက်ဆံရေးရှိသည်ဆိုသော အခိုင်အမာ ပြောကြားချက်များကိုလည်း ပယ်ချခဲ့သည်။ သို့သော် တရုတ်၏ ဒေသဆိုင်ရာအာဏာပိုင်များသည် ပြီးခဲ့သည့်နှစ် ဒီဇင်ဘာတွင် ဝူဟန်၌ ဗိုင်းရပ်စ်ဖြစ်ပွားမှုနှင့်ပတ်သက်ပြီး သတိပေးရန် ကြိုးစားခဲ့သည့် ဆရာဝန်များကိုနှုတ်ဆိတ်စေရန် ကြိုးပမ်းခဲ့သည်။