Top News

စပိန်တွင် ကိုရိုနာဗိုင်းရပ်စ်ကြောင့် နေ့စဉ် သေဆုံးမှုနှုန်းသည် ဧပြီ ၂၄ ရက်တွင် တစ်လကျော်အတွင်း အနိမ့်ဆုံးသို့ ကျဆင်းခဲ့သည်။ ဗိုင်းရပ်စ်ကြောင့် ၂၄ နာရီအတွင်း သေဆုံးသူအရေအတွက်သည် ၃၆၇ ဦးရှိပြီး ယခင်နေ့ သေဆုံးသူ ၄၄၀ ထက် ကျဆင်းကာ မတ် ၂၁ ရက်နောက်ပိုင်းတွင် အနိမ့်ဆုံး ကျဆင်းမှုလည်း ဖြစ်ခဲ့သည်။

ဗိုင်းရပ်စ်ကြောင့် သေဆုံးသူ စုစုပေါင်း ၂၂၅၂၄ ဦးရှိသည့် စပိန်သည် အမေရိကန်နှင့် အီတလီပြီးလျှင် ကမ္ဘာတွင် ကိုရိုနာဗိုင်းရပ်စ်ကြောင့် တတိယမြောက်သေဆုံးမှု အများဆုံးနိုင်ငံအဖြစ် ရပ်တည်ဆဲဖြစ်သည်။

ဗိုင်းရပ်စ်ကူးစက်ခံရသူအသစ် ၆၇၀၀ ကျော်ရှိပြီး စုစုပေါင်း ၂၁၉၇၆၄ ဦးအထိ မြင့်တက်ခဲ့သော်လည်း ၃၁၀၅ ဦးသည် ပြန်လည်ကောင်းမွန်ခဲ့ပြီ ဖြစ်သည်။

“ကျွန်မတို့ အခက်ခဲဆုံးအဆင့်၊ ရောဂါကြောင့် အကျပ်အတည်းဆိုက်နေတဲ့အဆင့်ကို အမှန်တကယ် ကျော်လွှားနိုင်ခဲ့ပါပြီ။ စပိန်ပြည်သူလူထုအားလုံးရဲ့ အားထုတ်ကြိုးပမ်းမှုကို ကျေးဇူးတင်ပါတယ်” ဟု အစိုးရအဖွဲ့ ပြောခွင့်ရပုဂ္ဂိုလ် Maria Jesus Montero က ပြောကြားခဲ့သည်။

ကူးစက်မြန်ကပ်ရောဂါကြောင့် သေဆုံးမှု ကျဆင်းမှုနှုန်းကို ထိန်းထားနိုင်ပြီဟု ကျန်းမာရေးဝန်ကြီး Salvador Illa က ပြောကြားခဲ့ပြီး မတ်လလယ်မှစပြီး နိုင်ငံတစ်ဝန်း ပိတ်ဆို့ထားမှုကို တဖြည်းဖြည်း ဖြေလျှော့မည့် အစီအစဉ်အတွက် ခွင့်ပြုပေးခဲ့သည်။

“ဧပြီ ၂၄ ရက် မွန်းလွဲပိုင်းမှာ ဒေသဆိုင်ရာ တာဝန်ရှိသူတွေနဲ့ စတင်ဆွေးနွေးမယ့် စံသတ်မှတ်ချက်တွေအပေါ်မှာ အခြေခံပြီး အစိုးရအဖွဲ့က ဦးတည်ချက် အပြောင်းအလဲကို ကြီးကြပ်ကွပ်ကဲမှာ ဖြစ်တယ်” ဟု ၎င်းက ပြောကြားခဲ့သည်။

ရောဂါကူးစက်မှုနှုန်း အနည်းဆုံးနှင့် အထူးကြပ်မတ်ကုသဆောင် ICU များကို ဝန်ပိမှု အနည်းဆုံး ဒေသများတွင် စီးပွားရေးအရ ထိခိုက်မှုဖြစ်စေသည့် Lockdown ချထားမှုကို လာမည့်လတွင် ထပ်မံဖြေလျှော့ပေးရန် အစိုးရအဖွဲ့က သတ်မှတ်ချက်များကို အကြမ်းဖျင်းဖော်ပြရန် စတင်လုပ်ဆောင်နေပြီဟု Cadena SER ရေဒီယိုတွင် ထုတ်လွှင့်ချက်အရ သိရသည်။

ကန့်သတ်ချက်များကို ဖယ်ရှားရန်အတွက် လူ ၁၀၀၀၀၀ ရှိသည့် ဒေသတစ်ခုတွင် နေ့စဉ် ဗိုင်းရပ်စ်ကူးစက်ခံရသူ နှစ်ဦးထက် မပိုသည့်အရေအတွက်နှင့် COVID-19 လူနာအရေအတွက်သည် ICU ခုတင် အရေအတွက်၏ ထက်ဝက်ကျော် မရှိစေရန် လိုအပ်သည်။

အစိုးရအဖွဲ့သည် Lockdown ချထားမှုများအနက် ဆောက်လုပ်ရေး လုပ်သားများကို လုပ်ငန်းခွင်သို့ ပြန်လည်သွားရောက်ရန် ခွင့်ပြုပေးခြင်း၊ ကလေးများကို အပြင်တွင် လမ်းလျှောက်ခွင့်ပြုခြင်းကဲ့သို့သော အဆင့် အချို့ကို ယခုသီတင်းပတ်အကုန်မှစပြီး ဖြေလျှော့ပေးခဲ့သော်လည်း နယ်စပ်တွင် ကန့်သတ်ချက်များကို မေနှောင်းပိုင်းအထိ ဖြေလျှော့ပေးမည်မဟုတ်ပေ။

လူအများ မျှော်လင့်ထားသကဲ့သို့ပင် အစိုးရအဖွဲ့သည် အကာအကွယ်ပေးသော ခွဲစိတ်ခန်းသုံး နှာခေါင်းစည်းတစ်ခုကို ၀.၉၆ ယူရို (ဒေါ်လာ ၁.၀၄) နှင့် ထုပ်ပိုးမှု ပမာဏအပေါ်မူတည်ပြီး ပိုးသတ်သည့် ဂျယ်နှင့် အရည် တစ်မီလီမီတာလျှင် ယူရို ၀.၀၁ မှ ၀.၀၂၁ နှုန်းဖြင့် စျေးနှုန်းများ သတ်မှတ်ပေးခဲ့သည်။

သေဆုံးသူအရေအတွက် ပိုမိုနည်းပါးသွားသော်လည်း နေ့စဉ် လူသေဆုံးမှုနှင့် ဗိုင်းရပ်စ်ကူးစက်မှုသစ်များကြောင့် ဆေးရုံများနှင့် အလောင်းများအား မသဂြုႋဟ်မီ အသုဘ ရှုနိုင်ရန် စီစဉ်ပေးသော နေရာများကဲ့သို့သော ဝန်ဆောင်မှုများသည် ဝန်ပိနေဆဲဖြစ်သည်။

မက်ဒရစ် မြောက်ပိုင်းရှိ ဆီဂိုးဗီးယားမြို့ မီးသဂြုႋဟ်ရုံ၏ ခရစ်ယာန်ဝတ်ပြုဆုတောင်းသည့် နေရာရှိ ခုံတန်းများတွင် ဒါဇင်နှင့် ချီသော ပြာအိတ်များ တန်းစီနေသည်။

စပိန်တွင် ကိုရိုနာဗိုင်းရပ်စ်ကူးစက်ခံရမှု ဒုတိယအများဆုံးဖြစ်သည့် ကတ်တလိုနီးယားဒေသတွင် ဒေသဆိုင်ရာအုပ်ချုပ်ရေးအဖွဲ့၏ ခွဲထွက်ရေးခေါင်းဆောင် Quim Torra က ဗဟိုအစိုးရ၏ ကူးစက်မြန် ကပ်ရောဂါ ကိုင်တွယ်ဖြေရှင်းမှုကို ဝေဖန်ခဲ့ပြီး ဘဏ္ဍာရေးဆိုင်ရာအကူအညီ ပိုမိုထောက်ပံ့ပေးရန် တိုက်တွန်းခဲ့သည်။

ကူးစက်မြန် ကပ်ရောဂါနှင့်ပတ်သက်ပြီး ဖြည့်ဆည်းပေးရန်နှင့် မူဝါဒစည်းလုံးညီညွတ်ရန် ကတ်တလန်နိုင်ငံရေးအင်အားစုများကို ၎င်းက တိုက်တွန်းခဲ့ပြီး အတိုက်အခံ ဆိုရှယ်လစ်များနှင့် ဗဟိုလက်ယာယိမ်းပါတီ Ciudadanos ထံမှ အဆိုပြုချက်ကို လက်ခံခဲ့သည်။