Top News

COVID-19 ကပ်ရောဂါကြောင့် ဧပြီ ၂၄ ရက်တွင် အီတလီ၌ သေဆုံးသူ ၄၂၀ ရှိခဲ့ပြီး ယင်းအရေအတွက်သည် မတ် ၁၉ ရက်နောက်ပိုင်း အီတလီတွင် နေ့စဉ်သေဆုံးသူ အရေအတွက် အနိမ့်ဆုံးပမာဏဖြစ်ကြောင်း၊ သို့သော် ဗိုင်းရပ်စ်ကူးစက်ခံရသူဦးရေသည် ဧပြီ ၂၃ ရက်တွင် ၂၆၄၆ ဦးမှ ၃၀၂၁ ဦးအထိ မြင့်တက်ခဲ့ကြောင်း အရပ်ဘက်ကာကွယ်ရေး အေဂျင်စီက ထုတ်ပြန်ခဲ့သည်။

ဧပြီ ၂၄ ရက်တွင် ရှိခဲ့သော သေဆုံးသူ အရေအတွက်သည် သေဆုံးသူ ၄၆၄ ဦးရှိခဲ့သည့် ဧပြီ ၂၃ ရက်နှင့်ယှဉ်ပါက အရေအတွက် ကျဆင်းသွားခဲ့ခြင်း ဖြစ်သည်။ အီတလီ၌ ကပ်ရောဂါကူးစက်ပျံ့နှံ့မှု စတင်ဖြစ်ပွားခဲ့သည့် ဖေဖော်ဝါရီ ၂၁ ရက်မှစ၍ နိုင်ငံတွင်း၌ သေဆုံးသူအရေအတွက် စုစုပေါင်း ၂၅၉၆၉ ဦးအထိရှိရာ အမေရိကန်ပြီးပါက ကမ္ဘာပေါ်တွင် ဗိုင်းရပ်စ်ကြောင့် လူသေဆုံးမှုနှုန်း ဒုတိယအမြင့်ဆုံးနိုင်ငံဖြစ်ကြောင်း ထိုအေဂျင်စီက ဆိုသည်။

အီတလီ၌ COVID-19 အတည်ပြုလူနာ ၁၉၂၉၉၄ ဦးရှိနေပြီး ယင်းပမာဏသည် အမေရိကန်၊ စပိန်တို့ပြီးပါက ကမ္ဘာတွင် ဗိုင်းရပ်စ်အတည်ပြုလူနာ အရေအတွက် တတိယအများဆုံးနိုင်ငံလည်း ဖြစ်သည်။

ရောဂါကူးစက်ခံရမှုကြောင့် လတ်တလောတွင် နာမကျန်းဖြစ်နေသည့် လူအရေအတွက်မှာ ဧပြီ ၂၃ ရက်တွင် ၁၀၆၈၄၈ ဦးမှ ၁၀၆၅၂၇ ဦးသို့ ကျဆင်းသွားခဲ့ပြီး ငါးရက်ဆက်တိုက် ကျဆင်းမှုဖြစ်ကြောင်း သိရသည်။

ဧပြီ ၂၃ ရက်တွင် အီတလီရှိ အထူးကြပ်မတ်ကုသဆောင်၌ လူ ၂၂၆၇ ဦး ကုသမှုခံယူနေပြီး ဧပြီ ၂၄ ရက်တွင်မူ အထူးကြပ်မတ် ကုသဆောင်၌ ကုသမှုခံယူသူ ၂၁၇၃ ဦးသို့ ကျဆင်းခဲ့သည်။ ဗိုင်းရပ်စ်ကူးစက်ခံ လူနာများထဲတွင် လူနာ ၆၀၄၉၈ ဦးမှာ ပြန်လည် ကျန်းမာလာပြီဖြစ်ကြောင်း ဧပြီ ၂၄ ရက်တွင် ကြေညာထားပြီး ပြန်လည်ကျန်းမာလာသူ ၅၇၅၇၆ ဦးရှိခဲ့သော ဧပြီ ၂၃ ရက်ကြေညာချက်နှင့်ယှဉ်ပါက အရေအတွက် မြင့်တက်လာခြင်းဖြစ်သည်။

နိုင်ငံ့လူဦးရေ သန်း ၆၀ ဝန်းကျင်ထဲမှ လူ ၁.၀၅၃ သန်းကို ဧပြီ ၂၃ ရက်တွင် ရောဂါပိုး ရှာဖွေစစ်ဆေးမှု လုပ်ဆောင်ပေးခဲ့ပြီး ဧပြီ ၂၄ ရက်တွင် လူ ၁.၁၄၈ သန်းကို ရောဂါပိုး ရှာဖွေစစ်ဆေးပေးခဲ့ကြောင်း အေဂျင်စီက ထုတ်ပြန်ခဲ့သည်။

ကိုရိုနာဗိုင်းရပ်စ်ကာကွယ်၊ ထိန်းချုပ်ရန်အတွက် Lockdown ချထားခြင်းကြောင့် နိုင်ငံ့စီးပွားရေးအထိနာမှုနှင့် မိသားစုများ၊ ကုမ္ပဏီများကို ထောက်ပံ့ကူညီရန်အတွက် ဘတ်ဂျက်အများအပြားသုံးစွဲမည့် ကယ်တင်ရေးအစီအစဉ်များက နိုင်ငံ၏ ကြွေးမြီ ပမာဏ၊ ဘတ်ဂျက်လိုငွေပြမှုကို မြင့်တက်စေလိမ့်မည်ဖြစ်ကြောင်း အီတလီအစိုးရအဖွဲ့က ဧပြီ ၂၄ ရက်တွင် ထုတ်ပြန်ခဲ့သည်။

အစိုးရအဖွဲ့အတည်ပြုခဲ့သော မီနီဘတ်ဂျက် (DEF) တွင် ယူရိုဇုန်၏ စီးပွားရေး တတိယမြောက် အင်အားအကြီးဆုံး အီတလီသည် ယခုနှစ်အတွင်း စီးပွားရေးကျဆင်းနိုင်ဖွယ်ရှိပြီး ပြည်တွင်းအသားတင် ထုတ်လုပ်မှု ၈ ရာခိုင်နှုန်းအထိ ကျဆင်းနိုင်ခြေရှိကြောင်း ခန့်မှန်းထားသည်။

ဘတ်ဂျက်လိုငွေ ယူရို ၅၅ ဘီလျံ (ဒေါ်လာ ၅၉ ဘီလျံ) ထိ မြင့်မားလာလိမ့်မည်ဟု အစိုးရအဖွဲ့က ခန့်မှန်းထားကြောင်း ဝန်ကြီးအဖွဲ့ လက်ထောက်အတွင်းရေးမှူး ရီကာဒိုဖရာဆာရို၏ ပြောကြားချက်ကို အီတလီ သတင်းမီဒီယာက ကိုးကားဖော်ပြခဲ့သည်။

ဘတ်ဂျက်လိုငွေပြမှုသည် GDP ၏ ၁၀.၄ ရာခိုင်နှုန်းသို့ မြင့်တက်နေခြင်းနှင့်အတူ နိုင်ငံ၏ GDP သည် ရှစ်ရာခိုင်နှုန်း ကျဆင်းလိမ့်မည်ဟု အစိုးရအဖွဲ့က ခန့်မှန်းထားသည်။ နိုင်ငံ၏ကြွေးမြီပမာဏသည် GDP ၏ ၁၅၅.၇ ရာခိုင်နှုန်းအထိ မြင့်တက်လိမ့်မည်ဖြစ်ကာ ၁၃၄.၅ ရာခိုင်နှုန်း မှတ်တမ်းရှိခဲ့သည့် ၂၀၁၉ ခုနှစ်နှင့်ယှဉ်ပါက ပမာဏ မြင့်တက်နိုင်ဖွယ်ရှိသည်။